തൃശൂർ> അമ്മന്നൂർ പരമേശ്വരൻ ചാക്യാർക്കും ചേർത്തല തങ്കപ്പ പണിക്കർക്കും കേരള കലാമണ്ഡലം ഫെല്ലൊഷിപ്പ്. 2020ലെ കലാമണ്ഡലം അവാർഡുകളും എൻഡോവ്മെന്റും കലാമണ്ഡലം ഭാരവാഹികൾ വാർത്താസമ്മേളനത്തിൽ പ്രഖ്യാപിച്ചു. മാർഗി വിജയകുമാർ (കഥകളി വേഷം), കലാമണ്ഡലം കെ പി അച്യുതൻ (കഥകളി സംഗീതം), കലാമണ്ഡലം രാജൻ (കഥകളി ചെണ്ട), കലാമണ്ഡലം അച്യുത വാരിയർ (കഥകളി മദ്ദളം), അപ്പുണ്ണി തരകൻ (അണിയറ), സരോജിനി നങ്ങ്യാരമ്മ (കൂടിയാട്ടം), പല്ലവി കൃഷ്ണൻ (മോഹിനിയാട്ടം), കുഞ്ചൻ സ്മാരകം ശങ്കരനാരായണൻ (തുള്ളൽ), എൻ കെ മധുസൂദനൻ (മൃദംഗം), എ എസ് എൻ നമ്പീശൻ പുരസ്കാരം മഠത്തിലാത്ത് ഗോവിന്ദൻകുട്ടി നായർ (മച്ചാട് ഉണ്ണിനായർ‐പഞ്ചവാദ്യം) എന്നിവർക്കാണ് അവാർഡുകൾ.
അഡ്വ. സി കെ നാരായണൻ നമ്പൂതിരി (മുകുന്ദരാജ സ്മൃതി പുരസ്കാരം), കെ ബി രാജാനന്ദ് (എം കെ കെ നായർ സമഗ്രസംഭാവന പുരസ്കാരം), കലാമണ്ഡലം കെ എ ഐശ്വര്യ (യുവപ്രതിഭ അവാർഡ്) അർഹരായി. ഡോ. സുമിതാ നായർ (കലാരത്നം എൻഡോവ്മെന്റ്), കലാമണ്ഡലം പി അനിൽകുമാർ (വി എസ് ശർമ്മ എൻഡോവ്മെന്റ്), കലാമണ്ഡലം കൃഷ്ണേന്ദു (പൈങ്കുളം രാമചാക്യാർ സ്മാരക പുരസ്കാരം), മരുത്തോർവട്ടം കണ്ണൻ (വടക്കൻ കണ്ണൻനായർ സ്മൃതിപുരസ്കാരം), കരിവെള്ളൂർ രത്നകുമാർ കെ എസ് ദിവാകരൻനായർ (സ്മാരക സൗഗന്ധിക പുരസ്കാരം), നെടുമ്പുള്ളി രാംമോഹൻ (ഭാഗവതർ കുഞ്ഞുണ്ണി തമ്പുരാൻ എൻഡോവ്മെന്റ്), പി ജനകാശങ്കർ (പകരാവൂർ ചിത്രൻ നമ്പൂതിരിപ്പാട് എൻഡോവ്മെന്റ്), കലാമണ്ഡലം ഗോപിനാഥപ്രഭ (കിള്ളിമംഗലം വാസുദേവൻ നമ്പൂതിരിപ്പാട് സ്മാരക അവാർഡ്) എന്നിവരും അർഹരായി.
50,000 രൂപയും കീർത്തിപത്രവും ഫലകവും പൊന്നാടയും അടങ്ങുന്നതാണ് ഫെലോഷിപ്പുകൾ. 30,000 രൂപയും കീർത്തിപത്രവും ഫലകവും പൊന്നാടയും അടങ്ങുന്നതാണ് അവാർഡുകൾ. വൈസ്ചാൻസലർ ടി കെ നാരായണൻ ചെയർമാനും ഡോ. കലാമണ്ഡലം ഗോപിയുൾപ്പടെ ഭരണസമിതി അംഗങ്ങളടങ്ങിയ സമിതിയാണ് പുരസ്കാരങ്ങൾ നിർണ്ണയിച്ചത്. നവംബർ 7ന് പുരസ്കാരങ്ങൾ വിതരണം ചെയ്യും.
വാർത്താസമ്മേളനത്തിൽ വൈസ്ചാൻസലർ ടി കെ നാരായണൻ, ഭരണസമിതി അംഗങ്ങളായ എൻ ആർ ഗ്രാമപ്രകാശ്, ടി കെ വാസു, പെരുവനം കുട്ടൻമാരാർ, കെ രവീന്ദ്രനാഥ്, കലാമണ്ഡലം പ്രഭാകരൻ എന്നിവർ വാർത്താസമ്മേളനത്തിൽ പങ്കെടുത്തു.
