കണ്ണൂർ > മതിയായ ചികിത്സ നൽകാതെ മന്ത്രവാദത്തിന് വിധേയയാക്കിയതിനെ തുടർന്ന് ഏഴാം ക്ലാസ് വിദ്യാർഥി മരിച്ച സംഭവത്തിൽ ഉപ്പയും പള്ളി ഇമാമും അറസ്റ്റിൽ. കണ്ണൂർസിറ്റി നാലുവയലിലെ ദാറുൽ ഹിദായത്ത് ഹൗസിൽ എം എ ഫാത്തിമ (11) പനി ബാധിച്ച് മരിച്ച സംഭവത്തിൽ കുട്ടിയുടെ ഉപ്പ സത്താർ, കുഞ്ഞിപ്പള്ളി ഇമാം ആസാദ് റോഡിൽ മുഹമ്മദ് ഉവൈസ് എന്നിവരെയാണ് കണ്ണൂർ സിറ്റി പൊലീസ് അറസ്റ്റ് ചെയ്തത്.
മനപൂർവമല്ലാത്ത നരഹത്യയ്ക്കാണ് കേസ്. സിറ്റി ഗവ. ഹയർസെക്കൻഡറി സ്കൂൾ വിദ്യാർഥിനിയായ ഫാത്തിമയ്ക്ക് മതിയായ ചികിത്സ ലഭ്യമായില്ലെന്നും മന്ത്രവാദ ചികിത്സ നടത്തിയതായും ആരോപണമുയർന്നതിനെ തുടർന്ന് പൊലീസ് അസ്വാഭാവിക മരണത്തിന് കേസെടുത്തിരുന്നു. തുടർന്നുള്ള അന്വേഷണത്തിലാണ് കുട്ടിക്ക് കൃത്യമായ ചികിത്സ നൽകാതെ മരണത്തിന് ഇടയാക്കിയെന്ന കുറ്റത്തിന് രണ്ടുപേരെ ബുധനാഴ്ച രാവിലെ അറസ്റ്റ് ചെയ്തത്. പനിബാധിച്ച കുട്ടിക്ക് ചികിത്സ നൽകാതെ മന്ത്രിച്ച വെള്ളം കുടിച്ച് ഖുർആൻ വായിച്ച് ഇരിക്കാൻ ഇമാം നിർബന്ധിച്ചതായി പൊലീസ് പറഞ്ഞു.
പനി ബാധിച്ച് വീട്ടിൽ കഴിയുന്ന കുട്ടിയുടെ ആരോഗ്യസ്ഥിതി വഷളായതിനെ തുടർന്ന് ഞായർ പുലർച്ചെ രണ്ടിന് സ്വകാര്യ ആശുപത്രിയിൽ പ്രവേശിപ്പിച്ചെങ്കിലും മരിച്ചു. മൃതദേഹം ജില്ലാ ആശുപത്രിയിലേക്ക് മാറ്റിയപ്പോൾ സംശയം തോന്നിയ ജില്ലാ ആശുപത്രി അധികൃതരാണ് പൊലീസിനെ അറിയിച്ചത്. അസ്വാഭാവിക മരണത്തിന് കേസെടുത്ത് അന്വേഷണം നടത്തുന്നതിനിടെ മന്ത്രവാദ ചികിത്സ നടത്തിയാൾക്കെതിരെ ബന്ധു മൊഴി നൽകിയിരുന്നു. മന്ത്രവാദ ചികിത്സ നടത്തിയതിനാണ് ഇമാം ഉവൈസിനെതിരെ കേസെടുത്തത്. യഥാസമയം ചികിത്സ നൽകാതെ കുട്ടി മരിക്കാനിടയായതിനാണ് ഉപ്പയ്ക്കെതിരെ കേസെടുത്തത്.
