തിരുവനന്തപുരം: വാളയാർ പെൺകുട്ടികളുടേത് ആത്മഹത്യയെന്ന് സിബിഐ. കേസിൽ അന്വേഷണം പൂർത്തിയാക്കിയ സിബിഐ കുറ്റപത്രം സമർപ്പിച്ചു. നിരന്തരമായ ശാരീരിക പീഡനം താങ്ങാൻ കഴിയാതെ പെൺകുട്ടികൾ ആത്മഹത്യ ചെയ്യുകയായിരുന്നുവെന്നാണ് സിബിഐ പറയുന്നത്. പോലീസ് കണ്ടെത്തിയവർ തന്നെയാണ് കേസിലെ പ്രതികളെന്ന് സിബിഐയും ശരിവെച്ചു.
ആദ്യത്തെ പെൺകുട്ടിയുടെ മരണത്തിൽ വലിയ മധു എന്നു വിളിക്കുന്ന മധു, ഷിബു, മധു എന്നിവർ പ്രതികളാണ്. രണ്ടാമത്തെ പെൺകുട്ടിയുടെ ആത്മഹത്യയിൽ മധുവും പ്രായപൂർത്തിയാകാത്ത ആൺകുട്ടിയും പ്രതികളാണ്. പാലക്കാട് പോക്സോ കോടതിയിലാണ് സിബിഐ കുറ്റപത്രം സമർപ്പിച്ചത്.
സിബിഐ തിരുവനന്തപുരം യൂണിറ്റ് ഡിവൈഎസ്പി അനന്തകൃഷ്ണനാണ് റിപ്പോർട്ട് സമർപ്പിച്ചത്. ബലാത്സംഗം, പോക്സോ, ആത്മഹത്യാ പ്രേരണ എന്നിവയാണ് പ്രതികൾക്കെതിിരെ ചുമത്തിയിരിക്കുന്നത്. ഷിബു എന്നയാൾക്കെതിരെ എസ്.സി എസ്.ടി വകുപ്പും ചുമത്തിയിട്ടുണ്ട്.
