ഫ്രൈഡ് മോമോയുടെ കാലം കഴിഞ്ഞു! ഇനി താരം ഫയർ മോമോ

നേപ്പാൾ വഴി ഇന്ത്യയിലെത്തി രാജ്യത്തെ ഭക്ഷണപ്രേമികളുടെ മനസ്സിൽ കൂടുകൂട്ടിയ ഒരു വിഭവമാണ് ഡംപ്ലിങ് അഥവാ മോമോ. അരിപ്പൊടി വെള്ളം ചേർത്ത് കുഴച്ച് പ്രത്യേക ആകൃതിയിലാക്കിയെടുത്ത ശേഷം ഇറച്ചിയും പച്ചക്കറിയും അകത്ത് കയറ്റി ആവിയിൽ വേവിച്ചാണ് മോമോ ആദ്യം ലഭിച്ചിരുന്നത്. എന്നാലിപ്പോൾ പച്ചക്കറി നിറച്ചും പനീർ മൊമ്മോയുമൊക്കെ ലഭിക്കും. മോമോ ഇങ്ങനെ ക്ലച്ച് പിടിച്ചു നിൽക്കുമ്പോഴാണ് ഫ്രൈഡ് മോമോയുടെ വരവ്. പുഴുങ്ങിയെടുത്ത മോമോ തിളച്ച എണ്ണയിലിട്ട് കോരിയെടുക്കുന്നതാണ് ഫ്രൈഡ് മോമോ. ഏറെ ആരാധകരെ നേടിയെങ്കിലും ഫ്രൈഡ് മോമോയ്ക്ക് ശേഷം എന്ത് എന്ന ചോദ്യം ഭക്ഷണപ്രേമികൾക്കിടയിൽ പ്രസക്തമാണ്.

അതിനിടെയാണ് ഫയർ മോമോയുടെ എൻട്രി. പേര് കേട്ട് സംശയിക്കേണ്ട, തീ മോമോ താന്നെ. ഗാസിയാബാദിലുള്ള ഒരു വഴിയോരഭക്ഷണശാലയാണ് അവതരിപ്പിച്ചിരിക്കുന്നത്. ഫയർ മോമോ ക്ലിക്ക് ആകുമോ എന്ന് ഇപ്പോൾ പറയാൻ പറ്റില്ല എങ്കിലും സമൂഹ മാധ്യമങ്ങളിൽ ഈ വിഭവം തയ്യറാക്കുന്ന വീഡിയോ വൈറലാണ്.

ഹർദിക് മാലിക് എന്ന് പേരുള്ള ഫുഡ് ബ്ലോഗറാണ് ഫയർ മോമോ പരിചയപ്പെടുത്തുന്നത്. ഒരു ചട്ടിയിൽ കുറച്ച് മോമോ വറുത്തെടുത്ത ശേഷം കുറച്ച് പച്ചക്കറികൾ ചേർക്കുന്നു. പാൻ മുഴുവനും തീ പിടിക്കുന്ന തരത്തിൽ മോമോ വഴറ്റുന്നു. പിന്നീട് വിവിധ സോസുകൾ ചേർത്ത് അല്പം ഗ്രേവിയുമായാണ് ഫയർ മോമോ വിളമ്പുന്നത്. ഗാസിയാബാദിലെ ഇന്ദിരാപുരത്തുള്ള ജയ്പൂരിയ മാർക്കറ്റിലാണ് ടെൻസി മോമോ എന്ന ഫയർ മോമോ വിൽക്കുന്ന സ്ഥാപനം പ്രവർത്തിക്കുന്നത്.

ബാഹുബലി ഗോൾഡ് മോമോ

അതിനിടെ മറ്റൊരു മോമോയും അടുത്തിടെ ശ്രദ്ധ നേടിയിരുന്നു,
. പേര് സൂചിപ്പിക്കും പോലെ വലിപ്പത്തിലും കേമനാണ് ബാഹുബലി ഗോൾഡ് മോമോ. രണ്ട് കിലോയോളം ഭാരമുള്ള ബാഹുബലി ഗോൾഡ് മോമോയെപ്പറ്റി ഫുഡ് ബ്ലോഗ്ഗറായ ദിശ (വാട്ട്എഫുഡിഗേൾ) ഇൻസ്റ്റാഗ്രാമിൽ പോസ്റ്റ് ചെയ്തു. ഈ കൂറ്റൻ മോമോയിൽ രുചികരമായ പച്ചക്കറികളും മോസറെല്ല ചീസും ഭക്ഷ്യയോഗ്യമായ 24 കാരറ്റ് സ്വർണ്ണവും നിറച്ചിരിക്കുന്നു.

മൂന്ന് തരം സോസുകൾ, ഒരു മയോ ഡിപ്പ്, ഓറഞ്ച് പുതിന മോയീറ്റോ, മധുരത്തിന് രണ്ട് ചെറിയ ചോക്ലേറ്റ് മോമോ എന്നിവയടങ്ങുന്നതാണ് ബാഹുബലി ഗോൾഡ് മോമോ. 6 മുതൽ 8 പേർക്ക് ഇത് കഴിക്കാം എന്ന് ദിശ പറയുന്നു. 1299 രൂപയാണ് ബാഹുബലി ഗോൾഡ് മോമോയുടെ വില.