മലപ്പുറം: ഏറെനാളായി മണ്ഡലത്തിലും നിയമസഭയിലും കാണാനില്ലെന്ന പ്രതിപക്ഷ പരിഹാസങ്ങൾക്ക് മറുപടിയുമായി പി.വി. അൻവർ എം.എൽ.എ. ഞാൻ തിരിച്ചെത്തി എന്ന ഫെയ്സ്ബുക്ക് കുറിപ്പോടെയാണ് അൻവറിന്റെ പ്രതികരണം. സി.പി.എം. അണികൾക്കൊപ്പം കാറിൽ സഞ്ചരിക്കുന്ന ചിത്രത്തോടെയാണ് അൻവറിന്റെ രണ്ട് വാക്കുകളിലുള്ള കുറിപ്പ്.
ഫെയ്സ്ബുക്ക് കുറിപ്പിന് താഴെ പരിഹാസങ്ങളായി വരുന്ന ട്രോളുകൾക്ക് കുറിക്കുകൊള്ളുന്ന മറുപടിയും എം.എൽ.എ. നൽകുന്നുണ്ട്.
ഈ പ്രാവശ്യം പരിവാരങ്ങൾ ഒന്നുമില്ലേ, കാശുകൊടുത്താൽ ബംഗാളികളെ കിട്ടുമെന്ന ചോദ്യത്തോട് ബംഗാളികൾക്കുള്ള വില പോലും നിനക്കൊന്നും രണ്ട് ടേമായി നിലമ്പൂരുകാർ തന്നിട്ടില്ലല്ലോ എന്നാണ് അൻവർ മറുപടി നൽകിയത്. ഓണം ആകുന്നതേയുള്ളു, മാവേലി നേരത്തെയാണല്ലോ എന്ന പരിഹാസത്തിന് മാവേലി എന്ന് വന്നാലും ആ ഒരൊറ്റ ദിവസം മാത്രം മതി കുഞ്ഞേ മാവേലിക്ക് എന്നും അൻവർ മറുപടി നൽകി.
അൻവർ നിയമസഭയിൽ നിന്ന് വിട്ടുനിന്നത് പ്രതിപക്ഷം വലിയ ചർച്ചയാക്കിയിരുന്നു.എം.എൽ.യ്ക്കെതിരേ നടപടി വേണമെന്നും പ്രതിപക്ഷം ആവശ്യപ്പെട്ടിരുന്നു. നിയമസഭയുടെ ഒന്നാം സമ്മേളനത്തിൽ അഞ്ച് ദിവസം മാത്രമാണ് അൻവർ പങ്കെടുത്തത്. രണ്ടാം സമ്മേനത്തിൽ പങ്കെടുത്തിരുന്നുമില്ല. മൂന്നാം സമ്മേളനത്തിലും അൻവർ എത്താതിരുന്നതോടെയാണ് പ്രതിപക്ഷം വിമർശനങ്ങൾ കടുപ്പിച്ചത്.
content highlights:pv anvar facebook post
