ആലപ്പുഴ > എസ്ഡിപിഐ സംസ്ഥാന സെക്രട്ടറി അഡ്വ. കെ എസ് ഷാനെ കൊലപ്പെടുത്തിയ സംഘത്തിലെ അഞ്ച് പേരും പിടിയിലായി. കൊലപാതകത്തില് നേരിട്ട് പങ്കെടുത്ത അതുല്, ജിഷ്ണു, അഭിമന്യു, വിഷ്ണു, സനന്ത് എന്നീ ആര്എസ്എസ് പ്രവര്ത്തകരെയാണ് പൊലീസ് പിടികൂടിയത്. വാഹനത്തിലെത്തി ഷാനിനെ വെട്ടിക്കൊലപ്പെടുത്തിയത് ഇവരാണ്. ആലപ്പുഴ ജില്ലയിലെ വിവിധ ഭാഗങ്ങളില്നിന്നാണ് ഇവരെ പൊലീസ് പിടികൂടിയത്. ഗൂഢാലോചനയില് പങ്കെടുത്ത പലരും കസ്റ്റഡിയിലുണ്ട്.
നേരത്തെ, ഗൂഢാലോചനയില് പങ്കുള്ളവരെയും പ്രതികളെ സഹായിച്ചവരെയും പൊലീസ് അറസ്റ്റ് ചെയ്തിരുന്നു. രണ്ടുപേരെവീതം ആലപ്പുഴയില് നിന്നും തൃശൂരില് നിന്നുമാണ് അറസ്റ്റ് ചെയ്തത്. ഇതില് ഒരാള് ആര്എസ്എസ് ബൗദ്ധിക് പ്രമുഖ് ആണ്. ചേര്ത്തല തിരുവിഴ മഠത്തില്ചിറ മനീഷ് (33), അര്ത്തുങ്കല് പത്താന്ചിറയില് സനല്കുമാര് (39) എന്നിവരാണ് ആലപ്പുഴയില് പ്രത്യേക അന്വേഷണ സംഘം അറസ്റ്റ് ചെയ്തത്. തൃക്കൂര് കള്ളായി സ്വദേശികളായ ചാലക്കുടി താലൂക്ക് ആര്എസ്എസ് ബൗദ്ധിക് പ്രമുഖ് കല്ലംകുന്നേല് കെ ടി സുരേഷ്(49), മംഗലത്ത് വീട്ടില് ഉമേഷ് (27) എന്നിവരാണ് തൃശൂരില് വരന്തരപ്പിള്ളി പൊലീസിന്റെ പിടിയിലായത്. ഇവരെ പ്രത്യേക അന്വേഷണ സംഘത്തിന് കൈമാറി.
പ്രതികളെ ഒളിവില് കഴയാന് സഹായിച്ചതിനാണ് സുരേഷിന്റെയും ഉമേഷിന്റെയും അറസ്റ്റ്. സുരേഷിന്റെ കള്ളായിയിലെ ബന്ധുവീട്ടിലാണ് മൂന്ന് പ്രതികള്ക്ക് ഒളിവില് കഴിയാന് സൗകര്യമൊരുക്കിത്. ഉമേഷും ആര്എസ്എസ് പ്രവര്ത്തകനാണെന്ന് വരന്തരപ്പിള്ളി പൊലീസ് പറഞ്ഞു. പ്രതികളെ സഹായിച്ചതിനാണ് മനീഷിന്റെയും സനലിന്റെയും അറസ്റ്റ്. പ്രതികളെ വാഹനത്തില് കയറ്റി വിട്ടവരാണ് ഇവരെന്നും ഇരുവരും ആര്എസ്എസ് പ്രവര്ത്തകരാണെന്നും പൊലീസ് പറഞ്ഞു.
ആലപ്പുഴ ക്രൈംബ്രാഞ്ച് ഡിവൈഎസ്പി കെ വി ബെന്നിയുടെ നേതൃത്വത്തിലാണ് അന്വേഷണം.
