ജംബോ കമ്മിറ്റി ഒഴിവാക്കണമെന്ന് തീരുമാനിച്ചത് രാഷ്ട്രീയ കാര്യസമിതിയാണ്. ഭാരവാഹികളുടെ എണ്ണം എത്രയെന്ന് നിശ്ചയിച്ചതും രാഷ്ട്രീയ കാര്യസമിതിയാണ്. പട്ടികയില് അതൃപ്തിയുണ്ടെന്ന് കെ മുരളീധരന് പറഞ്ഞത് ഏത് സാഹചര്യത്തിലാണെന്ന് അറിയില്ല. അദ്ദേഹവുമായി ചര്ച്ച നടത്തിയിരുന്നു. മുരളീധരനുമായി സംസാരിക്കാൻ തയ്യാറാണെന്നും പ്രതിപക്ഷ നേതാവ് വ്യക്തമാക്കി.
കഴിവിന്റെ പരമാവധി മികച്ച പട്ടിക പുറത്തിറക്കാന് ശ്രമിച്ചു. ചില നേതാക്കള്ക്ക് അതൃപ്തിയെന്ന വാര്ത്തകള് നേരത്തെ പുറത്തു വന്നു. മാധ്യമങ്ങള് പറയുന്ന പോലെയുള്ള അതൃപ്തി അറിയിച്ചിട്ടില്ലെന്ന് ആ നേതാക്കള് നേരിട്ട് വിളിച്ചു പറഞ്ഞു. പരാതി പറഞ്ഞാല് അത് പരിഹരിക്കും. അര്ഹരായ ചിലര് ഉള്പ്പെട്ടിട്ടില്ല. അവര്ക്ക് കൂടി പ്രവര്ത്തിക്കാനുള്ള സാഹചര്യവും സൗകര്യങ്ങളും നേതൃത്വം നല്കുമെന്നും വി ഡി സതീശൻ പറഞ്ഞു.
കെപിസിസി ഭാരവാഹി പട്ടികയുമായി ബന്ധപ്പെട്ട് നടത്തിയ പ്രതികരണം നേതൃത്വത്തിനെ പ്രതിരോധത്തിലാക്കിയിരുന്നു. പട്ടിക തയ്യാറാക്കിയതിൽ മുൻ പ്രസിഡൻ്റുമാരോട് കൂടുതൽ ചർച്ചകൾ നടത്താമായിരുന്നുവെന്ന് അദ്ദേഹം വ്യക്തമാക്കിയിരുന്നു. “ഒരു പൊതുചർച്ച മൊത്തത്തിൽ ഉണ്ടായിരുന്നുവെങ്കിൽ കുറച്ചുകൂടി സ്മൂത്തായി പട്ടിക പുറത്തുവന്നേനെ. ലിസ്റ്റിനെ താൻ അനുകൂലിക്കുകയോ പ്രതികൂലിക്കുകയോ ചെയ്യുന്നില്ല. അതിനുകാരണം അച്ചടക്കമാണ്, അച്ചടക്കം താനുൾപ്പെടെ എല്ലാവർക്കും ബാധകമാണ്. മുൻ പ്രസിഡൻ്റുമാരെയൊക്കെ ഇരുത്തിയൊരു ചർച്ച നടന്നിരുന്നുവെങ്കിൽ ഒഴിവാക്കേണ്ട പേരുകൾ ഏതൊക്കെ എന്ന് ചർച്ച നടത്താമായിരുന്നു. എന്നാൽ അത്തരമൊരു ചർച്ച ഉണ്ടായില്ല. അച്ചടക്കം എനിക്കും ബാധകമായതിനാൽ പട്ടികയെ എതിർക്കുന്നില്ല” – എന്നും മുരളീധരൻ കൂട്ടിച്ചേർത്തു. ഇതിനുള്ള മറുപടിയാണ് പ്രതിപക്ഷ നേതാവ് നടത്തിയത്.
ഇടുക്കി, കോട്ടയം ജില്ലകളില് ദുരന്തമുണ്ടായപ്പോള് നാസ ഉള്പ്പെടെയുള്ള ഏജന്സികള് മുന്നറിയിപ്പ് നല്കിയിരുന്നതാണെന്ന് വി ഡി സതീശൻ പറഞ്ഞു. “മുഖ്യമന്ത്രിയെ പ്രതിപക്ഷ നേതാവ് വ്യക്തിപരമായി ആക്രമിക്കുന്നു എന്നാണ് സി.പി.എം സംസ്ഥാന സെക്രട്ടറിയുടെ ചുമതലയുള്ള എ വിജയരാഘവന് ആരോപിക്കുന്നത്. ഇടുക്കി, കോട്ടയം ജില്ലകളില് ദുരന്തമുണ്ടായപ്പോള് നാസ ഉള്പ്പെടെയുള്ള ഏജന്സികള് മുന്നറിയിപ്പ് നല്കിയിരുന്നതാണ്. ഉരുള്പൊട്ടി അഞ്ച് മണിക്കൂറിനു ശേഷമാണ് മീനച്ചിലാറിന്റെ താഴ്ന്ന പ്രദേശങ്ങളില് വെള്ളപ്പൊക്കമുണ്ടായത്. ഈ സമയത്തിനുള്ളില് നിരവധി പേരെ അപകടത്തില് നിന്നും രക്ഷിക്കാമായിരുന്നു. പ്രകൃതി ദുരന്തങ്ങള് ഉണ്ടാകുമ്പോള് മുന്നറിയിപ്പ് സംവിധാനങ്ങള് കുറേക്കൂടി മെച്ചപ്പെടുത്തണമെന്നാണ് പറഞ്ഞത്. അതെങ്ങനെ വിമര്ശനമാകും? ഉരുള്പൊട്ടലുണ്ടായ കൊക്കയാറില് പിറ്റേദിവസമാണ് രക്ഷാപ്രവര്ത്തനം നടന്നത്” – എന്നും അദ്ദേഹം പറഞ്ഞു.
പ്രതിപക്ഷ നേതാവിനെ അവിടെയെങ്ങും കണ്ടില്ലല്ലോയെന്നാണ് വിജയരാഘവന് ചോദിക്കുന്നത്. ഏതായാലും മന്ത്രിമാര് അവിടെ എത്തുന്നതിന് മുന്പ് ഞാന് അവിടെയെത്തി. അത് വലിയ ക്രെഡിറ്റായി പറയുന്നതല്ല. അത് എല്ലാ രാഷ്ട്രീയ പാര്ട്ടിക്കാരുടെയും പൊതുപ്രവര്ത്തകരുടെയും ചുമതലയാണ്. എല്ലാ രാഷ്ട്രീയക്കാരും മന്ത്രിമാരും അവിടെയുണ്ടായിരുന്നു. പിറ്റേ ദിവസം മാത്രമാണ് രക്ഷാപ്രവര്ത്തനം നടന്നതെന്ന തെറ്റ് വീണ്ടും ആവര്ത്തിക്കാതിരിക്കാനാണ് ഇത് ചൂണ്ടിക്കാട്ടിയത്. പ്രതിപക്ഷ നേതാവിന്റെ പദവിക്ക് ചേര്ന്ന പ്രവൃത്തിയല്ല ഞാന് ചെയ്യുന്നതെന്നതാണ് മറ്റൊരു വിമര്ശനം. എന്നാല്, പിണറായി വിജയന്റെ രാജസദസിലെ ആസ്ഥാന വിദൂഷകന്റെ ജോലി വിജയരാഘവന് നന്നായി ചെയ്യുന്നുണ്ട്. എന്റെ ജോലി എന്നെ പഠിപ്പിക്കാന് അദ്ദഹം വരണ്ട. ഞാന് എങ്ങനെ സംസാരിക്കണമെന്ന് എ.കെ.ജി സെന്ററില് നിന്നും ഒരു നിര്ദ്ദേശവും വേണ്ട. ഞങ്ങള് ജനങ്ങളെ ബാധിക്കുന്ന വിഷയങ്ങള് ഉയര്ത്തിക്കാട്ടും. അത് ഇനിയും തുടരുമെന്നും പ്രതിപക്ഷ നേതാവ് വ്യക്തമാക്കി.
