ഇടുക്കി: ഇടുക്കി കൊക്കയാർപഞ്ചായത്തിലെ പൂഞ്ചിയിൽ ഉരുൾപൊട്ടി ഏഴ് പേരെ കാണാതായി. പതിനേഴോളം പേരെ രക്ഷപ്പെടുത്തിയതായാണ് പ്രദേശവാസികൾ നൽകുന്ന വിവരം.
നൂറിലധികം കുടുംബങ്ങൾ താമസിക്കുന്ന സ്ഥലത്തിന് സമീപമാണ് ഉരുൾപൊട്ടലുണ്ടായത്. അഞ്ച് വീടുകൾ ഒഴുകിപ്പോയിട്ടുണ്ട്. കനത്ത മഴ ഉണ്ടായിരുന്നില്ലെങ്കിലും മൂന്നിടത്ത് ഉരുൾ പൊട്ടലുണ്ടായതായാണ് സൂചനകൾ.
രക്ഷാപ്രവർത്തകർക്ക് കൊക്കയാറിലേക്ക് എത്താൻ സാധിക്കാത്തതിനാൽ നാട്ടുകാരുടെ നേതൃത്വത്തിലാണ് രക്ഷാപ്രവർത്തനം നടക്കുന്നത്.
റോഡുകൾ പൂർണമായും തകർന്നതിനാൽ ഈ മേഖല പൂർണമായും ഒറ്റപ്പെട്ട അവസ്ഥയിലാണുള്ളത്. മഴയും ഇരുട്ടും രക്ഷാപ്രവർത്തനത്തിന് തടസ്സമാവുന്നുണ്ടെന്നാണ് വിവരം.
കൂടുതൽ വിവരങ്ങൾ ലഭ്യമായിട്ടില്ല.
