വയനാട് കണിയാമ്പറ്റ സ്വദേശി മിഥുൻ ബാബു കഴിഞ്ഞ മാസം 30നാണ് ആമസോണിലൂടെ തന്റെ പാസ്സ്‌പോർട്ട് സുരക്ഷിതമായി സൂക്ഷിക്കാൻ ഒരു ലെതർ കവർ വാങ്ങിയത്. നവംബർ ഒന്നിന് തന്നെ ഓർഡർ ചെയ്ത പാസ്പോർട്ട് കവർ ലഭിച്ചു. കെട്ടു പൊട്ടിച്ചു നോക്കിയപ്പോൾ കുഴപ്പമൊന്നുമില്ല. പക്ഷെ കവർ കൂടുതൽ പരിശോധിച്ചപ്പോൾ അകത്ത് ഒരു യഥാർത്ഥ പാസ്സ്‌പോർട്ട്.
തൃശൂർ കുന്നംകുളം സ്വദേശിയായ മുഹമ്മദ് സാലിഹ് എന്നയാളുടെ ഒറിജിനൽ പാസ്പോർട്ട് ആണ് കവറിലുണ്ടായിരുന്നത് എന്ന് മാതൃഭൂമി റിപ്പോർട്ട് ചെയുന്നു. അച്ഛന്റെ പേര് ബഷീർ എന്നും അമ്മയുടെ പേര് അസ്മാബി എന്നും രേഖപ്പെടുത്തിയിട്ടുണ്ട്. പാസ്പോർട്ടിൽ കോൺടാക്റ്റ് നമ്പർ കുറിച്ചിട്ടില്ലാത്തനിനാൽ യഥാർത്ഥ ഉടമയെ ബന്ധപ്പെടാൻ സാധിച്ചിട്ടില്ല.
രസകരമായ കാര്യം ഇക്കാര്യം ആമസോണിന്റെ ശ്രദ്ധയിൽപ്പെടുത്തിയപ്പോൾ ‘ഇനി ഇങ്ങനെ ആവർത്തിക്കില്ല’ എന്നായിരുന്നു മറുപടി. ഉടൻ പാസ്പോർട്ടിലെ വിലാസത്തിൽ പാസ്സ്‌പോർട്ട് അയച്ചുകൊടുക്കാനാണ് തീരുമാനിച്ചിരിക്കുന്നത് എന്ന് മിഥുൻ വ്യക്തമാക്കി.
അടുത്തിടെ ആമസോണിൽ ഐഫോൺ 12 ഓർഡർ ഒരു വ്യക്തിയ്ക്ക് പാത്രം കഴുകുന്ന സോപ്പും 5 രൂപ നാണയവും ഉള്ള ഒരു പാക്കേജ് ലഭിച്ചത് വാർത്തയായിരുന്നു. ആലുവ സ്വദേശി നൂറുൽ അമീനാണ് ഇത് ലഭിച്ചത്. അന്വേഷണത്തിൽ അമീൻ ഓർഡർ ചെയ്ത ഫോൺ ഈ വർഷം സെപ്റ്റംബറിൽ ജാർഖണ്ഡിൽ മറ്റൊരാൾക്ക് ലഭിച്ചതായി സൈബർ പോലീസ് കണ്ടെത്തി. മുംബൈയിൽ ഒരാൾ മൗത്ത് വാഷ് ഓർഡർ ചെയ്യുകയും ഒടുവിൽ റെഡ്മി നോട്ട് 10 സ്മാർട്ട്ഫോൺ ലഭിച്ചതും വാർത്തയായിരുന്നു.
