ശക്തമായ മഴയിൽ വീടിനുള്ളിൽ വെള്ളം കയറിയെന്ന് അദ്ദേഹം പറഞ്ഞു. ഈരാറ്റുപേട്ടയിൽ ഇത്തരമൊരു സംഭവം ആദ്യമാണ്. ജനങ്ങൾ നേരിട്ട് രക്ഷാപ്രവർത്തനത്തിന് ഇറങ്ങുന്നുണ്ട്. പന്തളം, ചെങ്ങന്നൂർ, റാന്നി, കോന്നി, പാലാ, കോട്ടയം എന്നിവടങ്ങളിലുള്ളവർ ജാഗ്രത പുലർത്തണമെന്നും അദ്ദേഹം പറഞ്ഞു.
“ശക്തമയ മഴയിൽ കൂട്ടിക്കൽ പഞ്ചായത്തിൽ മൂന്ന് പേരുടെ മരണം സംഭവിച്ചിട്ടുണ്ട്. എൻ്റെ വീട്ടിൽ ഉൾപ്പെടെ വെള്ളം കയറുന്ന ആദ്യ സംഭവമാണിത്. പൂഞ്ഞാർ പള്ളിയുടെ മുന്നിൽ വെള്ളം കയറി റോഡ് മുഴുവൻ ബ്ലോക്കായി. കൂട്ടിക്കൽ പഞ്ചായത്തിലെ പ്ലാപ്പള്ളിയിൽ ഉരുൾപൊട്ടലുണ്ടായി. ഇവിടെ മൂന്ന് മരണം സംഭവിച്ചു. തെടനാട് പഞ്ചായത്തിലും വെള്ളം ഉയർന്ന നിലയിലാണ്. ഇതുവരെ ഉണ്ടാകാത്ത സാഹചര്യമാണ് മുണ്ടക്കയത്ത് ഉണ്ടായിരിക്കുന്നത്. പന്തളം, റാന്നി, ചെങ്ങന്നൂർ ഭാഗത്തെ ആളുകൾ ശ്രദ്ധിക്കണം” – എന്നും പറഞ്ഞു.
അതേസമയം, പൂഞ്ഞാര്‍ സെന്റ് മേരീസ് പള്ളിയ്ക്ക് മുന്നില്‍ കെഎസ്ആര്‍ടിസി ബസ് മുങ്ങി. പാലായിൽ നിന്നും ഈരാറ്റുപേട്ടയ്ക്ക് പോയ ബസ് പള്ളിക്ക് മുന്നിലെ വലിയ വെള്ളക്കെട്ട് കടക്കാന്‍ ശ്രമിക്കുന്നതിനിടെയാണ് പകുതിയോളം വെള്ളത്തില്‍ മുങ്ങിയത്. ബസില്‍ കുട്ടികളും പ്രായമായവരും അടക്കം 30 ഓളം യാത്രക്കാർ ഉണ്ടായിരുന്നു. പ്രദേശവാസികളുടെ സമയോചിതമായ ഇടപെടൽ മൂലം വലിയ അപകടമാണ് ഒഴിവായത്. ബസ് വെള്ളക്കെട്ടിൽ അകപ്പെട്ട സ്ഥലത്ത് ഒരാള്‍ പൊക്കത്തോളം വെള്ളമാണ് ഉണ്ടായിരുന്നത്. ഈ പ്രദേശത്ത് വെള്ളം കയറിയതിനാൽ 16 ഓളം കുടുംബങ്ങളെ മാറ്റി താമസിപ്പിച്ചിട്ടുണ്ട്. പൂഞ്ഞാർ കെഎസ്ആർടിസി ബസ് സ്റ്റാൻഡിനു വെള്ളംകയറിയതിനാൽ ബസുകൾ മാറ്റി പാർക്ക് ചെയ്യാനുള്ള ശ്രമത്തിലാണ്.
