പാൽ കറക്കാൻ സമ്മതിക്കുന്നില്ല! എരുമക്കെതിരെ പോലീസിൽ പരാതിയുമായി കർഷകൻ

പാലിനായി തീറ്റിപോറ്റുന്ന എരുമ പാൽ തന്നില്ലെങ്കിൽ പിന്നെ എന്ത് ചെയ്യും? മധ്യപ്രദേശിലെ ഭിൻഡ് ജില്ലയിലെ കർഷകന് മറ്റു വഴികൾ ഒന്ന് തന്നെയുണ്ടായിരുന്നില്ല. നേരെ എരുമയുമായി എത്തിയത് പോലീസ് സ്റ്റേഷനിൽ. എന്തുകൊണ്ട് എരുമ പാൽ തരുന്നില്ല എന്ന് അന്വേഷിക്കണം എന്നാണ് ആവശ്യം. ആരെങ്കിലും തന്റെ എരുമക്കെതിരെ കൂടോത്രം ചെയ്തിട്ടുണ്ടോ എന്ന് സംശയിക്കുന്നതിനാൽ അന്വേഷണം നടത്തണം എന്നാണ് ക്ഷീരകർഷകന്റെ ആവശ്യം.

ബാബുലാൽ ജാതവ് എന്ന 45 കാരനായ കർഷകനാണ് ഇക്കഴിഞ്ഞ ശനിയാഴ്ച നയാഗാവ് പോലീസ് സ്റ്റേഷനിൽ പരാതി നൽകിയതെന്ന് പിടിഐ റിപ്പോർട്ട് ചെയ്യുന്നു. കഴിഞ്ഞ കുറച്ച് ദിവസങ്ങളായി സ്വന്തം എരുമ പാൽ കറക്കാൻ ബാബുലാൽ ജാതവിനെ സമ്മതിക്കുന്നില്ല എന്നതാണ് പരാതി എന്ന് ഡെപ്യൂട്ടി പോലീസ് സൂപ്രണ്ട് അരവിന്ദ് ഷാ വാർത്താ ഏജൻസിയോട് പറഞ്ഞു.

തന്റെ എരുമ മന്ത്രവാദത്തിന്റെ സ്വാധീനത്തിലാണെന്ന് നാട്ടുകാർ സംശയം പ്രകടിപ്പിച്ചതോടെയാണ് ബാബുലാൽ ജാതവ് എരുമയുമായി പോലീസ് സ്റ്റേഷനിലെത്തിയത്. പോലീസുകാർ തിരിച്ചയച്ചെങ്കിലും നാല് മണിക്കൂറിനുള്ളിൽ കർഷകനും എരുമയും വീണ്ടും പോലീസ് സ്റ്റേഷനിൽ എത്തി. എരുമയെ കറക്കാൻ സഹായിക്കണം എന്നാണ് ആവശ്യം.

തങ്ങൾ ഇക്കാര്യത്തിൽ നിസ്സഹായരാണെന്നും ഒരു മൃഗഡോക്ടരെ കാണിക്കുന്നതാണ് ഉചിതം എന്നും പോലീസുകാർ കർഷകനെ ഉപദേശിച്ചു. ഒടുവിൽ മൃഗഡോക്ടറെ കാണുകയും പ്രശ്നം പരിഹരിക്കുകയും ചെയ്തതോടെ എരുമ വീണ്ടും പാൽ ചുരത്താൻ ആരംഭിച്ചു. ഇതേതുടർന്ന് കർഷകൻ വീണ്ടും പോലീസ് സ്റ്റേഷനിൽ വരികയും എരുമ പാൽ ചുരത്താൻ തുടങ്ങിയ കാര്യം പൊലീസുകാരെ അറിയിക്കുകയും ചെയ്തു.

നയാഗോവ് ഗ്രാമത്തിലെ കർഷകൻ പോലീസിൽ നിന്ന് സഹായം തേടുന്ന വീഡിയോ ശനിയാഴ്ച സോഷ്യൽ മീഡിയയിൽ എത്തി നിമിഷങ്ങൾക്കുള്ളിൽ വൈറലായിരുന്നു.