തലശേരി ഇന്ദിരാഗാന്ധി സഹകരണ ആശുപത്രിയുടെ ചെയർമാനും കോൺഗ്രസ് നേതാവുമായ മമ്പറം ദിവാകരനെ പാർട്ടി അച്ചടക്കത്തിന്റെ പേരിലാണ് പുറത്താക്കിയത്. കെപിസിസി ജനറൽ സെക്രട്ടറി ടിയു രാധാകൃഷ്ണനാണ് ഇക്കാര്യം അറിയിച്ചത്.
ഇന്ദിരാഗാന്ധി സഹകരണ ആശുപത്രി തെരഞ്ഞെടുപ്പിൽ പാർട്ടി പാനലിനെതിരെ മത്സരിക്കുന്നതിനെത്തുടർന്നാണ് നടപടി. കണ്ണൂർ ഡിസിസി അംഗീകരിച്ച പാനലിനെതിരെ ബദൽ പാനൽ രൂപീകരിച്ച് മത്സരിക്കുകയാണ് നിലവിലെ പ്രസിഡന്റുകൂടിയായ മമ്പറം ദിവാകരൻ. ഇതേത്തുടർന്നാണ് ദിവാകരനെ കോൺഗ്രസിൽ നിന്നു പുറത്താക്കുന്നതെന്ന് ടിയു രാധാകൃഷ്ണൻ പറഞ്ഞു.
കെപിസിസി പ്രസിഡന്റ് കെ സുധാകരനും മമ്പറം ദിവാകരനും പ്രസ്താവനകളിലൂടെ നേരത്തെ ഏറ്റുമുട്ടിയിട്ടുണ്ട്. കെപിസിസി അധ്യക്ഷ പദവി ഏറ്റെടുത്തയുടനെ ദിവാകരനെതിരെ സുധാകരൻ നടത്തിയ പ്രസ്താവന വിവാദമായിരുന്നു. മമ്പറം ദിവാകരൻ പാർട്ടിക്ക് അകത്തുമല്ല പുറത്തുമല്ല എന്ന അവസ്ഥയിലാണ്. പാർട്ടിക്ക് അകത്താണെങ്കിൽ ചർച്ചചെയ്യുമെന്നാണ് സുധാകരൻ പറഞ്ഞത്.
ബ്രണ്ണൻ കോളേജ് വിവാദവുമായി ബന്ധപ്പെട്ട് മമ്പറം നടത്തിയ പ്രസ്താവനയെക്കുറിച്ചുള്ള ചോദ്യത്തിനാണ് സുധാകരൻ മറുപടി പറഞ്ഞത്. ബ്രണ്ണൻ കോളേജിൽ പഠിക്കുമ്പോൾ സുധാകരൻ പിണറായിയെ ചവിട്ടി വീഴ്ത്തിയെന്ന തരത്തിൽ ഒരു സംഭവം തന്റെ അറിവിലില്ല. താൻ അങ്ങനെയൊരു സംഭവം കേട്ടിട്ടില്ല എന്നായിരുന്നു മമ്പറം പറഞ്ഞത്.
