ശനിയാഴ്ച രാവിലെ പത്ത് മുതൽ വൈകിട്ട് അഞ്ചുവരെയാണ് സമരമെന്ന് അനുപമ പറഞ്ഞു. പെറ്റമ്മ എന്ന നിലയിൽ തനിക്ക് നീതി നൽകേണ്ടവർ തൻ്റെ കുഞ്ഞിനെ നഷ്ടപ്പെടുത്താൻ കൂട്ടുന്നതിൽ പ്രതിഷേധിച്ചാണ് സമരമെന്ന് അവർ പറഞ്ഞു. വനിതാ കമ്മീഷന് മുന്നിലും പ്രതിഷേധിക്കുമെന്ന് അനുപമ വ്യക്തമാക്കിയതായി മാതൃഭൂമി ന്യൂസ് റിപ്പോർട്ട് ചെയ്തു.
2019 ഒക്ടോബർ 19ന് കാട്ടാക്കടയിലെ സ്വകാര്യ ആശുപത്രിയിൽ ജനിച്ച അനുപമയുടെ കുഞ്ഞിൻ്റെ ജനന സർട്ടിഫിക്കറ്റിൽ തിരിമറി നടന്നതായി കണ്ടെത്തിയിരുന്നു. കുട്ടിയുടെ അച്ഛൻ്റെ പേരും സ്ഥലവും ജനന സർട്ടിഫിക്കറ്റിൽ തെറ്റായിട്ടാണ് രേഖപ്പെടുത്തിയിരിക്കുന്നത്. കുട്ടിയുടെ പിതാവിൻ്റെ പേരിൻ്റെ സ്ഥാലത്ത് അജിത്ത് കുമാർ എന്നതിന് പകരം ജയകുമാർ സി എന്നാണ് രേഖപ്പെടുത്തിയത്. കവടിയാർ കുറവൻ കോണമാണ് അജിത്തിൻ്റെ സ്വദേശം. എന്നാൽ സർട്ടിഫിക്കറ്റിൽ രേഖപ്പെടുത്തിയിരിക്കുന്നത് തിരുവനന്തപുരം മണക്കാടുള്ള വിലാസമാണ്.
കുഞ്ഞിനെ എന്നെന്നേക്കുമായി ഞങ്ങളിൽ നിന്ന് അകറ്റാനുള്ള ശ്രമമാണ് നടന്നതെന്ന് ജനന സർട്ടിഫിക്കറ്റിലെ വിവരങ്ങൾ തെറ്റാണെന്ന റിപ്പോർട്ട് പുറത്തുവന്നതിന് പിന്നാലെ അനുപമയും അജിത്തും ആരോപിച്ചിരുന്നു. കുഞ്ഞിൻ്റെ കാണാതായ സംഭവത്തിൽ അനുപമയുടെ പിതാവും സി പി എം ലോക്കൽ കമ്മിറ്റിയംഗവുമായ ജയചന്ദ്രനും ബ്രാഞ്ച് കമ്മിറ്റിയംഗമായ മാതാവ് സ്‌മിതാ ജയിംസിനുമെതിരെ പോലീസ് കേസെടുത്തിരുന്നു. പ്രസവിച്ച് മൂന്നാം ദിവസം അച്ഛനും അമ്മയും സഹോദരിയും ചേർന്ന് കുഞ്ഞിനെ ബലമായി മാറ്റിയെന്നാണ് അനുപമ നൽകിയ പരാതിയിൽ പറയുന്നത്.
അജിത്തുമായി പ്രണയത്തിലായത് മുതൽ വീട്ടുകാർക്ക് എതിർപ്പായിരുന്നുവെന്നും ഗർഭിണിയായപ്പോൾ മുതൽ കുട്ടിയെ നശിപ്പിക്കാൻ വീട്ടുകാർ ശ്രമം നടത്തിയിരുന്നതായും അനുപമ വെളിപ്പെടുത്തിയിരുന്നു. സഹോദരിയുടെ വിവാഹത്തിന് ശേഷം കുട്ടിയെ തിരികെ നൽകാം എന്ന് വിശ്വസിപ്പിച്ചാണ് കുഞ്ഞിനെ മാറ്റിയത്. ചേച്ചിയുടെ വിവാഹത്തിന് ശേഷം തന്നേയും കുട്ടിയേയും അജിത്തിനൊപ്പം വിടാമെന്നും വീട്ടുകാർ പറഞ്ഞിരുന്നു.
കുഞ്ഞിനെ അനുമപമയ്ക്ക് തന്നെ കിട്ടണമെന്നാണ് പാര്‍ട്ടിയുടെ നിലപാടെന്ന് തിരുവനന്തപുരം ജില്ലാ സെക്രട്ടറി ആനാവൂര്‍ നാഗപ്പൻ വ്യക്തമാക്കിയിരുന്നു. വിഷയത്തിൽ ഇടപടെണമെന്ന് അറിയിച്ച് കുഞ്ഞിൻ്റെ അച്ഛൻ അജിത് തന്നെ സമീപിച്ചിട്ടില്ലെന്നും അദ്ദേഹം വിശദീകരിച്ചു. അനുപമ തന്നെ ഫോണിൽ വിളിക്കുക മാത്രമാണ് ചെയ്തതെന്ന് അദ്ദേഹം പറഞ്ഞതായി ഏഷ്യാനെറ്റ് ന്യൂസ് റിപ്പോര്‍ട്ട് ചെയ്തു. നിയമപരമായ നടപടികൾ പൂർത്തിയാക്കാതെ അനുപമയ്ക്ക് കുഞ്ഞിനെ തിരിച്ചു നൽകാൻ കഴിയില്ലെന്നും ആനാവൂർ കൂട്ടിച്ചേർത്തു. വിഷയം പാര്‍ട്ടി തലത്തിൽ പരിഹരിക്കാൻ സാധിക്കുന്നതല്ലെന്നു വിശദീകരിച്ചിരുന്നുവെന്നാണ് ആനാവൂര്‍ നാഗപ്പൻ പറയുന്നത്. എന്നാൽ ഈ വാദങ്ങള്‍ അനുപമയും ഭര്‍ത്താവും തള്ളിയിട്ടുണ്ട്. ഇക്കാര്യത്തിൽ പാര്‍ട്ടിയ്ക്ക് ഉത്തരവാദിത്തമില്ലെന്നു പറഞ്ഞു വഴക്ക് പറയുന്ന രീതിയിലാണ് സംസാരിച്ചതെന്നും അനുപമ ആരോപിച്ചു.
