ആലപ്പുഴ > ജില്ലയില് പക്ഷിപ്പനി സ്ഥിരീകരിച്ച സാഹചര്യത്തില് രോഗവ്യാപനം തടയാൻ നടപടികള് ഊര്ജിതമാക്കി ജില്ലാ ഭരണകേന്ദ്രം. രോഗബാധ സ്ഥിരീകരിച്ച മേഖലകളില് താറാവ്, കോഴി, കാട, വളര്ത്തുപക്ഷികള് ഇവയുടെ മുട്ട, ഇറച്ചി, കാഷ്ടം (വളം) എന്നിവയുടെ ഉപയോഗവും വിപണനവും നിരോധിച്ച് കലക്ടര് ഉത്തരവിട്ടു. ചമ്പക്കുളം, നെടുമുടി, മുട്ടാര്, വീയപുരം, കരുവാറ്റ, തൃക്കുന്നപ്പുഴ, തകഴി, പുറക്കാട്, അമ്പലപ്പുഴ തെക്ക്, അമ്പലപ്പുഴ വടക്ക്, എടത്വാ പഞ്ചായത്തുകളിലും ഹരിപ്പാട് നഗരസഭാ മേഖലയിലുമാണ് ഈ നിയന്ത്രണം.
തകഴി പഞ്ചായത്ത് 10–-ാം വാര്ഡില് ഒരു കിലോമീറ്റര് ചുറ്റളവിലുള്ള പ്രദേശത്തെ പക്ഷികളെ കൊന്ന് സുരക്ഷിതമായി മറവുചെയ്യുന്നതിനുള്ള നടപടികള് അടിയന്തരമായി പൂര്ത്തീകരിക്കും. ഈ വാര്ഡില് പക്ഷിപ്പനി സ്ഥിരീകരിച്ച പ്രദേശത്തെ കണ്ടെയ്ന്മെന്റ് സോണായി പ്രഖ്യാപിച്ചു. ഇവിടേക്കും ഇവിടെനിന്ന് പുറത്തേക്കും ആളുകളുടെയും വാഹനങ്ങളുടെയും സഞ്ചാരം നിരോധിച്ചിട്ടുണ്ട്.
റാപ്പിഡ് റെസ്പോണ്സ് ടീമുകളുടെ സേവനം ഉറപ്പാക്കിയാണ് മൃഗസംരക്ഷണ വകുപ്പ് പക്ഷികളെ മറവുചെയ്യുക. രോഗം സ്ഥിരീകരിച്ച മേഖലകളില് ആര്ആര്ടികളെ നിയോഗിച്ച് ജനങ്ങള്ക്ക് പ്രതിരോധ മരുന്നുകള് വിതരണം ചെയ്യും.
ദേശാടനപ്പക്ഷികള്ക്ക് രോഗം ബാധിച്ചിട്ടുണ്ടോയെന്ന് നിരീക്ഷിക്കുന്നതിനും ഇവിടെ പരിശോധിക്കുന്നതിനും അസിസ്റ്റന്റ് ഫോറസ്റ്റ് കണ്സര്വേറ്ററെ ചുമതലപ്പെടുത്തി. പക്ഷിപ്പനി പ്രതിരോധ പ്രവര്ത്തനങ്ങളുടെ ദൈനംദിന റിപ്പോര്ട്ട് സമര്പ്പിക്കാൻ മൃഗസംരക്ഷണ വകുപ്പിന് കലക്ടര് നിര്ദേശം നല്കി. കലക്ടര് എ അലക്സാണ്ടറുടെ അധ്യക്ഷതയില് അടിയന്തര യോഗത്തില് ഡെപ്യൂട്ടി കലക്ടര് ആശ സി എബ്രഹാം, ജില്ലാ സര്വൈലന്സ് ഓഫീസര് ദീപ്തി, ജില്ലാ മൃഗസംരക്ഷണ വകുപ്പ് ഓഫീസര് എ ജി ജിയോ, അമ്പലപ്പുഴ തഹസില്ദാര് പ്രീത പ്രതാപന്, പുറക്കാട് പഞ്ചായത്ത് പ്രസിഡന്റ് എ എസ് സുദര്ശനന്, ചീഫ് വെറ്ററിനറി ഓഫീസര് എസ് ജെ ലേഖ, ഡോ.എല് ജെ കൃഷ്ണ കിഷോര് തുടങ്ങിയവര് പങ്കെടുത്തു.
