അതേസമയം താഹ ഫസലിന് ജാമ്യം അനുവദിച്ച സുപ്രീംകോടതി നടപടി സ്വാഗതംചെയ്യുകയാണെന്ന് സിപിഎം നേതാവ് പി ജയരാജൻ പറഞ്ഞു. മാവോയിസ്റ്റ് കേസുകളിലെല്ലാം യുഎപിഎ ചുമത്തുന്നതിനോട് സിപിഎമ്മിന് യോജിപ്പില്ലെന്ന് അദ്ദേഹം പറഞ്ഞു. ചെറിയ കേസുകളിൽ പോലും യുഎപിഎ ചുമത്തുന്നത് ശരിയായ പ്രവണതയല്ല. അത്തരം നടപടികൾക്കുള്ള തിരിച്ചടിയാണ് വിധിയെന്നും അദ്ദേഹം വ്യക്തമാക്കി.
വ്യാഴാഴ്ച ജാമ്യം ലഭിച്ച താഹ ഫസൽ കേസിലെ രണ്ടാം പ്രതിയാണ്. ഒന്നാം പ്രതി അലൻ ഷുഹൈബിന്റെ ജാമ്യം റദ്ദാക്കണമെന്ന എൻഐഎയുടെ ആവശ്യം സുപ്രീംകോടതി തള്ളി. ജസ്റ്റിസ് അജയ് റസ്തോഗിയും ജസ്റ്റിസ് ശ്രീനിവാസും അടങ്ങുന്ന ബെഞ്ചാണ് കേസ് പരിഗണിച്ചത്.
താഹ ഫസലിനെ എത്രയും വേഗം വിചാരണ കോടതിയിൽ ഹാജരാക്കി തുടർ നടപടികൾ പൂർത്തിയാക്കണമെന്ന് സുപ്രീംകോടതി നിർദ്ദേശിച്ചു. വിധിയുടെ പ്രസക്ത ഭാഗങ്ങൾ മാത്രമാണ് കോടതിയിൽ വായിച്ചത്. ഉത്തരവിന്റെ പൂർണ്ണ രൂപത്തിലാണ് ഇരുവർക്കുമെതിരെയുള്ള യുഎപിഎ നിലനിൽക്കില്ലെന്ന പരാമർശമുള്ളത്. 2019 നവംബറിലാണ് മാവോയിസ്റ്റ് പ്രവർത്തനം ആരോപിച്ച് പന്തീരാങ്കാവ് യുഎപിഎ കേസിൽ അലൻ ഷുഹൈബിനെയും താഹ ഫസലിനെയും പോലീസ് അറസ്റ്റ് ചെയ്തത്.
