142 അടി വെള്ളം എത്തുന്നതിനു മുമ്പ് ഇത്തരത്തിൽ ഡാം തുറന്നു വിടുന്നത് അനുവദിക്കാനാവില്ല. കേരള സർക്കാർ ഇത് ഗൗരവത്തോടെയാണ് കാണുന്നത്. വിഷയത്തിൽ തീവ്രമായ മുന്നറിയിപ്പ് തമിഴ്നാടിന് നൽകുമെന്നും മന്ത്രി വ്യക്തമാക്കി.
ഷട്ടറുകൾ മുന്നറിയിപ്പില്ലാതെ തുറന്നതുമായി ബന്ധപ്പെട്ട് റോഷി അഗസ്റ്റിൻ നടത്തിയ അഭിപ്രായ പ്രകടനം ദയനീയ കീഴടങ്ങലാണെന്ന് എൻ കെ പ്രേമചന്ദ്രൻ എംപി പറഞ്ഞു. മുല്ലപ്പെരിയാ‍‍ര്‍ വിഷയത്തിൽ സര്‍ക്കാര്‍ കൈമലര്‍ത്തുന്നത് തമിഴ്നാടുമായി രഹസ്യ ധാരണ ഉള്ളതുകൊണ്ടാണെന്നും അദ്ദേഹം ആരോപിച്ചു.
മുന്നറിയിപ്പില്ലാതെ രാത്രി ഷട്ടറുകൾ തുറന്നതിനെത്തുട‍ര്‍ന്ന് പെരിയാറിന്റെ തീരത്തെ വീടുകളിൽ രാത്രി വെള്ളം കയറി. കുറുപ്പുപാലം, ഇഞ്ചിക്കാട്, ആറ്റോരം, വികാസ് നഗ‍ര്‍, വള്ളക്കടവ് അടക്കമുള്ള പ്രദേശങ്ങളിലാണ് വെള്ളപ്പൊക്കം ഉണ്ടായത്. വള്ളക്കടവിലെത്തിയ മന്ത്രി റോഷി അഗസ്റ്റിനെതിരെ നാട്ടുകാ‍ര്‍ പ്രതിഷേധിച്ചു. റവന്യൂ ഉദ്യോഗസ്ഥ‍ര്‍ക്കെതിരെയും പോലീസിനു നേരെയും പ്രതിഷേധം ഉണ്ടായി.
പാതിരാത്രി മുന്നറിയിപ്പില്ലാതെ ഡാം തുറക്കുന്ന തമിഴ്നാടിനെതിരെ രൂക്ഷ വിമ‍ര്‍ശനവുമായി ഉടുമ്പൻചോല എംഎൽഎയും മുൻ മന്ത്രിയുമായ എം എം മണി രംഗത്തെത്തിയിരുന്നു. തമിഴ്നാടിന്റേത് ശുദ്ധ മര്യാദകേടാണെന്ന് അദ്ദേഹം പറഞ്ഞു.
ഡാമിലെ ജലനിരപ്പ് കുറഞ്ഞതോടെ നിലവിൽ ഒമ്പതിൽ എട്ട് ഷട്ടറുകളും അടച്ചിട്ടുണ്ട്. നിലവിൽ തുറന്നിരിക്കുന്ന ഷട്ടറിലൂടെ 142 ഘനയടി വെള്ളമാണ് പുറത്തേക്ക് ഒഴുക്കുന്നത്. തമിഴ്നാട് കൊണ്ടുപോകുന്ന വെള്ളത്തിന്റെ അളവ് 900 ഘന അടിയായി കുറച്ചിട്ടുണ്ട്.
