‘കാര്‍ ഓടിക്കാത്ത’ ആദിവാസി യുവാവ് പോലീസിന് കാര്‍മോഷ്ടാവ്; കള്ളക്കേസെന്ന് കുടുംബം

വയനാട് ജില്ലയിലെ ആദിവാസി യുവാവിനെ പോലീസ് കള്ളക്കേസില്‍ കുടുക്കിയെന്ന പരാതിയില്‍ സംസ്ഥാന മനുഷ്യാവകാശ കമ്മീഷന്‍ ഇടപ്പെട്ടു. ഒരാഴ്ചക്കുള്ളില്‍ കൃത്യമായ അന്വേഷണം നടത്തുകയും റിപ്പോര്‍ട്ട് സമര്‍പ്പിക്കണമെന്നുമാണ് ജില്ലാ പോലീസ് മേധാവിക്ക് നല്‍കിയിരിക്കുന്ന നിര്‍ദേശം.

വയനാട് മീനങ്ങാടിയിലെ അപ്പാട് അത്തിക്കടവ് പണിയ കോളനിയിലെ 22 വയസ്സുകാരനായ ദീപുവിനെയാണ് കാര്‍ മോഷ്ടിച്ചെന്ന് ആരോപിച്ച് പോലീസ് അറസ്റ്റ് ചെയ്തത്. നിലവില്‍ മാനന്തവാടി ജില്ലാ ജയിലില്‍ റിമാൻഡിലാണ് ദീപു.

ദീപുവിന് എന്താണ് സംഭവിച്ചത്?

ദീപുവിന്‍റെ ഭാഗത്ത് ഒരു തെറ്റുമില്ലെന്നും പോലീസ് കള്ളക്കേസില്‍ ഉള്‍പ്പെടുത്തിയതാണെന്നുമാണ് ആദിവാസി വുമണ്‍സ് മൂവ്‌മെന്‍റ് പ്രവര്‍ത്തകയായ അമ്മിണി കെ വയനാട് പറയുന്നത്.

“നവംബര്‍ മൂന്നിന് കല്ലൂരിലെ തിരുവണ്ണൂര്‍ കോളനിയിലുള്ള ഭാര്യവീട്ടില്‍ പോയ ദീപു നവംബര്‍ അഞ്ചിനാണ് തിരിച്ചു വരുന്നത്. മീനങ്ങാടിയിലുള്ള തന്‍റെ വീട്ടിലേക്ക് വരാന്‍ സുല്‍ത്താന്‍ ബത്തേരിയില്‍ എത്തിയപ്പോഴാണ് സംഭവം നടക്കുന്നത്. ഒരു കാറില്‍ ചാരി നില്‍ക്കുകയായിരുന്ന ദീപുവിനെ കാറിന്‍റെ ഉടമയും നാട്ടുകാരും ചേര്‍ന്ന് മര്‍ദ്ദിച്ച് പോലീസില്‍ ഏല്‍പ്പിക്കുകയാണ് ഉണ്ടായത്. മദ്യപിച്ചിരുന്ന ദീപു കാറ് മോഷ്ടിക്കാന്‍ ശ്രമിച്ചെന്നാണ് കാറിന്‍റെ ഉടമ പോലീസിനോട് പറഞ്ഞത്. തുടര്‍ന്ന് കോട്ടയം രജിസ്‌ട്രേഷനിലുള്ള കാറിന്‍റെ ഉടമ പോലീസില്‍ പരാതി നല്‍കുകയും പോലീസ് എഫ്.ഐ.ആര്‍ രജിസ്റ്റര്‍ ചെയ്യുകയും ചെയതു. പിന്നീട് ബത്തേരി പോലീസ് എസ്.ടി പ്രമോട്ടറായ ഷിജുവിനെ വിളിച്ച് ദീപുവിനെ അറസ്റ്റ് ചെയ്ത വിവരം അറിയിക്കുകയായിരുന്നു. എന്നാല്‍ മദ്യപിച്ച് പ്രശ്‌നമുണ്ടക്കിയതിനാണ് അറസ്റ്റ് ചെയ്തത് എന്നായിരുന്നു എസ്.ടി പ്രമോട്ടര്‍ വീട്ടുകാരെ അറിയിച്ചത്” — അമ്മിണി സമയം പ്ലസിനോട് പറഞ്ഞു.

നവംബര്‍ ആറിന് വീട്ടുകാര്‍ സ്റ്റേഷനിലെത്തി വിവരം അന്വേഷിച്ചപ്പോഴാണ് ബത്തേരിയില്‍ നിര്‍ത്തിയിട്ടിരുന്ന കാര്‍ തട്ടികൊണ്ടുപോയെന്നും അതുകൊണ്ട് കേസെടുത്തിട്ടുണ്ടെന്നും പോലീസ് പറഞ്ഞത്. എന്നാല്‍ വീട്ടുകാര്‍ പോലീസ് വാദത്തെ നിഷേധിക്കുകയാണ് ചെയ്തത്. ടൂ വീലര്‍ പോലും ഓടിക്കാന്‍ അറിയാത്ത ദീപു കാറ് ഓടിക്കുന്നത് എങ്ങനെയാണ് എന്നായിരുന്നു വീട്ടുകാര്‍ ചോദിച്ചത്. പക്ഷേ, 200 മീറ്ററോളം ദീപു കാര്‍ ഓടിച്ചെന്നും അത് കണ്ടതുകൊണ്ടാണ് ദീപുവിനെ അറസ്റ്റ് ചെയ്തത് എന്നുമാണ് പോലീസ് പറഞ്ഞത്. — അമ്മിണി കൂട്ടിച്ചേര്‍ത്തു.

ദീപുവിനെ കണ്ട് ഹൃദയം തകര്‍ന്ന് വീട്ടുകാര്‍

പോലീസ് സ്‌റ്റേഷനിലെത്തിയ വീട്ടുകാര്‍ മകനെ കള്ളക്കേസില്‍ കുടുക്കിയെന്ന് ആരോപിച്ച് ചോദ്യം ചെയ്തപ്പോള്‍ അവര്‍ക്ക് നേരെ ചില ഉദ്യോഗസ്ഥര്‍ ഭീഷണിയുടെ സ്വരം ഉയര്‍ത്തിയെന്നാണ് ആദിവാസി വുമണ്‍സ് മൂവ്‌മെന്‍റ് പ്രവര്‍ത്തകയായ അമ്മിണി ചൂണ്ടിക്കാണിക്കുന്നത്.

കള്ളനാണെന്ന് പറഞ്ഞ് പോലീസ് പിടിച്ചുകൊണ്ടുവരുകയാണ് ചെയ്തതെന്ന് ദീപു വീട്ടുകാരോട് പറഞ്ഞതായി ദീപുവിന്റെ ചെറിയമ്മയായ അമ്മിണി പറഞ്ഞു.

“രാത്രി ഭക്ഷണം പോലും നല്‍കിയില്ലെന്ന് ദീപു പറഞ്ഞു. മാത്രമല്ല ചുണ്ടില്‍ ചോര കണ്ടപ്പോള്‍ എന്താണ് ഉണ്ടായതെന്ന് ചോദിച്ചു. അപ്പോഴാണ് രാത്രി പോലീസ് തല്ലിയെന്നും മുഖത്തും ചെവിയിലുമെല്ലാം വേദനയുണ്ടെന്നും ദീപു ഭാര്യയോടും അമ്മയോടും പറയുന്നത്. ഞങ്ങള്‍ സ്റ്റേഷനില്‍ ചെല്ലുമ്പോള്‍ എഴുന്നേല്‍ക്കാന്‍ പോലും കഴിയാതെ അവശാന അവസ്ഥയിലായിരുന്നു ദീപു. വീട്ടുകാരോട് സംസാരിച്ച് നിന്ന ദീപുവിനെ പോലീസ് അകത്തേക്ക് കൂട്ടിക്കൊണ്ട് പോയി ഏതോ വാഹത്തിന്റെ താക്കോല്‍ കയ്യില്‍ കൊടുത്ത് ഫോട്ടോ എടുത്തു. തുടര്‍ന്ന് എന്തിനാണ് ഇങ്ങനെ ചെയ്യുന്നത്, അവന്‍ തെറ്റ് ചെയ്തിട്ടില്ലല്ലോ എന്ന് പറഞ്ഞപ്പോള്‍ ദീപു കുറ്റം സമ്മതിച്ചിട്ടുണ്ടെന്നാണ് പോലീസ് അറിയിച്ചത്. അതിന് പുറമെ മീനങ്ങാടി ഭാഗത്ത് പല വാഹനങ്ങളും മോഷണം പോയിട്ടുണ്ടെന്നും ആ കേസുകളിലെ പ്രതി ദീപുവാണെന്നും പറഞ്ഞ് വീട്ടുകാരുടെ മുന്നില്‍ വെച്ച് പോലീസ് മര്‍ദ്ദിച്ചു. വാഹനത്തിന്റെ ഉടമ ആരാണെന്ന് ചോദിച്ചിട്ട് പോലീസ് പറഞ്ഞില്ല.” — ദീപുവിന്‍റെ ചെറിയമ്മ വ്യക്തമാക്കി.

വിവരമറിയിച്ചതിനെ തുടര്‍ന്ന് കോളനിയിലെത്തിയ അമ്മിണി കെ വയനാടിനോട് കോളനി നിവാസികള്‍ ദീപുവിനെ മോചിപ്പിക്കണമെന്നാണ് ആവശ്യപ്പെട്ടത്. പണികഴിഞ്ഞ് വരുമ്പോള്‍ മദ്യപിക്കുന്ന ശീലം ഉണ്ടെങ്കിലും യുവാവ് ഒരിക്കലും മോഷണം നടത്തില്ലെന്നാണ് നാട്ടുകാര്‍ അമ്മിണിയെ അറിയിച്ചത്. കോളനിയില്‍ പലര്‍ക്കും ബൈക്കും സ്‌കൂട്ടിയുമെല്ലാം ഉണ്ടെങ്കിലും ഇന്നുവരെ ദീപു അത് ഉപയോഗിച്ചിട്ടില്ലെന്നും നാട്ടുകാര്‍ പറഞ്ഞു.

കാര്‍ മോഷ്ടിച്ചെന്ന കേസില്‍ അറസ്റ്റ് ചെയ്ത ദീപുവിനെതിരെ മറ്റൊരു കേസ് കൂടെ ചാര്‍ജ് ചെയ്‍തതായി അമ്മിണി പറയുന്നു. വീട് കുത്തിത്തുറന്ന് പണവും സ്വര്‍ണ്ണവും മോഷ്ടിച്ചെന്നാണ് ദീപുവിനെതിരെ ചുമത്തിയിരിക്കുന്ന പുതിയ കുറ്റം.

“പണവും സ്വര്‍ണ്ണവും മോഷണം പോയെന്ന് പറയുന്നത് സെപ്റ്റംബര്‍ രണ്ടിനാണ്. ഈ സമയത്ത് ദീപു വീട്ടില്‍ ഇല്ലായിരുന്നു. ഓണത്തിന് ഭാര്യ വീട്ടില്‍ പോയ ദീപു സെപ്റ്റംബര്‍ അഞ്ചാം തീയതി മെഗാ വാക്‌സിനേഷന്‍റെ സമയത്താണ് മീനങ്ങാടിയില്‍ എത്തുന്നത്. അതിന് ശേഷം തിരിച്ച് ഭാര്യവീട്ടിലേക്ക് പോവുകയും ചെയ്തു. പിന്നീട് പതിനെട്ടാം തീയതി കഴിഞ്ഞാണ് ദീപു മടങ്ങി എത്തുന്നത്. ദീപു നാട്ടിലില്ലാത്ത സമയത്താണ് മോഷണം നടന്നത് എന്ന് പറയപ്പെടുന്നതിനാല്‍ പോലീസിന് ദീപുവിന്‍റെ മേല്‍ കുറ്റം ചുമത്താന്‍ അന്ന് കഴിഞ്ഞിരുന്നില്ല. എന്നാല്‍ ദീപുവിന്‍റെ പേരില്‍ കുറ്റം ചാര്‍ത്തി കോടതിയില്‍ സമര്‍പ്പിച്ചിരുന്നു. ഇപ്പോള്‍ റിമാന്‍ഡില്‍ കഴിയുന്ന ദീപുവിന്റെ ജാമ്യത്തിനായി വക്കീല്‍ അപേക്ഷ സമര്‍പ്പിച്ചെങ്കിലും നവംബര്‍ 11ന് ജാമ്യപേക്ഷ കോടതി തള്ളുകയാണ് ചെയ്തത്. എന്നാല്‍ ഇതൊരു പിടിവള്ളിയാക്കുകയാണ് പോലീസ് ചെയ്തത്. സെപ്റ്റംബര്‍ മാസത്തില്‍ നടന്ന മോഷണത്തിന്റെ എഫ്.ഐ.ആര്‍ രജിസ്റ്റര്‍ ചെയ്തു. അതായത്, രണ്ട് തീയതികളിലായിട്ടാണ് കേസ് രജിസ്റ്റര്‍ ചെയ്ട്ടുള്ളത്. കോടതിയില്‍ മോഷണം നടന്നതായി പറയുന്നതും കേസ് രജിസ്റ്റര്‍ ചെയ്തതും സെപ്റ്റംബര്‍ രണ്ട് എന്ന തീയതിയിലാണ്. എന്നാല്‍ മീനങ്ങാടി സ്റ്റേഷനിലാകട്ടെ കേസ് രജിസ്റ്റര്‍ ചെയ്തിരിക്കുന്നത് നവംബര്‍ രണ്ട് എന്ന തീയതിയാലാണ്. ഇതിന് പുറമെ ഒക്ടോബര്‍ 30ന് ഒരു വാഹനം മോഷ്ടിച്ചെന്ന് ആരോപിച്ച് മറ്റൊരു എഫ്.ഐ.ആറും രജിസ്റ്റര്‍ ചെയ്തിട്ടുണ്ട്” — ആദിവാസി പ്രവര്‍ത്തകയായ അമ്മിണി പറഞ്ഞു.

കള്ളക്കേസ്: ഉറച്ച് നില്‍ക്കുമെന്ന് അമ്മിണി

വാഹനം ഓടിക്കാന്‍ അറിയാത്ത ഒരാളുടെ പേരില്‍ മോഷണ കുറ്റം നിലനില്‍ക്കില്ലെന്ന് അറിയാവുന്നതുകൊണ്ടാണ് തന്ത്രപരമായി പോലീസ് നീങ്ങിയത്. അങ്ങനെയാണ് ജാമ്യമില്ലാ വകുപ്പ് ചേര്‍ത്ത് ദീപുവിനെ കുടുക്കിയത്. മാത്രമല്ല, മോഷണം നടന്നുവെന്ന് പറയുന്ന വീട്ടില്‍ രണ്ട് തവണയാണ് പോലീസ് ദീപുവിനെ കൊണ്ടു പോയത്. ഒന്ന് ദീപുവിനെ അറസ്റ്റ് ചെയ്തതിന്റെ പിറ്റേ ദിവസം. അതായത് നവംബര്‍ ആറാം തീയതി. മറ്റൊന്ന് നവംബര്‍ 12ാം തീയതി. എന്നാല്‍ രണ്ടാം തവണയാണ് വിരലടയാള വിദഗ്ദര്‍ വന്ന് ദീപുവിന്റെ വിരലടയാളങ്ങള്‍ വീട്ടില്‍ നിന്ന് ശേഖരിച്ചത്. എന്തുകൊണ്ടാണ് ആദ്യ ദിവസം പരിശോധന നടത്താതിരുന്നത്. തീര്‍ച്ചയായും ദീപുവിനെ കള്ളനാക്കി പോലീസിന്റെ പ്രതിഛായ രക്ഷിക്കാനാണ് അവര്‍ ശ്രമിക്കുന്നത് — അമ്മിണി ആരോപിക്കുന്നു.

മറ്റൊരു കാര്യം, മോഷണം പോയെന്ന് പറയുന്ന ഈ രണ്ട് കേസുകളിലും പരാതിക്കാരന്‍ ഇല്ല എന്നുള്ളതാണ്. മോഷണം പോയ വീടിന്‍റെ പരിസരത്തുള്ള ആരും ഈ സംഭവം അറിഞ്ഞിട്ടില്ലെന്നാണ് പറയുന്നത്. അന്വേഷണം നടത്തിയതിന് തെളിവിനായി പരിസരവാസികളുടെ ഒപ്പ് ശേഖരിക്കാന്‍ പോലീസ് ശ്രമിച്ചെങ്കിലും ആരും അതിന് തയ്യാറായില്ല.

സമരം വേണ്ട, പിന്മാറാന്‍ ആവശ്യപ്പെട്ട് പോലീസ്

ദീപുവിന് നീതി ലഭിക്കണമെന്ന് ആവശ്യപ്പെട്ട് 15-ാം തീയതി കല്‍പ്പറ്റ കളക്ട്രേറ്റിന് മുന്നില്‍ സമരത്തിനിരിക്കുന്നുണ്ട് അറിഞ്ഞപ്പോള്‍ പോലീസ് തന്നെ വിളിച്ചിരുന്നെന്നും പിന്മാറണമെന്ന് ആവശ്യപ്പെട്ടെന്നും അമ്മിണി ചൂണ്ടിക്കാട്ടി. തങ്ങള്‍ക്ക് തെറ്റ് പറ്റിയെന്നും നീതി ഉറപ്പാക്കുമെന്നും പോലീസ് പറഞ്ഞതായും അമ്മിണി സമയം പ്ലസിനോട് വെളിപ്പെടുത്തി. താന്‍ വഴങ്ങില്ലെന്ന് കണ്ടതോടെ ദീപുവിന്‍റെ ഭാര്യയുടെ ബന്ധുവായ ബാലനേയും പോലീസ് സമീപിച്ചിരുന്നു. സമരവുമായി മുന്നോട്ട് പോകുന്നത് പോലീസിന് മാനക്കേടാണെന്ന് അറിയിച്ചതായും അവര്‍ പറഞ്ഞു.

കൂടാതെ കോളനി നിവാസികളെയും കണ്ട് സമരത്തില്‍ നിന്ന് പിന്മാറണമെന്ന് അവശ്യപ്പെട്ടിരുന്നു. ഒരു വണ്ടി നിറയെ പോലീസുകാര്‍ എത്തിയെന്നാണ് ദീപുവിന്‍റെ ചെറിയമ്മ പറഞ്ഞത്.

പോലീസിന് പറയാനുള്ളത്

ദീപുവിന്റെ പേരില്‍ മൂന്ന് കേസുകളാണ് ഉള്ളതെന്നും പോലീസിന് വീഴ്ച സംഭവിച്ചിട്ടില്ല എന്നുമാണ് സുല്‍ത്താന്‍ ബത്തേരി സ്‌റ്റേഷനിലെ സി.ഐ ബെന്നി സമയം പ്ലസിനോട് അഭിപ്രായപ്പെട്ടത്. സെപ്റ്റംബറില്‍ നടന്ന കേസുമായി ബന്ധപ്പെട്ട് അന്വേഷണം നടത്തിയിരുന്നെന്നും പ്രതിയായ ദീപുവിനെ കിട്ടിയിരുന്നില്ലെന്നും അദ്ദേഹം പറഞ്ഞു. ഇപ്പോള്‍ കാര്‍ മോഷണവുമായി ബന്ധപ്പെട്ട് ദീപുവിനെ അറസ്റ്റ് ചെയ്തപ്പോഴാണ് ബാക്കി കേസുകള്‍ കൂടി അന്വേഷിക്കാനൊരുങ്ങുന്നതെന്നും പോലീസ് വാദിക്കുന്നു.

****