സുധാകരനെതിരെ നടപടി സ്വീകരിക്കുന്ന കാര്യത്തിൽ സിപിഎം സംസ്ഥാന സെക്രട്ടറിയേറ്റ് ചർച്ച ചെയ്യുമെന്ന് മാതൃഭൂമി റിപ്പോർട്ട് ചെയ്തു. ഇതിന് ശേഷമാകും എന്ത് നടപടി വേണമെന്ന് തീരുമാനിക്കുക. അമ്പലപ്പുഴയിലെ തെരഞ്ഞെടുപ്പ് പ്രചാരണ പ്രവർത്തനങ്ങളിൽ സുധാകരൻ്റെ ഭാഗത്ത് നിന്നും വീഴ്ചയുണ്ടായെന്ന ആരോപണം ശക്തമായതോടെ എളമരം കരീ, കെ ജെ തോമസ് എന്നിവരാണ് അന്വേഷണം നടത്തിയത്.
അമ്പലപ്പുഴയിലെ തെരഞ്ഞെടുപ്പ് പ്രചാരണത്തിൽ വീഴ്ച സംഭവിച്ചുവെന്ന് സിപിഎം ശരിവച്ച സാഹചര്യത്തിലാണ് സുധാകരനെതിരെ അന്വേഷണം നടന്നത്. മണ്ഡലത്തിൽ നിന്നും വിജയിച്ച എച്ച് സലാം സുധാകരനെതിരെ രൂക്ഷ വിമർശനങ്ങൾ ഉന്നയിച്ചിരുന്നു. മണ്ഡലത്തിലെ തെരഞ്ഞെടുപ്പ് പ്രചാരണങ്ങളിൽ നിന്നും സുധാകരൻ വിട്ടു നിന്നുവെന്ന് അദ്ദേഹം പറഞ്ഞിരുന്നു.
പാർട്ടി രണ്ട് ടേം വ്യവസ്ഥ പിന്തുടരാൻ തീരുമാനിച്ചതൊടെയാണ് ഇത്തവണ അമ്പലപ്പുഴയിൽ ജി സുധാകരന് വഴിയടഞ്ഞത്. സിപിഎം സ്ഥാന സമിതി എച്ച് സലാം സ്ഥാനാർഥിയായി പ്രഖ്യാപിച്ചതോടെ തെരഞ്ഞെടുപ്പ് പ്രചാരണ പ്രവർത്തനങ്ങളിൽ നിന്നും അദ്ദേഹം പിന്മാറിയെന്നാണ് ആരോപണം. മുതിർന്ന നേതാവിൻ്റെ നിലപാട് തോൽവിക്ക് കാരണമാകുമോ എന്ന് പോലും സിപിഎം പ്രാദേശിക നേതൃത്വം ആശങ്കപ്പെട്ടു. ആലപ്പുഴയിൽ തോമസ് ഐസക് മുഴുവൻ സമയവും തെരഞ്ഞെടുപ്പ് പ്രചാരണത്തിലും പ്രവർത്തിലും ഒപ്പം നിന്നപ്പോഴാണ് വിട്ട് നിന്നതെന്ന് ജില്ലാ കമ്മിറ്റി യോഗത്തിൽ ആരോപണം ഉയരുകയും ചെയ്തിരുന്നു.
ആദ്യഘട്ടത്തിൽ സലാമിനെതിരെ പോസ്റ്റർ പ്രത്യക്ഷപ്പെട്ടിരുന്നു. ഈ ഘട്ടത്തിൽ സുധകാരൻ പ്രതികരണം നടത്തിയില്ല. താൻ എസ്ഡിപിഐക്കാരൻ ആണെന്ന പ്രചാരണം ശക്തമായപ്പോൾ പോലും അദ്ദേഹം പ്രതികരിച്ചില്ലെന്ന സലാം വ്യക്തമാക്കിയിരുന്നു. മണ്ഡലത്തിലെ പ്രചാരണം മുന്നിൽ നിന്ന് നയിക്കേണ്ട നേതാവിൽ നിന്നാണ് ഇത്തരത്തിലുള്ള പ്രതികരണം ഉണ്ടായതെന്നും ജില്ലാ നേതൃത്വം വ്യക്തമാക്കിയിരുന്നു.
