തക്കാളിയും ബിരിയാണിയും തമ്മിൽ ബാർട്ടർ ഡീലാണ് സാമുവേൽ രാജ് ഒരുക്കിയിരിക്കുന്നത്. ഒരു കിലോഗ്രാം തക്കാളിയുമായി കടയിൽ വന്നാൽ നിങ്ങൾക്ക് ഒരു കിലോ ബിരിയാണിയുമായി തിരികെ പോകാം എന്നാണ് ഓഫർ. എന്നാൽ അത് മാത്രമല്ല കച്ചവടം കൂട്ടാൻ സാമുവലിന്റെ പൊടിക്കൈ. ഒരു കിലോ ബിരിയാണി വാങ്ങുന്നവർക്ക് അര കിലോ തക്കാളി സൗജന്യമായി വീട്ടിൽ കൊണ്ടുപോവാം. എങ്ങനെയുണ്ട് മാർക്കറ്റിങ്?
ബുധനാഴ്ച വൈകുന്നേരം സോഷ്യൽ മീഡിയയിൽ ഓഫർ പോസ്റ്റ് ചെയ്ത ശേഷം വ്യാഴം, വെള്ളി ദിവസങ്ങളിൽ നിരവധിപേർ തന്റെ ബിരിയാണിക്കട സന്ദർശിച്ചു എന്ന് സാമുവേൽ സാക്ഷ്യപ്പെടുത്തുന്നു. മാത്രമല്ല തുരുതുരാ ഫോൺ കോളുകളുമുണ്ടായിരുന്നു. പക്ഷെ തക്കാളിയുംകൊണ്ട് ആരും ബാർട്ടർ വില്പനയ്ക്ക് വന്നില്ല എന്നതാണ് രസകരമായ കാര്യം. “കടയിൽ ആരും തക്കാളി കൊണ്ടുവന്നില്ല. പക്ഷെ ബിരിയാണിക്ക് നല്ല ഡിമാൻഡ് ഉണ്ടായിരുന്നു, ഞാൻ ഉണ്ടാക്കിയ 80 ബിരിയാണികൾ കനത്ത മഴയ്ക്കിടയിലും ചൂടപ്പം പോലെ വിറ്റു, ”സാമുവേൽ പറഞ്ഞു.
