മുസ്ലിം മതസ്ഥർ നടത്തുന്ന ഹോട്ടലുകളിൽ മാത്രമാണ് ഹലാൽ ബോർഡ് വെയ്ക്കുന്നത്. ഹലാൽ ബോർഡ് വെയ്ക്കാതെ പ്രവർത്തിക്കുന്ന നിരവധി ഹോട്ടലുകൾ നമ്മുടെ നാട്ടിലുണ്ട്. ഹലാൽ ബോർഡ് വെച്ച ഒരിടത്തും തുപ്പിയ ഭക്ഷണമല്ല വിളമ്പുന്നത്. മുസ്ലിങ്ങൾ നടത്തുന്ന ഹോട്ടലുകളിൽ ജോലി ചെയ്യുന്ന ധാരാളം ഇതര മതസ്ഥർ നമ്മുടെ നാട്ടിലുണ്ട്. അവരോട് ചോദിച്ചാൽ സത്യാവസ്ഥ അറിയാനാകും- കാന്തപുരം പറഞ്ഞു.
“ഹലാൽ എന്നാൽ കഴിക്കാൻ പറ്റുന്നത് എന്നാണ്. അതുകൊണ്ട് വേറെ ദോഷമില്ല എന്നാണ് ഉദ്ദേശിക്കുന്നത്.” എന്നാണ് മുഖ്യമന്ത്രി പിണറായി വിജയൻ വിഷയത്തിൽ പ്രതികരിച്ചത്. ഒരു വിഭാഗത്തെ അടച്ചാക്ഷേപിക്കാനുള്ള ഒരുപാട് ആരോപണങ്ങൾ ഉയർന്നിട്ടുണ്ട്. വല്ലാത്ത ചേരിതിരിവ് സൃഷ്ടിക്കാനാണ് സംഘപരിവാർ ശ്രമിക്കുന്നത്. അത് രാജ്യവ്യാപകമായിട്ടുണ്ട്. കേരളത്തിലും ചില നടപടികൾ കാണാൻ സാധിക്കും- മുഖ്യമന്ത്രി പറഞ്ഞു.
മുഖ്യമന്ത്രിയുടെ പ്രതികരണത്തിനു പിന്നാലെ രൂക്ഷ പ്രതികരണവുമായി ബിജെപി സംസ്ഥാന അധ്യക്ഷൻ കെ സുരേന്ദ്രൻ രംഗത്തെത്തിയിരുന്നു. അടുത്തയിടെ മുഖ്യമന്ത്രിക്ക് ഹലാൽ ഭക്ഷണമാണ് ലഭിക്കുന്നത്. അതുകൊണ്ടാണ് പിണറായി വിജയൻ ഹലാലിനെ ന്യായീകരിച്ച് രംഗത്തെത്തിയതെന്ന് സുരേന്ദ്രൻ പറഞ്ഞു.
പോപ്പുലർ ഫ്രണ്ടിന്റെ അജണ്ടയായ ഹലാലിനെ ന്യായീകരിക്കുന്ന മുഖ്യമന്ത്രിയാണ് ഇവിടെയുള്ളത്. ഹലാൽ ഭക്ഷണം നല്ലതെന്നു പറയുന്ന മുഖ്യമന്ത്രി തീവ്രവാദത്തിനു പിന്തുണ നൽകുകയാണെന്ന് സുരേന്ദ്രൻ പറഞ്ഞു. ഹലാൽ ഭക്ഷണം നല്ലതെങ്കിൽ ബാക്കിയെല്ലാം മോശം ഭക്ഷണമാണോയെന്ന് മുഖ്യമന്ത്രി വ്യക്തമാക്കണമെന്നും സുരേന്ദ്രൻ ആവശ്യപ്പെട്ടു.
