മോൻസണെതിരെ വീണ്ടും പീഡന പരാതിയുമായി യുവതി: മുൻ ജീവനക്കാരിയുടെ മൊഴിയെടുക്കാൻ ക്രൈം ബ്രാഞ്ച്

കൊച്ചി: പുരാവസ്തു തട്ടിപ്പുകാരൻ മോൻസൺ മാവുങ്കലിനെതിരെ വീണ്ടും ലൈംഗികാരോപണം. മോൻസൺ മാവുങ്കലിൻ്റെ സ്ഥാപനത്തിൽ മുൻപ് ജോലി ചെയ്തിരുന്ന യുവതിയാണ് ഇയാള്‍ക്കെതിപെ പീഡന പരാതിയുമായി എത്തിയിരിക്കുന്നത്. പരാതി ലഭിച്ചതിൻ്റെ അടിസ്ഥാനത്തിൽ ക്രൈം ബ്രാഞ്ച് യുവതിയുടെ മൊഴി രേഖപ്പെടുത്തും.

മോൻസണോടൊപ്പം ജോലി ചെയ്തിരുന്ന കാലത്ത് തന്നെ മോൻസൺ പീഡിപ്പിച്ചു എന്നാണ് യുവതിയുട പരാതി. സ്ഥാപനത്തിൽ ജോലി ചെയ്തിരുന്ന സ്ത്രീകളെയും ചില പെൺകുട്ടികളെയും മോൻസൺ പീഡിപ്പിച്ചിരുന്നതായി ജീവനക്കാര്‍ അടക്കമുള്ളവര്‍ വെളിപ്പെടുത്തിയിരുന്നു. സമാനമായ മറ്റൊരു കേസിൽ അന്വേഷണം പുരോഗമിക്കുന്നതിനിടെയാണ് പുതിയ പരാതി. ഈ പരാതി ക്രൈം ബ്രാഞ്ചിനു കൈമാറും.

Also Read:

പ്രായപൂര്‍ത്തിയാകാത്ത പെൺകുട്ടിയെ പീഡിപ്പിച്ചതിനു മോൻസണെതിരെ പോക്സോ കേസാണ് നിലവിലുള്ളത്. സൗന്ദര്യവര്‍ധക സ്ഥാപനത്തിലെ ഒരു ജീവനക്കാരിയുടെ മകളെ മോൻസൺ ലൈംഗികമായി ഉപദ്രവിക്കുകയായിരുന്നുവെന്നാണ് ആരോപണം. പെൺകുട്ടിയ്ക്ക് ഉന്നതവിദ്യാഭ്യാസം ഉറപ്പു നല്‍കിയ മോൻസൺ കുട്ടിയെ വാടകവീട്ടിൽ വെച്ച് നിരന്തരം പീഡിപ്പിച്ചതായാണ് കേസ്. ഈ കേസിൽ മോൻസണെ ഉടൻ അന്വേഷണസംഘം കസ്റ്റഡിയിലെടുക്കും.

ഇതിനിടെ മോൻസൻ്റെ കലൂരിലെ വീട്ടിൽ ക്രൈം ബ്രാഞ്ച് തെളിവെടുപ്പ് നടത്തി. ഇന്നലെ രാവിലെ 11 മണിയോടെയാണ് മോൻസണെ ഇവിടെയെത്തിച്ച് തെളിവെടുപ്പ് നടത്തിയത്. വൈകിട്ട് നാലുമണി വരെ തെളിവെടുപ്പ് നീണ്ടു. പുരാവസ്തു വ്യാപാരിയായ സന്തോഷ് എളമക്കരയെ കബളിപ്പിച്ച കേസിലായിരുന്നു തെളിവെടുപ്പ്. സന്തോഷിൻ്റെ സാന്നിധ്യത്തിലായിരുന്നു ഉദ്യോഗസ്ഥര്‍ മോൻസണുമായി തെളിവെടുപ്പ് നടത്തിയത്.

Also Read:

മൂന്ന് കോടി രൂപയുടെ സാമഗ്രികള്‍ സന്തോഷിൽ നിന്ന് മോൻസൺ വാങ്ങിയിട്ടുണ്ടെന്നാണ് കേസിലെ രേഖകള്‍ പറയുന്നത്. ഇവ ഏതെല്ലാമാണെന്ന് സന്തോഷ് തിരിച്ചറിഞ്ഞു. കൂടാതെ ഈ വീടിനുള്ളിൽ തയ്യാറാക്കിയിരുന്ന മസാജിങ് സെൻ്ററിലും തെളിവെടുപ്പ് നടത്തി. കഴിഞ്ഞ ദിവസം ഈ മുറിയിൽ നിന്ന് എട്ട് രഹസ്യ ക്യാമറകള്‍ ക്രൈം ബ്രാഞ്ച് കണ്ടെത്തിയിരുന്നു. ഈ സാഹചര്യത്തിലായിരുന്നു ഇവിടെയും തെളിവെടുപ്പ് നടത്തിയത്.

അതേസമയം, മോൻസൻ്റെ മാനേജറായ ജിഷ്ണു മോൻസൺ പറഞ്ഞതനുസരിച്ച് ഒരു പെൻഡ്രൈവ് നശിപ്പിച്ചതായി റിപ്പോര്‍ട്ടുകള്‍ വന്നിരുന്നു. ഇതേപ്പറ്റിയും അന്വേഷണം പുരോഗമിക്കുന്നുണ്ട്. കഴിഞ്ഞ ദിവസം ക്രൈം ബ്രാഞ്ച് ജിഷ്ണുവിനെ വിളിച്ചു വരുത്തി ചോദ്യം ചെയ്തിരുന്നു. ഈ പെൻഡ്രൈവിൽ എന്താണ് സൂക്ഷിച്ചിരുന്നതെന്ന് തനിക്ക് അറിയില്ലെന്നാണ് ജിഷ്ണു പറയുന്നത്.

കേസുമായി ബന്ധപ്പെട്ട് മുൻ പോലീസ് മേധാവി ലോക്നാഥ് ബെഹ്റയുടെയും നിലവിലെ ഡിജിപി അനിൽ കാന്തിൻ്റെയും മൊഴി ക്രൈം ബ്രാഞ്ച് രേഖപ്പെടുത്തിയിട്ടുണ്ട്. ക്രൈം ബ്രാഞ്ച് മേധാവി എസ് ശ്രീജിത്ത്, എസ് പി എം ജെ സോജൻ എന്നിവരാണ് മൊഴിയെടുക്കാനായി അനിൽ കാന്തിനെ സന്ദര്‍ശിച്ചത്. മോൻസണുമൊത്ത് അനിൽ കാന്ത് നിൽക്കുന്ന ചിത്രം പുറത്തു വന്ന സാഹചര്യത്തിലായിരുന്നു മൊഴിയെടുപ്പ്. ഫോട്ടെയുടുക്കുപമ്പോള്‍ പ്രവാസി മലയാളി ഫെഡറേഷൻ ഭാരവാഹികള്‍ അടക്കം ആറുപേര്‍ ഉണ്ടായീരുന്നുവെന്നും എന്നാൽ മറ്റുള്ളവരെ വെട്ടിമാറ്റി താൻ മാത്രമുള്ള ചിത്രം മോൻസൺ പ്രചരിപ്പിക്കുകയായിരുന്നുവെന്നുമാണ് അനിൽ കാന്ത് മൊഴി നല്‍കിയത്.