ആര്യനാട് ഗവൺമെൻ്റ് ഐടിഐ വിദ്യാര്‍ഥിയാണ് എസ് ബിനു, കെപി അനിത ദമ്പതികളുടെ മകനായ അമ്പാടി. വീടിനു മുൻപിൽ നിൽക്കുമ്പോഴായിരുന്നു കുട്ടിയുടെ ശരീരത്തിൽ ഇടിമിന്നലേറ്റെതന്നാണ് ഏഷ്യാനെറ്റ് ന്യൂസ് റിപ്പോര്‍ട്ടിൽ പറയുന്നത്. വലതുകാലിൽ മുട്ടിനു താഴെയുള്ള ഭാഗത്താണ് പരിക്കേറ്റത്. വെടിയേറ്റതു പോലെ കാലിൽ ദ്വാരം വീഴുകയും ഈ മുറിവിനു ചുറ്റുമായി പൊള്ളലേൽക്കുകയുമായിരുന്നു. തുടര്‍ന്ന് ഉടൻ തന്നെ ആശുപത്രിയിലെത്തിക്കുകയായിരുന്നു.
Also Read:
മെഡിക്കൽ കോളേജ് ആശുപത്രിയിലെത്തിച്ച് ചികിത്സ നല്‍കിയതിനു ശേഷം അമ്പാടിയെ വിതുര ആശുപത്രിയിലേയ്ക്ക് മാറ്റി. അതേസമയം, ഇടിമിന്നലേറ്റ് ഇത്തരത്തിൽ പരിക്കേൽക്കുന്നത് അപൂര്‍വസംഭവമാണെന്നാണ് ഈ രംഗത്തെ വിദഗ്ധര്‍ പറയുന്നത്. സംഭവത്തെക്കുറിച്ച് അന്വേഷിക്കുമെന്ന് സംസ്ഥാന ദുരന്ത നിവാരണ വകുപ്പ് അധിക‍തര്‍ വ്യക്തമാക്കി.
Also Read:
കഴിഞ്ഞ ഏതാനും ദിവസമായി തിരുവനന്തപുരം ഉള്‍പ്പെടെയുള്ള തെക്കൻ ജില്ലകളിൽ കനത്ത മഴ തുടരുകയാണ്. മഴ തുടരുന്ന സാഹചര്യത്തിൽ ഇന്നലെ തിരുവനന്തപുരം, കൊല്ലം ജില്ലകളിൽ കളക്ടര്‍മാര്‍ വിദ്യാഭ്യാസ സ്ഥാപനങ്ങള്‍ക്ക് അവധി പ്രഖ്യാപിച്ചിരുന്നു. പ്രൊഫഷണൽ കോളേജുകള്‍ ഉള്‍പ്പെടെ മുഴുവൻ സ്ഥാപനങ്ങളും ശനിയാഴ്ച അടഞ്ഞു കിടന്നു. എന്നാൽ ഇന്ന് തിരുവനന്തപുരം, കൊല്ലം ജില്ലകളിൽ ഗ്രീൻ അലേര്‍ട്ട് മാത്രമാണ് നിലവിലുള്ളത്. മറ്റു 12 ജില്ലകളിലും ഇന്ന് യെല്ലോ അലേര്‍ട്ട് നിലവിലുണ്ട്.
ഉച്ചയ്ക്ക് 2 മണി മുതൽ രാത്രി പത്ത് മണി വരെയുള്ള സമയത്താണ് ഇടിമിന്നലിന് ഏറ്റവുമധികം സാധ്യതയുള്ളതെന്നാണ് കേരള ദുരന്ത നിവാരണ അതോരിറ്റി പറയുന്നത്. ഇടിമിന്നൽ മുന്നറിയിപ്പുള്ള ദിവസങ്ങളിൽ കാര്‍മേഘം കണ്ടു തുടങ്ങുമ്പോള്‍ തന്നെ മുൻകരുതൽ നടപടികള്‍ സ്വീകരിക്കണം. ഇടിമിന്നൽ ദൃശ്യമല്ല എന്ന കാരണം കൊണ്ട് മുൻകരുതൽ സ്വീകരിക്കാതിരിക്കരുത്. ഇടിമിന്നലിൻ്റെ ലക്ഷണങ്ങളുണ്ടെങ്കിൽ സുരക്ഷിതമായ കെട്ടിടത്തിനുള്ളിലേയ്ക്ക് മാറണം. തുറസ്സായ സ്ഥലങ്ങളിൽ നിൽക്കുന്നത് അപകടസാധ്യത വര്‍ധിപ്പിക്കും. വീടുകളുടെ ജനലുകളും വാതിലുകളും അടച്ചിടണം. ജനലുകളുടെയും വാതിലുകളുടെയും സമീപത്ത് നിൽക്കുകയും ചെയ്യരുത്. ഭിത്തിയിലും തറയിലും സ്പര്‍ശിക്കുന്നതും ഒഴിവാക്കണം.
ഗൃഹോപകരണങ്ങള്‍ പ്രവര്‍ത്തിപ്പിക്കുന്നതും സമീപത്തു സൂക്ഷിക്കുന്നതും മിന്നൽ സമയത്ത് ഒഴിവാക്കണം. ടെലിഫോൺ ഉപയോഗിക്കുന്നതും ഒഴിവാക്കണം. എന്നാൽ മൊബൈൽ ഫോൺ ഉപയോഗിക്കുന്നതിൽ പ്രശ്നമില്ല. ഉച്ചയ്ക്ക് രണ്ട് മണിയ്ക്ക് ശേഷം അന്തരീക്ഷം മേഘാവൃതമെങ്കിൽ തുറസ്സായ സ്ഥലത്തും ടെറസിലും കുട്ടികള്‍ കളിക്കുന്നതും ഒഴിവാക്കണം. പട്ടം പറത്തുന്നതും അപകടകരമാണ്. മിന്നലുള്ള സമയത്ത് മരച്ചുവട്ടിൽ നിൽക്കുന്നതും മരങ്ങളുടെ കീഴിൽ വാഹനങ്ങൾ പാർക്ക് ചെയ്യുന്നതും ഒഴിവാക്കണം.
