പശ്ചിമഘട്ട സംരക്ഷണത്തിന് ഗാഡ്ഗിൽ സമിതി റിപ്പോർട്ട് നടപ്പാക്കണമെന്ന നിലപാടിന്റെ പേരിൽ പി.ടി തോമസിനോളം പീഡനം നേരിട്ട മറ്റൊരാൾ കോൺഗ്രസിലുണ്ടാവില്ല. മുതിർന്ന നേതാവായിട്ടും മുൻ എം.പിയായിട്ടും ഇടുക്കി സീറ്റ് നിഷേധിക്കപ്പെട്ട പി.ടിയാവട്ടെ ഒരിക്കലും നിലപാട് തിരുത്തിയുമില്ല. പി.ടിയുടെ നിലപാടിലേക്ക് കോൺഗ്രസ് എത്തിയെന്നാണ് പ്രതിപക്ഷ നേതാവ് വി.ഡി സതീശന്റെ അനുസ്മരണ സന്ദേശം സൂചന നൽകുന്നത്.
”കോൺഗ്രസ് പ്രസ്ഥാനത്തെ സംബന്ധിച്ച് തീരാനഷ്ടത്തിന്റെ ദിനമാണിന്ന്…. എനിക്ക് വ്യക്തിപരമായി ജ്യേഷ്ഠ സഹോദരനെയാണ് നഷ്ടമായത്. നിലപാടുകളിൽ വിട്ടുവീഴ്ച ചെയ്യാത്ത കോൺഗ്രസ് പോരാളി…. എക്കാലത്തും ശരിയുടെ പക്ഷമായിരുന്നു പി.ടിയുടേത്. പരിസ്ഥിതി, സ്ത്രീ സുരക്ഷാ വിഷയങ്ങളിലെ സത്യസന്ധമായ നിലപാടുകൾ ഞാൻ ഉൾപ്പെടെയുള്ള പൊതുപ്രവർത്തകർക്ക് മാതൃകയായിരുന്നു. പശ്ചിമഘട്ട മേഖലയുടെ സംരക്ഷണം മുൻനിർത്തി ഗാഡ്ഗിൽ റിപ്പോർട്ട് നടപ്പാക്കണമെന്ന നിലപാടിനെതിരെ ശക്തമായ പ്രതിഷേധമുയർന്നപ്പോഴും താൻ ശരിയുടെ പക്ഷത്താണെന്ന ഉറച്ച നിലപാടിലായിരുന്നു പി.ടി. പി.ടിയുടെ നിലപാട് മാത്രമായിരുന്നു ശരിയെന്ന് കാലം തെളിയിച്ചതുമാണ്. ശരിക്കുമൊരു പോരാളി… വിയോഗ വാർത്ത വിശ്വസിക്കാനാകുന്നില്ല… പ്രണാമം….”–വി.ഡി സതീശന്റെ ഫേസ്ബുക്ക് പോസ്റ്റ് പറയുന്നു.
ഗാഡ്ഗിൽ സമിതി റിപ്പോർട്ട് പുറത്ത് വന്നതിന് ശേഷം അതിനെതിരെ കേരളത്തിൽ വലിയ പ്രക്ഷോഭങ്ങളാണ് നടന്നത്. ഇടുക്കി-താമരശേരി ബിഷപ്പുമാരാണ് സമരങ്ങൾക്ക് നേതൃത്വം നൽകിയിരുന്നത്. കേരളത്തിൽ പലയിടത്തും വനംവകുപ്പിന്റെ ഓഫീസുകൾ വരെ ആക്രമിക്കപ്പെട്ടു. വനങ്ങളിൽ അനധികൃതമായി പ്രവർത്തിക്കുന്ന പാറമടകളും വനംകൊള്ളക്കാരും ഭൂമി കൈയ്യേറ്റക്കാരും സമരങ്ങൾക്ക് സാമ്പത്തിക സഹായം നൽകുന്നുവെന്ന പി.ടിയുടെ ആരോപണം ഏറെ വിവാദമായി.
പി.ടി തോമസിനെ കൊല്ലുകയോ നാടുകടത്തുകയോ വേണമെന്ന ആവശ്യവും എതിരാളികൾ ഉയർത്തി. ഇടുക്കി പാർലമെന്റ് മണ്ഡലത്തിൽ നിന്ന് 2009ൽ 75000 വോട്ടിന്റെ ഭൂരിപക്ഷത്തിൽ ജയിച്ച പി.ടിക്ക് 2014ൽ സീറ്റ് നിഷേധിക്കപ്പെടാൻ ഇത് കാരണമായി. പി.ടിയെ സ്ഥാനാർത്ഥിയാക്കുന്നത് കോൺഗ്രസിനെയും യു.പി.എയെയും പ്രതികൂലമായി ബാധിക്കുമെന്നാണ് കോൺഗ്രസ് നേതൃത്വം വിലയിരുത്തിയത്. ഇന്ത്യൻ നാഷണൽ കോൺഗ്രസിന്റെ ആവശ്യപ്രകാരം യു.പി.എ സർക്കാർ രൂപീകരിച്ച പ്രഫ.മാധവ് ഗാഡ്ഗിൽ സമിതിയുടെ റിപ്പോർട്ട് നടപ്പാക്കണമെന്ന നിലപാടാണ് പി.ടി തോമസ് സ്വീകരിച്ചിരുന്നത്. അതിന് വേണ്ടിയാണ് കോൺഗ്രസിന് അകത്ത് സമരം നടത്തിയതും.
പശ്ചിമഘട്ട സംരക്ഷണത്തിൽ കള്ളങ്ങൾ പ്രചരിപ്പിക്കാൻ ആത്മീയതയുടെ മുഖാവരണം അണിഞ്ഞ കുറെ വൈദികരാണ് ഉണ്ടായിരുന്നതെന്നും പിന്നീട് നൽകിയ അഭിമുഖങ്ങളിൽ അദ്ദേഹം ചൂണ്ടിക്കാട്ടിയിരുന്നു. യേശു ക്രിസ്തുവിന്റെ പ്രതിപുരുഷൻമാരായി ജനങ്ങൾ കാണുന്ന വൈദികർ സത്യങ്ങൾ ഒളിച്ചുവെക്കുകയാണെന്നും അദ്ദേഹം ആരോപിച്ചു.
ഗാഡ്ഗിൽ സമിതി റിപ്പോർട്ടിന് അനുകൂലമായ നിലപാട് സ്വീകരിച്ചതിന് എതിരാളികൾ അദ്ദേഹത്തിന്റെ ശവഘോഷയാത്ര വരെ നടത്തിയിരുന്നു. പ്രതീകാത്മകമായി ശവമടക്കിൽ ഏതാനും യഥാർത്ഥ വൈദികർ പങ്കെടുത്തതും അക്കാലത്ത് ഏറെ ചർച്ചയായി. മരണസമയത്തെ ഒപ്പീസ് ഒക്കെ ചൊല്ലി ധൂപക്കുറ്റിയൊക്കെ പുകച്ചാണ് എതിരാളികൾ ശവഘോഷ യാത്ര നടത്തിയത്.
മാർപാപ്പ എഴുതിയ ലവ്തോസി എന്ന പുസ്തകത്തിൽ പരിസ്ഥിതി സംരക്ഷിക്കുന്നതിന്റെ പ്രാധാന്യത്തെ കുറിച്ച് പറയുന്നുണ്ടെന്നും അത് ഇടുക്കി രൂപതാ ബിഷപ്പ് അടക്കമുള്ളവർ വായിച്ച് വായിക്കണമെന്നും അദ്ദേഹം മറ്റൊരു അഭിമുഖത്തിൽ പറയുകയുണ്ടായി.
കേരളത്തിൽ പ്രളയം തുടർക്കഥയായപ്പോൾ മാധവ് ഗാഡ്ഗിൽ സമിതി റിപ്പോർട്ട് നടപ്പാക്കണമെന്ന ആവശ്യവുമായും പി.ടി തോമസ് രംഗത്ത് എത്തിയിരുന്നു. ഗാഡ്ഗിൽ സമിതി റിപ്പോർട്ടിന്റെ പ്രാധാന്യം പിണറായി വിജയനും രമേശ് ചെ്ന്നിത്തലക്കും ഉമ്മൻ ചാണ്ടിക്കും കോടിയേരി ബാലകൃഷ്ണനും ബോധ്യപ്പെടുന്ന കാലം വരുമെന്നും 2018ൽ പി.ടി തോമസ് പറഞ്ഞിരുന്നു.
****
