അണക്കെട്ടുകളിലെ ജലനിരപ്പ് നിരീക്ഷിക്കുന്നതിന് സർക്കാർ നിയോഗിച്ച കമ്മിറ്റി തീരുമാനപ്രകാരം മൂന്ന് ഡാമുകളിലെ വെള്ളം തുറന്നു വിടും. എല്ലാ മുൻകരുതലുകളും സ്വീകരിച്ചാണ് ഷട്ടറുകൾ തുറക്കുക. ഇടുക്കി ഡാമിന്റെ ഷട്ടർ ചൊവ്വാഴ്ച്ച രാവിലെ 11 മണിക്കും ഇടമലയാറിന്റേത് രാവിലെ 6 മണിക്കും തുറക്കും. പമ്പാ ഡാം തുറക്കാനുള്ള സമയം ചൊവ്വാഴ്ച്ച തീരുമാനിക്കും. ഡാമുകൾ തുറക്കുമ്പോൾ വേണ്ട ജാഗ്രതാനിർദേശം എല്ലായിടത്തും നൽകിയിട്ടുണ്ട്. അവിടങ്ങളിലെ ജനങ്ങൾ അതീവ ജാഗ്രത പുലർത്തണമെന്നും മുഖ്യമന്ത്രി പറഞ്ഞു.
വെള്ളം തുറന്നു വിടാൻ തീരുമാനിച്ച ഡാമുകളുമായി ബന്ധപ്പെട്ട് വെള്ളം കയറാൻ സാധ്യതയുള്ള പ്രദേശങ്ങളുണ്ടാവാം. ആളുകളെ സുരക്ഷിത സ്ഥാനത്തേക്ക് മാറ്റാനുള്ള നടപടി പുരോഗമിക്കുകയാണ്. അധികൃതർ നൽകുന്ന നിർദേശങ്ങൾ അനുസരിക്കാനും അതീവ ജാഗ്രത പാലിക്കാനും എല്ലാവരും തയ്യാറാവണം. സംസ്ഥാനത്ത് ഇപ്പോൾ 240 ദുരിതാശ്വാസ ക്യാമ്പുകൾ പ്രവർത്തിക്കുന്നുണ്ട്. അവയിൽ 2541 കുടുംബങ്ങളിലെ 9081 പേരാണുള്ളത്. ക്യാമ്പുകളിൽ ആവശ്യമായ എല്ലാ സജ്ജീകരണങ്ങളും ഉറപ്പുവരുത്താൻ നിർദ്ദേശം നൽകിയിട്ടുണ്ട്.
സംസ്ഥാനത്ത് ശക്തമായ മഴ തുടരാനുള്ള സാഹചര്യം കണക്കിലെടുത്താണ് ഡാമുകൾ തുറക്കാനുള്ള തീരുമാനം ഉണ്ടായതെന്ന് ജലവിഭവ മന്ത്രി റോഷി അഗസ്റ്റിൽ പറഞ്ഞു. സെക്കൻഡിൽ ഒരു ലക്ഷം ലീറ്റർ വെള്ളം ഇടുക്കി ഡാമിൽ നിന്നും തുറന്നുവിടും. നീരൊഴുക്ക് ശക്തമായതോടെയാണ് ഇടുക്കി ഡാം തുറക്കാൻ തീരുമാനിച്ചത്. ഇക്കാര്യത്തിൽ ആശങ്കയുടെ ആവശ്യമില്ല. മുൻ കരുതൽ നടപടികളാണ് സർക്കാർ കൈക്കൊള്ളുന്നതെന്നും മന്ത്രി പറഞ്ഞു. ഡാം തുറക്കുമ്പോൾ സെക്കൻഡിൽ ഒരു ലക്ഷം ലിറ്റർ വെള്ളമാണ് പുറത്തേക്കൊഴുകുക. 64 കുടുംബങ്ങളെ മാറ്റി താമസിപ്പിക്കുമെന്നും അദ്ദേഹം കൂട്ടിച്ചേർത്തു.
ഇടുക്കി ചെറുതോണി ഡാമിൻ്റെ മൂന്ന് ഷട്ടറുകൾ ചൊവ്വാഴ്ച രാവിലെ പതിനൊന്നിന് തുറക്കും. ഒരു ഷട്ടർ 100 സെന്റിമീറ്ററും രണ്ടു ഷട്ടറുകള്‍ 50 സെന്റിമീറ്റര്‍ വീതവും ഉയര്‍ത്തും. ചൊവ്വാഴ്ച രാവിലെ ഏഴിന് ജലനിരപ്പ് അപ്പർ റൂൾ കർവ് ആയ 2398.86 അടിയിലെത്തുമെന്നാണ് വിലയിരുത്തൽ. വെള്ളം തുറന്നുവിട്ട് ജലനിരപ്പ് 2395 അടിയിലേക്ക് താഴ്ത്തുകയാണ് ലക്ഷ്യം. ഇടുക്കി തുറക്കുന്നതിൻ്റെ ഭാഗമായി ഇടമലയാർ ഡാമും ചൊവ്വാഴ്ച രാവിലെ ആറിന് തുറക്കും. പരമാവധി 80 സെൻ്റിമീറ്ററാണ് ഷട്ടർ ഉയർത്തുന്നത്. പെരിയാറിൽ അനാവശ്യമായി ഇറങ്ങാൻ പാടില്ലെന്നും ജാഗ്രത പാലിക്കണമെന്നും ജില്ലാ ഭരണകൂടം വ്യക്തമാക്കിയിട്ടുണ്ട്.
സംസ്ഥാനത്ത് ബുധനാഴ്ച മുതൽ ശക്തമായ കാറ്റിനും മഴയ്ക്കും സാധ്യതയെന്ന് കേന്ദ്ര കാലാവസ്ഥാ നിരീക്ഷണ കേന്ദ്രതത്തിന്റെ റിപ്പോര്‍ട്ട്. ഇതിന്റെ പശ്ചാത്തലത്തിൽ, കേരള, കർണാടക, തമിഴ്‌നാട്, ലക്ഷദ്വീപ് തീരങ്ങളിൽ ഒക്ടോബർ 18 രാത്രി 11.30 വരെ 2.5 മുതൽ 3.3 മീറ്റർ വരെ ഉയർന്ന തിരമാലക്കും കടലാക്രമണത്തിനും സാധ്യതയുണ്ടെന്ന് ദേശീയ സമുദ്ര സ്ഥിതി പഠന ഗവേഷണ കേന്ദ്രം അറിയിച്ചു.
