അക്രമം യാദൃശ്ചികമാണെന്നാണ് കിറ്റക്സ് എംഡി സാബു എം ജേക്കബിന്റെ പ്രതികരണം. കുറ്റവാളികളെ സംരക്ഷിക്കില്ല. ഇന്നലെ ക്രിസ്മസ് കരോളുമായി ബന്ധപ്പെട്ട് ചില തൊഴിലാളികൾ ഇറങ്ങി. ഉറങ്ങാൻ കഴിയുന്നില്ലെന്നു പറഞ്ഞ് മറ്റ് ചില തൊഴിലാളികളും ഇറങ്ങി. അങ്ങനെയാണ് തർക്കം തുടങ്ങിയതെന്ന് സാബു പറഞ്ഞു.
തടയാൻ ശ്രമിച്ചെങ്കിലും സുരക്ഷാ ജീവനക്കാരെയും തൊഴിലിളികൾ ആക്രമിച്ചു. അങ്ങനെയാണ് പോലീസിിനെ വിളിച്ചത്. അവരെന്തോ ഡ്രഗ്സ് ഉപയോഗിച്ചെന്നാണ് ഞങ്ങൾ നടത്തിയ അന്വേഷണത്തിൽ മനസിലായത്. ആദ്യമായാണ് ഇവിടെ ഇത്തരത്തിൽ ഒരു സംഭവം ഉണ്ടായതെന്ന് സാബു അവകാശപ്പെട്ടു.
ഇന്നലെ രാത്രിയാണ് കിറ്റക്സ് ജീവനക്കാരായ അഞ്ഞൂറോളം ഇതര സംസ്ഥാന തൊഴിലാളികൾ സംഘർഷം ഉണ്ടാക്കിയത്. ക്രിസ്മസ് ആഘോഷത്തെത്തുടർന്നായിരുന്നു സംഘർഷം. പോലീസ് സ്ഥലത്തെത്തിയപ്പോൾ കിറ്റക്സ് തൊഴിലാളികൾ സംഘർഷം അഴിച്ചുവിടുകയായിരുന്നു. രണ്ട് പോലീസ് ജീപ്പുകൾ അക്രമികൾ കത്തിച്ചു. ആക്രമണത്തിൽ കുന്നത്തുനാട് സിഐ വി ടി ഷാജൻ അടക്കമുള്ള അഞ്ച് പോലീസുകാർക്ക് പരിക്കേറ്റു. ഷാജന്റെ തലക്കും കൈക്കുമാണ് പരിക്കേറ്റത്. പരിക്കേറ്റവരെ കോലഞ്ചേരി മെഡിക്കൽ കോളേജ് ആശുപത്രിയിൽ പ്രവേശിപ്പിച്ചിരിക്കുകയാണ്.
സംഘർഷത്തിൽ 150ഓളം തൊഴിലാളികളെ പോലീസ് കസ്റ്റഡിയിലെടുത്തിട്ടുണ്ട്. സ്ഥലത്ത് വൻ പോലീസ് സന്നാഹം തമ്പടിച്ചിട്ടുണ്ട്. സ്ഥലത്ത് തൊഴിലാളികള്‍ തമ്മിൽ സംഘര്‍ഷമുണ്ടായെന്നും ഇവര്‍ മദ്യലഹരിയിലായിരുന്നു എന്നും എറണാകുളം റൂറൽ എസ്പി കെ കാര്‍ത്തിക് സ്ഥിരീകരിച്ചു.
മദ്യലഹരിയിലായിരുന്ന തൊഴിലാളികൾ തമ്മിൽ തല്ലിയെന്നും തുടർന്ന് പോലീസ് സ്ഥലത്തെത്തിയപ്പോൾ തൊഴിലാളികൾ അവരെ ആക്രമിക്കുകയായിരുന്നുവെന്നും നാട്ടുകാർ പറഞ്ഞു. തൊഴിലാളികളോടു പിരിഞ്ഞു പോകാൻ പോലീസ് ആവശ്യപ്പെട്ടെങ്കിലും കൂട്ടാക്കാത്ത തൊഴിലാളികള്‍ പോലീസിനെ കയ്യേറ്റം ചെയ്യുകയായിരുന്നു. വിവരമറിഞ്ഞ് കൂടുതൽ പോലീസ് സ്ഥലത്തെത്തിയെങ്കിലും ഇവരും ആക്രമണം നേരിട്ടു. കുന്നത്തുനാട് സ്റ്റേഷനിലെ വാഹനമാണ് തൊഴിലാളികൾ കത്തിച്ചത്.
അപ്രതീക്ഷിതമായി വന്ന ആക്രമണം നേരിടാൻ പോലീസ് സമീപത്തെ വീടുകളിൽ നിന്ന് ഹെൽമറ്റ് വാങ്ങിയ ശേഷമാണ് സ്ഥലത്തെത്തിയതെന്നും എന്നാൽ പോലീസിനെ തൊഴിലാളികളിൽ നിന്ന് രക്ഷിച്ചത് നാട്ടുകാരാണെന്നും ഒരു പ്രദേശവാസി പറഞ്ഞു.സംഭവത്തിൻ്റെ ദൃശ്യങ്ങൾ പകർത്താൻ ശ്രമിച്ച നാട്ടുകാരെയും തൊഴിലാളികൾ ആക്രമിച്ചു. റൂറൽ എസ്പി കാർത്തിക്കിൻ്റെ നേതൃത്വത്തിൽ സ്ഥലത്തെത്തിയ അഞ്ഞൂറോളം പോലീസുകാരുടെ സംഘം ക്യമ്പിനുള്ളിൽ കയറി അക്രമികളെ ബലംപ്രയോഗിച്ചാണ് അറസ്റ്റ് ചെയ്തത്.
