ഇബ്രാഹിമിന് എതിരായ കേസ്
വയനാട്ടിലെ സിവിൽ പൊലീസ് ഓഫീസറായ എ.ബി പ്രമോദിന്റെ വീട്ടിൽ നിരോധിത രാഷ്ട്രീയ പാർട്ടിയായ സി.പി.ഐ മാവോയിസ്റ്റിന്റെ അഞ്ച് പ്രവർത്തകർ അതിക്രമിച്ചു കയറി തോക്ക് ചൂണ്ടി ഭീഷണിപ്പെടുത്തിയെന്ന കേസിലാണ് ഇബ്രാഹിമിനെ പ്രതിചേർത്തിരുന്നത്.
2014 ഏപ്രിൽ 24നാണ് ഈ സംഭവം നടക്കുന്നത്. പ്രമോദിനെ തോക്ക് ചൂണ്ടി കൊല്ലുമെന്ന് ഭീഷണിപ്പെടുത്തിയെന്നും മാവോയിസ്റ്റ് വിരുദ്ധ പ്രവർത്തനങ്ങളിൽ നിന്ന് പിൻമാറണമെന്നും സർവ്വീസിൽ നിന്ന് രാജിവെക്കണമെന്നും ആവശ്യപ്പെട്ടെന്നുമാണ് കേസ്.
പ്രമോദിന്റെ വീടിന് പുറത്ത് നിർത്തിയിട്ടിരുന്ന ബൈക്കിന് തീയിട്ടതിനാൽ 12000 രൂപയുടെ നഷ്ടമുണ്ടായെന്നും പൊലീസ് പറയുന്നു. വീടിന് അകത്തേക്ക് ലഘുലേഖകൾ വലിച്ചെറിഞ്ഞ മാവോയിസ്റ്റ് പി.എൽ.ജി.എ സംഘം വീട്ടിന് പുറത്ത് പോസ്റ്റർ പതിക്കുകയും ഇന്ത്യയിലെ സർക്കാരിനെതിരെ സായുധ വിപ്ലവം നടത്തുമെന്നും പ്രഖ്യാപിച്ചു. വയനാട്ടിലെ വെള്ളമുണ്ട പൊലിസ് രജിസ്റ്റർ ചെയ്ത കേസിൽ ആദ്യം അഞ്ച് പ്രതികളാണുണ്ടായിരുന്നത്. പിന്നീട് കേസ് ദേശീയ അന്വേഷണ ഏജൻസി (എൻ.ഐ.എ) ഏറ്റെടുത്തു.
കോഴിക്കോട് ജില്ലയിൽ നിന്ന അറസ്റ്റ് ചെയ്യപ്പെട്ട ഒരാൾ കേസിൽ മാപ്പ്‌സാക്ഷിയായി. 2015 ജൂലൈ 13ന് അറസ്റ്റ് ചെയ്ത ഇബ്രാഹിമിനെ 28നാണ് വയനാട് കേസിൽ പ്രതിചേർത്തത്. പോലീസുകാരന്റെ വീട് ആക്രമിക്കാൻ ഇബ്രാഹിം അടക്കമുള്ളവർ ഗൂഢാലോചന നടത്തിയെന്നാണ് ആരോപണം.
ആരോഗ്യകാരണങ്ങൾ ചൂണ്ടിക്കാട്ടി ഇബ്രാഹിം നൽകിയ ജാമ്യാപേക്ഷ എൻ.ഐ.എ കോടതി തള്ളിയതിനെ തുടർന്നാണ് ഹൈക്കോടതിയെ സമീപിച്ചത്. ജാമ്യം അനുവദിച്ച് ഹൈക്കോടതി ഇങ്ങനെ നിരീക്ഷിക്കുന്നു.
”എട്ടാം പ്രതിക്ക് എതിരെ മാപ്പ്‌സാക്ഷിയുടെ മൊഴി മാത്രമേയുള്ളൂയെന്നാണ് എൻ.ഐ.എ കോടതി ജഡ്ജിയും പറയുന്നത്. ഇബ്രാഹിമിന് വേണ്ടി ഹാജരായ അഭിഭാഷകർ സി.ആർ.പി.സിയിലെ 164ാം വകുപ്പ് പ്രകാരം മാപ്പ്‌സാക്ഷി മജിസ്‌ട്രേറ്റിന് മുന്നിൽ നൽകിയ മൊഴി പ്രത്യേകമായി ചൂണ്ടിക്കാട്ടി. ഏഴാം പ്രതിയും എട്ടാം പ്രതിയും ഒരുമിച്ചാണ് താമസിച്ചിരുന്നതെന്നും അവരെ ഒരുമിച്ച് പല സ്ഥലങ്ങളിലും കണ്ടുവെന്നുമാണ് മാപ്പ്‌സാക്ഷി പറയുന്നത്. അവരെല്ലാം ഒരേ പ്രത്യയശാസ്ത്രമാണ് പങ്കുവെക്കുന്നതെന്നും പറയുന്നു…..മാപ്പ് സാക്ഷി ഏഴാം പ്രതിയുടെയും എട്ടാം പ്രതിയുടെയും കൂടെയുണ്ടായിരുന്ന സമയത്ത് നടക്കാനിരിക്കുന്ന ചില പ്രവർത്തനങ്ങളെ കുറിച്ച് ഏഴാം പ്രതി പ്രസ്താവന നടത്തിയെന്നും അയാളുടെ കൈയ്യിൽ നാല് ബാഗുകൾ ഉണ്ടായിരുന്നുവെന്നും ആ ബാഗുകൾക്ക് അകത്തുള്ള വസ്തുക്കളുടെ തൂക്കവും രൂപവും കണ്ടാൽ ആയുധങ്ങളാണെന്ന് തോന്നുമെന്നുമാണ് മാപ്പ് സാക്ഷിയുടെ മൊഴി പറയുന്നതെന്ന് അഭിഭാഷകർ ചൂണ്ടിക്കാട്ടുന്നു. ഇബ്രാഹിമും ഏഴാം പ്രതിയും ഒരേ പ്രത്യയശാസ്ത്രം പങ്കുവെക്കുന്നവരും ഒരുമിച്ച് താമസിക്കുന്നവരുമായിരുന്നെങ്കിലും ആക്രമണത്തിന്റെ ആസൂത്രണത്തിൽ ഇബ്രാഹിമിന് സജീവമായ പങ്കാളിത്തമുണ്ടെന്നതിന് പ്രഥമദൃഷ്ട്യാ തെളിവില്ല.”. തുടർന്ന് ആരോഗ്യകാരണങ്ങൾ കൂടി പരിഗണിച്ചാണ് ജാമ്യം അനുവദിച്ചത്.
ആറാം പ്രതിയുടെ (മാപ്പ് സാക്ഷി) മൊഴികളുടെ സംക്ഷിപ്ത രൂപം*
”ഞാൻ (…) സ്റ്റാൻഡിൽ ഓട്ടോ ഓടിക്കുന്നു. എന്റെ സ്വന്തം വണ്ടിയാണ്. ഞാൻ പഠിക്കുന്ന കാലത്ത് (…) യിൽ പ്രവർത്തിച്ചിരുന്നു. പിന്നീട് (…) യൂണിയനിൽ ചേർന്നു….2013ൽ ഒരു ദിവസം ഓട്ടോറിക്ഷയുമായി ഓട്ടോ സർവ്വീസ് സെന്ററിൽ പോയി വരവെ (…) എന്ന സ്ഥലത്ത് വെച്ച് എന്റെ സുഹൃത്തും ഡ്രൈവിങ് ആശാനും (…) പ്രവർത്തകനുമായ (…) എന്ന് വിളിക്കുന്ന ആൾ മറ്റൊരാളുമായി സംസാരിച്ചു നിൽക്കുന്നത് കണ്ട് ഞാൻ ഓട്ടോ നിർത്തി.കൂടെയുള്ളയാളെ വടകര എത്തിക്കാൻ പറ്റുമോ എന്നു (…) ചോദിച്ചു. പോകുന്ന വഴിക്ക് അയാളുടെ പേര് (…) എന്നാണെന്നും മെഡിക്കൽ എക്യുപ്പ്‌മെന്റ് ജീവനക്കാരനാണെന്നും ഇനിയും വരുമ്പോൾ ഓട്ടം വിളിക്കാമെന്നും പറഞ്ഞു.തുടർന്ന് നമ്പർ വാങ്ങി. അതിന് ശേഷം രണ്ടാഴ്ച്ചയോളം കഴിഞ്ഞ് (…) എന്നെ വിളിച്ച് ഒരു ഓട്ടം പോവാനുണ്ടെന്ന് പറഞ്ഞു. പിന്നീട് ഒരു വീട് വാടകക്ക് എടുത്തു നൽകി. പിന്നീട് (…) ന്റെ കൂടെ വന്ന (…) എന്നയാൾക്ക് പച്ചക്കറി കടയിൽ ജോലി തയ്യാറാക്കി നൽകി. (…) എല്ലാ ദിവസവും വാടകവീട്ടിൽ വരാറുണ്ടായിരുന്നില്ല (…) അയാൾ അവിടെയുള്ളപ്പോൾ ഞാൻ അവിടെ പോയി വർത്തമാനം പറഞ്ഞും തരുന്ന പുസ്തകങ്ങൾ വായിച്ചും ഇരിക്കും.ചിലപ്പോൾ രാത്രി 11 വരെ ഇരിക്കാറുണ്ട്. (…) എനിക്ക് തന്നിരുന്ന പുസ്തകങ്ങൾ കമ്മ്യൂണിസ്റ്റ്, മാവോയിസ്റ്റ് ആശയങ്ങൾ ഉള്ളവയായിരുന്നു, പരിചയപ്പെട്ട് കുറച്ചു നാളുകൾക്ക് ശേഷം മാവോയിസ്റ്റ് ആശയങ്ങൾ ആണ് നല്ലതെന്നും അരുന്ധതി റോയിയുടെ ഒരു പുസ്തകത്തിൽ മാവോയിസ്റ്റ് പ്രവർത്തനത്തെ കുറിച്ച് പറയുന്ന കാര്യങ്ങൾ ശരിയാണെന്നും (…)ഉം ആ ആശയത്തിൽ വിശ്വസിക്കുന്നയാളാണെന്നും മറ്റും പറയുമായിരുന്നു.(…) വും പഴയകാല നക്‌സൽ പ്രവർത്തകനാണെന്നും എന്നോട് പറഞ്ഞിരുന്നു. കാടിനുള്ളിൽ മാവോയിസ്റ്റ് സ്‌ക്വോഡ് പ്രവർത്തിക്കുന്നുണ്ടെന്നും അവർക്ക് വേണ്ട സഹായങ്ങൾ ചെയ്ത് കൊടുക്കാറുണ്ടെന്നും (…) എന്നോട് പറഞ്ഞിരുന്നു. അവനുമായി പരിചയപ്പെട്ട നാൾ മുതൽ എന്നെ ദൂര ഓട്ടം വിളിക്കാറുണ്ടായിരുന്നു. പക്ഷേ, ആദ്യകാലങ്ങളിൽ കാടിന്റെ ഏരിയയിൽ ഒന്നും പോയിരുന്നില്ല. മെയിൻ സ്ഥലങ്ങളിൽ കൊണ്ടാക്കും. അവിടെ നിന്നും വേറെ വണ്ടി വരും എന്ന് പറഞ്ഞ് ഇറങ്ങിപ്പോയാൽ പിന്നെ രണ്ട് ദിവസമൊക്കെ കഴിഞ്ഞാണ് കാണാറ്.ഞാൻ (…) മുമായി സംസാരിക്കുമ്പോൾ മാവോയിസ്റ്റ് ആശയങ്ങളെ കുറിച്ചും മാവോയിസ്റ്റ് പ്രവർത്തനങ്ങൾ നമ്മുടെ രാജ്യത്തിന് ആവശ്യമാണെന്നും ആന്ധ്രാപ്രദേശ്, ഒറീസ, ഛത്തീസ്ഗഡ് തുടങ്ങിയ സംസ്ഥാനങ്ങളിലെ പോലീസ് അതിക്രമങ്ങളെ പറ്റിയും എന്നോട് സംസാരിക്കാറുണ്ടായിരുന്നു.ഞാൻ പലപ്പോഴും (…) നോട് മാവോയിസ്റ്റ് മെമ്പർ ആകുന്നതിന് താൽപര്യം ഉള്ളതായും അതിന് എന്ത് വേണമെന്ന് ചോദിക്കുകയും ചെയ്തിരുന്നു. അത് കൂടാതെ കാട്ടിൽ എത്ര ഗ്രൂപ്പുകൾ ഉണ്ട്, അതിൽ എത്ര ആളുകൾ ഉണ്ട് തുടങ്ങിയ കാര്യങ്ങൾ ചോദിക്കുമ്പോൾ അതൊക്കെ പാർട്ടി രഹസ്യമാണ് എന്നും അറിയാറാവുമ്പോൾ അറിഞ്ഞുകൊള്ളും എന്നും പറയും. പിന്നീട് (…)ന്റെ യഥാർത്ഥ പേര് (…) എന്നാണെന്ന് എനിക്ക് മനസിലായി. ഒക്ടോബർ മാസം കോഴിക്കോട് ചൂരണിമല ഭാഗത്ത് ഉണ്ടായ ജെ.സി.ബി ആക്രമണം, 2013 നവംബർ മാസം ഉണ്ടായ ഫോറസ്റ്റ് സ്‌റ്റേഷൻ ആക്രമണം തുടങ്ങിയവയെ കുറിച്ച് വാർത്തകൾ വന്നതിനെ പറ്റി ചോദിച്ചപ്പോൾ അതൊക്കെ രാഷ്ട്രീയ പ്രചരണ കാമ്പയിന്റെ ഭാഗമായുള്ളതാണെന്നും മറ്റും പറയുമായിരുന്നു.താമസം തുടങ്ങി രണ്ടു മാസം കഴിഞ്ഞപ്പോൾ മുതൽ ഞാൻ അവരോടൊപ്പം കുറ്റ്യാടി ചുരം, നെടുമ്പൊയിൽ ചുരം, പാൽച്ചുരം, നിലമ്പൂർ വഴിക്കടവ് ഭാഗത്തുള്ള ചുരം എന്നിവിടങ്ങിളിൽ പലപ്രാവശ്യം ഭക്ഷണ സാധനങ്ങളും ബുക്കുകളും ലഘുലേഖകളും പോസ്റ്ററുകളും മറ്റു സാധനങ്ങളുമെല്ലാം ചാക്കിലും ബാഗിലും മറ്റുമാക്കി എന്റെ ഓട്ടോയിൽ പോയിട്ടുണ്ട്.എല്ലാ സ്ഥലത്തും ചെല്ലുന്ന സമയം രാത്രി ഏഴിനും എട്ടിനും ഇടയിലായിരിക്കും. എല്ലാ സ്ഥലങ്ങളിലും എന്റെ കൂടെ (…)ഉം ചിലപ്പോൾ (…)വും ചിലപ്പോൾ രണ്ടു പേരും ഉണ്ടാവാറുണ്ട്. കുറ്റ്യാടി ചുരത്തിൽ ഞങ്ങൾ മൂന്നു പേരും ചെന്നപ്പോൾ വണ്ടിക്ക് അടുത്തേക്ക് വന്ന് (…)ഉംമറ്റൊരാളും ബാഗും മറ്റു സാധനങ്ങളും കൊണ്ടുപോയി. വന്ന രണ്ടു പേരും പച്ചക്കളർ യൂണിഫോമിലും തോക്ക് തോളത്തിട്ടും ആണ് വന്നത്.(…) എന്നെ കെട്ടിപ്പിടിച്ച് (…) എന്നു പറഞ്ഞ് പരിചയപ്പെടുത്തിയിട്ട് എന്റെ വീട്ടിലെ കാര്യങ്ങളും കുട്ടികളെ കുറിച്ചും ചോദിച്ചു (…) എന്നാണ് പേര് പറഞ്ഞതെങ്കിലും റെയിൽവേ സ്‌റ്റേഷനിൽ പൊലീസ് പതിച്ച പോസ്റ്ററുകളിൽ നിന്ന് ആളെ ഞാൻ മനസിലാക്കിയിരുന്നു.2014ലെ വിഷു കഴിഞ്ഞ് ഒരാഴ്ച്ചക്ക് ശേഷമുള്ള തിങ്കളാഴ്ച്ച ഞാനും (…)ഉം (…)ഉം ഒന്നിച്ച് കുറ്റ്യാടി ചുരം വഴി കുഞ്ഞോം കാട്ടിന് അടുത്തുള്ള വാളാംതോട് ഭാഗത്തേക്ക് ഓട്ടോറിക്ഷയിൽ പോയിരുന്നു….ഒരു ബാഗിൽ ഭക്ഷണസാധനങ്ങളും മറ്റൊരു ബാഗിൽ തോക്കെന്നു തോന്നിക്കുന്ന വസ്തുക്കളുമാണ് ഉണ്ടായിരുന്നത്…ആദിവാസികൾക്കും പാവപ്പെട്ടവർക്കും വേണ്ടിയാണ് മാവോയിസ്റ്റ് സംഘടന പ്രവർത്തിക്കുന്നതെന്നും അടിച്ചമർത്തലിന് എതിരെയാണ് കാട്ടിനുള്ളിൽ താമസിച്ച് പോരാടുന്നതെന്നും മറ്റും പറഞ്ഞതിനാൽ അവരോട് അനുഭാവം തോന്നിയതു കൊണ്ടാണ് അവരുടെ പ്രവർത്തനങ്ങളിൽ സഹായിച്ചത്. കഷ്ടപ്പെടുന്നവരെ സഹായിക്കുകയെന്നത് ഞാൻ ചെറുപ്പകാലം മുതലേ ചെയ്യുന്നതാണ്. അവരുടെ പ്രവർത്തനം രാജ്യവിരുദ്ധമാണെന്ന് എനിക്കറിയില്ലായിരുന്നു. ഇക്കാര്യങ്ങൾ ആദ്യം തുറന്ന് പറയാതിരുന്നത് പേടി കൊണ്ടായിരുന്നു.” — ആറാം പ്രതി വടകര പോലീസിന് നൽകിയ മൊഴിയും പറയുന്നു.
ആറാം പ്രതി മാപ്പ് സാക്ഷിയായ ശേഷം സി.ആർ.പി.സി 164ാം വകുപ്പ് പ്രകാരം മജിസ്‌ട്രേറ്റിന് മുന്നിൽ നൽകിയ മൊഴി ആക്രമണത്തിൽ ഇബ്രാഹിമിന്റെ പങ്ക് വ്യക്തമാക്കുന്നുണ്ടെന്നാണ് എൻ.ഐ.എ കോടതിയിൽ എൻ.ഐ.എ വാദിച്ചത്. പൊലീസുകാരന്റെ വീട്ടിൽ അതിക്രമിച്ചു കയറിയ സംഘത്തിലെ ഒന്നാം പ്രതി എ.കെ-47 തോക്കാണ് ഉപയോഗിച്ചതെന്നും മറ്റു നാലു പേർ സെൽഫ് ലോഡിങ് റൈഫിളാണ് ഉപയോഗിച്ചതെന്നും എൻ.ഐ.എ പറയുന്നു. ഇബ്രാഹിം ഒരു എ.കെ 47 തോക്കും നാല് സെൽഫ് ലോഡിങ് റൈഫിളും കടത്തിയെന്നാണ് മാപ്പുസാക്ഷിയുടെ മൊഴി പറയുന്നതെന്നും എൻ.ഐ.എ വാദിച്ചു.
യു.എ.പി.എ കേസുകളിൽ ജാമ്യാപേക്ഷ പരിഗണിക്കുമ്പോൾ അന്വേഷണ ഏജൻസിയുടെ കേസ് അംഗീകരിക്കണമെന്നും തെളിവുകൾ വിശദമായി പരിശോധിക്കരുതെന്നുമുള്ള എൻ.ഐ.എ-സഹൂർ അഹമ്മദ് ഷാ വതാലി കേസിലെ സുപ്രിംകോടതി വിധിയും എൻ.ഐ.എ ചൂണ്ടിക്കാട്ടി. തുടർന്നാണ് യു.എ.പി.എ നിയമത്തിലെ 45ഡി(3) വകുപ്പ് പ്രകാരം ഇബ്രാഹിമിന് എതിരായ ആരോപണങ്ങൾ പ്രഥമദൃഷ്യാ സത്യമാണെന്ന് ചൂണ്ടിക്കാട്ടി എൻ.ഐ.എ കോടതി ജാമ്യാപേക്ഷ തള്ളിയത്.
യു.എ.പി.എ 45ഡി(3) പറയുന്നത്
” യു.എ.പി.എ നിയമത്തിലെ നാലാം അധ്യായത്തിലും അഞ്ചാം അധ്യായത്തിലും പറയുന്ന കുറ്റങ്ങൾ ചെയ്‌തെന്ന് ആരോപണമുള്ളവരെ പബ്ലിക്ക് പ്രോസിക്യൂട്ടറുടെ വാദം കേൾക്കാതെ ജാമ്യം നൽകുകയോ സ്വന്തം ബോണ്ടിൽ വിട്ടയക്കുകയോ ചെയ്യരുത്. കേസ് ഡയറിയും സി.ആർ.പി.സി 173-ാം വകുപ്പ് പ്രകാരമുള്ള റിപ്പോർട്ടും പ്രകാരം പ്രതികൾക്കെതിരായ ആരോപണങ്ങൾ പ്രഥമൃഷ്ട്യാ സത്യമാണെന്നു കോടതിക്കു വിശ്വാസം വന്നാലും അവരെ ജാമ്യത്തിലോ സ്വന്തം ബോണ്ടിലോ വിടരുത്.”
യു.എ.പി.എ കേസുകളിൽ ആരോപണവിധേയർക്ക് ജാമ്യം ലഭിക്കാതിരിക്കാനുള്ള പ്രധാന കാരണം ഈ വകുപ്പാണെന്നാണ് പൗരാവകാശ പ്രവർത്തകർ പറയുന്നത്. കുപ്രസിദ്ധമായ ഭീമ കൊറെഗാവ് കേസിൽ ആരോപണ വിധേയനായ പുരോഹിതൻ സ്റ്റാൻ സ്വാമി ഈ വകുപ്പിന് എതിരെ ബോംബൈ ഹൈക്കോടതിയിൽ ഹർജി നൽകിയിരുന്നു. പൗരൻമാരുടെ അവകാശം നിയമപരമായി പരിശോധിക്കാൻ കോടതികൾക്ക് അവസരം നൽകാത്ത ഈ വകുപ്പ് ജനാധിപത്യത്തിന് വെല്ലുവിളിയാണെന്നാണ് സ്വാമിയുടെ ഹർജി പറഞ്ഞിരുന്നത്. സ്റ്റാൻ സ്വാമിയുടെ കേസിൽ ബോംബൈ ഹൈക്കോടതി വാദം കേൾക്കുന്നതിന് മുമ്പ് തന്നെ അദ്ദേഹം ജയിലിൽ മരിച്ചുപോയി.
****
(*ആരോപണ വിധേയരുടെയും മാപ്പ് സാക്ഷിയുടെയും പേര് വിവരങ്ങൾ ഒഴിവാക്കിയിട്ടുണ്ട്.)
