തമിഴ്നാടിന് ജലം, കേരളത്തിന് സുരക്ഷ എന്നതാണ് ഇരു സംസ്ഥാനങ്ങൾക്കും അനുയോജ്യമായ നിലപാടെന്ന് വി ഡി സതീശൻ പറഞ്ഞു. മുല്ലപ്പെരിയാറിൽ ജലനിരപ്പ് 136 അടിയിലെത്തിയതോടെ കേരളത്തിൽ ആശങ്ക വർധിച്ചു വരികയാണ്. 125 വർഷത്തിലധികം പഴക്കമുള്ള ഡാമിന്‍റെ സുരക്ഷ സംബന്ധിച്ചും ആശങ്കയുണ്ടെന്നും അദ്ദേഹം പറഞ്ഞു.
Also Read :
മുല്ലപ്പെരിയാറിൽ പുതിയ ഡാം നിർമ്മിക്കണമെന്ന ആവശ്യം കഴിഞ്ഞദിവസങ്ങളിൽ വിവിധ കോണുകളിൽ നിന്ന് ഉയർന്നിരുന്നു. ഇതിന് പിന്നാലെയാണ് വിഷയത്തിൽ പ്രതിപക്ഷ നേതാവ് തമിഴ്നാട് മുഖ്യമന്ത്രിക്ക് കത്തയച്ചത്. നേരത്തെ മുല്ലപ്പെരിയാർ വിഷയത്തിൽ മുഖ്യമന്ത്രി പിണറായി വിജയൻ തമിഴ്നാട് മുഖ്യമന്ത്രി എം കെ സ്റ്റാലിനുമായി ചർച്ച നടത്തുമെന്ന് ജലവിഭവ മന്ത്രി റോഷി അഗസ്റ്റിൻ വ്യക്തമാക്കിയിരുന്നു. തമിഴ്നാട് – കേരള മുഖ്യമന്ത്രിമാരുടെ ചർച്ച ഡിസംബറിൽ നടക്കുമെന്നാണ് അദ്ദേഹം പറഞ്ഞത്.
മുല്ലപ്പെരിയാർ അണക്കെട്ടിലെ ജലനിരപ്പ് സംബന്ധിച്ച തർക്കം വീണ്ടും സുപ്രീം കോടതിയിൽ എത്തിയ പശ്ചാത്തലത്തിൽ കൂടിയായിരുന്നു ജലവിഭവ മന്ത്രിയുടെ പ്രതികരണം. അണക്കെട്ടിലെ ജലനിരപ്പ് സംബന്ധിച്ച തീരുമാനം ഉടൻ കൈക്കൊള്ളണമെന്ന് വ്യക്തമാക്കിയ സുപ്രീം കോടതി കേരളവും തമിഴ്നാടും വിഷയം ചർച്ച ചെയ്ത് തീരുമാനം സ്വീകരിക്കണമെന്ന് പറഞ്ഞിരുന്നു.
Also Read :
രണ്ട് സംസ്ഥാനങ്ങളിലെയും മുഖ്യമന്ത്രിമാർ പങ്കെടുക്കുന്ന യോഗത്തിൽ മുല്ലപ്പെരിയാർ വിഷയത്തിൽ ധാരണയുണ്ടാകും. പുതിയ അണക്കെട്ട് നിർമ്മിക്കാൻ ആവശ്യമായ നടപടികൾ സ്വീകരിക്കുകയും ചെയ്യുമെന്നും റോഷി അഗസ്റ്റിൻ പറഞ്ഞു. തമിഴ്നാടുമായി നിരന്തരം ആശയവിനിമയം നടത്തുന്നുണ്ട്. മുഴുവൻ സമയവും സ്ഥിതിഗതികൾ നിരീക്ഷിക്കാൻ ആവശ്യമായ ഉദ്യോഗസ്ഥരെ ചുമതലപ്പെടുത്തി. കൂടുതൽ വെള്ളം കൊണ്ടുപോകാനും സ്പിൽ വേ ഷട്ടറുകൾ ഉയർത്തി അധികജലം പുറത്തേക്ക് ഒഴുക്കിക്കൊണ്ട് പോകേണ്ട അവസ്ഥയുണ്ടായാൽ 24 മണിക്കൂർ മുൻപ് തന്നെ അറിയിപ്പ് ലഭ്യമാക്കാനും നിർദേശം നൽകിയെന്നും മന്ത്രി പറഞ്ഞു.
Also Read :
അതേസമയം മുല്ലപ്പെരിയാര്‍ ഡാമിന്‍റെ സുരക്ഷ സംബന്ധിച്ച് അനാവശ്യ ഭീതി സൃഷ്ടിക്കരുതെന്ന് മുഖ്യമന്ത്രി പിണറായി വിജയൻ കഴിഞ്ഞദിവസം പറഞ്ഞിരുന്നു. മുല്ലപ്പെരിയാറിൽ അപകടം സംഭവിക്കാൻ പോകുന്നുവെന്ന ഭീതി പരത്തുകയാണെന്നും ഇത്തരത്തിൽ സമൂഹമാധ്യമങ്ങള്‍ വഴി പ്രചാരണം നടത്തുന്നവര്‍ക്കെതിരെ നിയമനടപടി സ്വീകരിക്കുമെന്നും നിയമസഭയിലായിരുന്നു മുഖ്യമന്ത്രി വ്യക്തമാക്കിയത്.
