‘ജി സുധാകരനുമായി താരതമ്യം ചെയ്യരുത്, അദ്ദേഹം മഹാനായ നേതാവ്’; എച്ച് സലാം എംഎൽഎ

ആലപ്പുഴ: നിയമസഭാ തെരഞ്ഞെടുപ്പിന് പിന്നാലെ രൂക്ഷമായ തർക്കം തുടരുന്നതിനിടെ മുതിർന്ന നേതാവും മുൻ മന്ത്രിയുമായ ജി സുധാകരനെ പുകഴ്ത്തി അമ്പലപ്പുഴ എംഎൽഎ രംഗത്ത്. മാധ്യമ പരിലാളനയിൽ വളർന്ന നേതാവല്ല . അദ്ദേഹത്തെയും തന്നെയും താരതമ്യം ചെയ്യരുത്. നല്ല കാര്യങ്ങൾ നടക്കുമ്പോൾ ജി സുധാകരനെ ചുരുക്കി കാണിക്കരുതെന്നും സലാം
എംഎൽഎ വ്യക്തമാക്കി.

മഹാനായ നേതാവായ ജി സുധാകരനെ ചുരുക്കിക്കാണിക്കരുത്. അദ്ദേഹത്തിന് താഴെ നിൽക്കുന്ന ആളാണ് താനെന്നും എംഎൽഎ ആയ എച്ച് സലാം പറഞ്ഞു. കഴിഞ്ഞ നിയമസഭാ തെരഞ്ഞെടുപ്പ് പ്രചാരണ പ്രവർത്തനങ്ങളിൽ സുധാകരൻ സജീവമായില്ലെന്ന ഗുരുതര ആരോപണം നടത്തിയത് സലാം എംഎൽഎ ആണ്. ഇതിന് പിന്നാലെ സിപിഎം പ്രത്യേക അന്വേഷണ കമ്മീഷനെ നിയോഗിച്ച് അന്വേഷണം നടത്തുകയും സുധാകരൻ്റെ ഭാഗത്ത് വീഴ്ച സംഭവിച്ചതായും കണ്ടെത്തി.

ആലപ്പുഴ പുന്നപ്ര ജെ.ബി സ്കൂളിൻ്റെ ഉദ്ഘാടന നോട്ടീസിൽ നിന്ന് ജി സുധാകരൻ്റെ പേരുവിവരങ്ങൾ ഉൾപ്പെടുന്ന ഭാഗം മായ്ച്ച സംഭവം വിവാദമായതിന് പിന്നാലെയാണ് സലാമിൻ്റെ പ്രസ്താവന ഉണ്ടായത്. നിലവിലെ വിവാദം തണുപ്പിക്കാനുള്ള ശ്രമമാണ് എം എൽ എയുടെ ഭാഗത്ത് നിന്നും ഉണ്ടായതെന്നാണ് വിലയിരുത്തൽ.

ജി സുധാകരൻ മന്ത്രിയായിരിക്കെ ആസ്തി വികസന ഫണ്ട് ഉപയോഗിച്ച് നിർമ്മിച്ച ആലപ്പുഴ പുന്നപ്ര ജെ.ബി സ്കൂളിൻ്റെ ഉദ്ഘാടന
നോട്ടീസിൽ നിന്നാണ് സുധാകരൻ്റെ പേരുവിവരങ്ങൾ ഫോട്ടോഷോപ്പ് ഉപയോഗിച്ച് മായ്ച്ചത്. താമസ്ഥലത്തിന് സമീപത്തായിട്ട് കൂടി ഉദ്ഘാടന ചടങ്ങിലേക്ക് സുധാകരന് ക്ഷണമില്ലെന്ന പ്രത്യേകതയുമുണ്ട്. “ജി സുധാകരൻ എംഎൽഎ ആസ്തി വികസന ഫണ്ട് 2019 – 20” – എന്ന ഭാഗമാണ് നോട്ടീസിലെ ചിത്രത്തിൽ നിന്നും ഫോട്ടോഷോപ്പ് ഉപയോഗിച്ച് നീക്കിയത്. നോട്ടീസ് പുറത്തുവന്നത് വിവാദമായതോടെ പുതിയ നോട്ടീസ് പുറത്തിറക്കിയിരുന്നു. ജി സുധാകരൻ്റെ പേരുവിവരങ്ങൾ അച്ചടിച്ച കെട്ടിടത്തിൻ്റെ ചിത്രമാണ് പുതിയ നോട്ടീസിൽ ഉൾപ്പെടുത്തിയിരിക്കുന്നത്.

നോട്ടീസിൽ നിന്നും സുധാകരൻ്റെ പേരുവിവരങ്ങൾ ഒഴിവാക്കിയതുമായി ബന്ധപ്പെട്ട് തനിക്കറിയില്ലെന്ന് സലാം എംഎൽഎ കഴിഞ്ഞ ദിവസം പറഞ്ഞിരുന്നു. നോട്ടീസ് അച്ചടിച്ചത് എംഎൽഎയുടെ ഓഫീസാണെന്ന് സ്കൂൾ അധികൃതർ വ്യക്തമാക്കിയതോടെയാണ് പ്രതികരണവുമായി എച്ച് സലാം രംഗത്ത് എത്തിയത്.

നിയമസഭാ തെരഞ്ഞെടുപ്പിൽ അമ്പലപ്പുഴയിൽ പ്രചാരണ പ്രവർത്തനങ്ങളിൽ ജി സുധാകരൻ സഹകരിച്ചില്ലെന്ന ആരോപണം ഉന്നയിച്ചത് എച്ച് സലാമാണ്. മണ്ഡലത്തിലെ തെരഞ്ഞെടുപ്പ് പ്രചാരണങ്ങളിൽ നിന്നും സുധാകരൻ വിട്ടു നിന്നുവെന്ന് അദ്ദേഹം പറഞ്ഞിരുന്നു. ഇതോടെയാണ് എളമരം കരീ, കെ ജെ തോമസ് എന്നിവർ അന്വേഷണം നടത്തിയത്. അമ്പലപ്പുഴയിലെ തെരഞ്ഞെടുപ്പ് പ്രചാരണത്തിൽ വീഴ്ച സംഭവിച്ചുവെന്ന് സിപിഎം ശരിവച്ച സാഹചര്യത്തിലാണ് സുധാകരനെതിരെ അന്വേഷണം നടന്നത്. സുധാകരെൻ്റെ ഭാഗത്ത് നിന്നും വീഴ്ച സംഭവിച്ചുവെന്ന് കണ്ടെത്തിയതോടെ സുധാകരനെ പരസ്യമായി ശാസിക്കാൻ സംസ്ഥാന കമ്മിറ്റി തീരുമാനിക്കുകയായിരുന്നു. പാർട്ടി നടപടിയിൽ വിഷമമില്ലെന്ന് സുധാകരൻ വ്യക്തമാക്കിയിരുന്നു. ജില്ലയിലെ പാർട്ടിയെ ഒറ്റക്കെട്ടായാണ് നയിക്കുന്നതെന്നും അദ്ദേഹം പറഞ്ഞിരുന്നു.