തിരുവനന്തപുരം: എംഎൽഎമാർ കരാറുകാരെ കൂട്ടികാണാൻ വരുന്നതുമായി ബന്ധപ്പെട്ട പ്രസ്താവനയിൽ മന്ത്രി മുഹമ്മദ് റിയാസിനെ പിന്തുണച്ച് സിപിഎം സംസ്ഥാന സെക്രട്ടറി എ. വിജയരാഘവൻ. റിയാസ് പറഞ്ഞത് പാർട്ടിയുടെയും മുന്നണിയുടെയും പൊതുസമീപനമാണെന്നും പൊതുനിലപാടിന് അനുസൃതയാണ് മന്ത്രിയുടെ പ്രതികരണമെന്നും വിജയരാഘവൻ പറഞ്ഞു.
സർക്കാരും മന്ത്രിമാരുടെ ഓഫീസും എങ്ങനെ പ്രവർത്തിക്കണമെന്നത് സംബന്ധിച്ച് വ്യക്തമായ സമീപനം സിപിഎമ്മിനുണ്ട്. ശുപാർശകളില്ലാതെ തന്നെ കാര്യങ്ങൾ വേഗത്തിൽ നടക്കണമെന്നാണ് പാർട്ടിയുടെ സമീപനം. ഭരണഘടനാ സ്ഥാപനമെന്ന നിലയിൽ സർക്കാർ ഇക്കാര്യത്തിൽ സാധ്യമായതെല്ലാം ചെയ്യുമെന്നും വിജയരാഘവൻ വ്യക്തമാക്കി.
എംഎൽഎമാർ കരാറുകാരെ കൂട്ടികാണാൻ വരരുതെന്ന റിയാസിന്റെ നിയമസഭാ പ്രസംഗത്തിലെ പരാമർശത്തിനെതിരേ സിപിഎമ്മിനുള്ളിൽ നിന്നുതന്നെയാണ് വിമർശനം ഉയർന്നത്. അതേസമയം, പാർട്ടി നേതൃത്വവുമായുള്ള ചർച്ചയ്ക്ക് ശേഷം തന്റെ പ്രസ്താവനയിൽ ഉറച്ച് നിൽക്കുന്നുവെന്നും ഒരടി പിന്നോട്ടില്ലെന്നും റിയാസ് വെള്ളിയാഴ്ച പ്രതികരിച്ചിരുന്നു. ഇതിനുപിന്നാലെയാണ് മന്ത്രിയെ പിന്തുണച്ച് പാർട്ടി സെക്രട്ടറിയുടെ പ്രതികരണം.
content highlights: minister riyas statement is CPMs general approach says vijayaraghavan
