രണ്ട് ഡോസ് വാക്സിനെടുത്ത വിദ്യാര്‍ഥികള്‍ക്കു മാത്രമാണ് ഇപ്പോള്‍ കോളേജിൽ വരാൻ അനുമതിയുള്ളത്. രണ്ടാം ഡോസിനായി കാത്തിരിക്കുന്ന കുട്ടികളെയും കോളേജിലെത്തിക്കാനും കൊവിഡ് അവലോകന യോഗത്തിൽ തീരുമാനമായി. അതേസമയം, വാക്സിനോടു മുഖം തിരിച്ചു നിൽക്കുന്ന വിദ്യാര്‍ഥികള്‍ക്കും അധ്യാപകര്‍ക്കും ബോധവത്കരണം നല്‍കാനും കൊവിഡ് 19 അവലോകനയോഗത്തിൽ മുഖ്യമന്ത്രി നിര്‍ദേശം നല്‍കി.
സംസ്ഥാനത്ത് സ്കൂളുകള്‍ തുറക്കാൻ രണ്ടാഴ്ച മാത്രം ബാക്കി നിൽക്കേയാണ് സര്‍ക്കാര്‍ ഇക്കാര്യങ്ങള്‍ പരിശോധിച്ചത്. വിദ്യാര്‍ഥികള്‍ക്ക് കൗൺസിലിങ് ഉറപ്പു വരുത്താനുള്ള നടപടികള്‍ സ്വീകരിക്കാൻ മുഖ്യമന്ത്രി പിണറായി വിജയൻ നിര്‍ദേശം നല്‍കി. കൊവിഡ് കാലത്ത് കുട്ടികള്‍ക്ക് സ്കൂളിലെത്താൻ സാധിക്കാത്തതിനു പുറമെ കൂട്ടുകാരെയും നഷ്ടപ്പെട്ട സാഹചര്യമാണുള്ളത്. ചിലര്‍ പ്രത്യേക മാനസികാവസ്ഥയിലായിരിക്കാൻ സാധ്യതയുണ്ട്. ഇവര്‍ക്ക് കൗൺസിലിങ് ആവശ്യമാണെന്നും സ്കൂളുകളിലും കോളേജുകളുിലും കൗൺസിലര്‍മാര്‍ ഉണ്ടാകണമെന്നും അദ്ദേഹം നിര്‍ദേശം നല്‍കി.
Also Read:
വിദ്യാര്‍ഥികളുടെ സുരക്ഷ ഉറപ്പാക്കാനുള്ള പരിശോധനകളും നടത്തണമെന്ന് അദ്ദേഹം നിര്‍ദേശിച്ചു. ഒന്നര വര്‍ഷമായി അടഞ്ഞു കിടക്കുന്ന സ്കൂള്‍ കെട്ടിടങ്ങളുടെ ഫിറ്റ്നസ് ഉറപ്പാക്കണം. കൂടാതെ കുട്ടികളെ സ്കൂളിലെത്തിക്കുന്ന വാഹനങ്ങളുടെ ഫിറ്റ്നസും ഉറപ്പാക്കണം. കുട്ടികളുടെ യാത്രാസൗകര്യം വര്‍ധിപ്പിക്കാനായി സംസ്ഥാനത്ത് എല്ലായിടത്തും ബസ് സര്‍വീസുകളുടെ എണ്ണം കൂട്ടാൻ ആവശ്യമായ നടപടികള്‍ സ്വീകരിക്കാനും മുഖ്യമന്ത്രി നിര്‍ദേശം നല്‍കി. കൊവിഡ് സാഹചര്യത്തിൽ കുട്ടികള്‍ക്ക് സ്കൂളിലെത്താൻ യൂണിഫോം നിര്‍ബന്ധമാക്കില്ല.
Also Read:
അതേസമയം, സംസ്ഥാനത്ത് പൊതുപരിപാടികള്‍ക്ക് ഏര്‍പ്പെടുത്തിയിട്ടുള്ള നിയന്ത്രണങ്ങളിൽ മാറ്റമുണ്ടാകില്ല. പ്രത്യേക അനുമതി വാങ്ങിയ ശേഷമേ ഇളവു നല്‍കിയിട്ടുള്ള പരിപാടികള്‍ക്ക് അനുമതി ലഭിക്കൂ. ഒക്ടോബര്‍ 25 മുതൽ സംസ്ഥാനസര്‍ക്കാരിൻ്റെ പുരാവസ്തു വകുപ്പിനു കീഴിലുള്ള മ്യൂസിയങ്ങള്‍, സ്മാരകങ്ങള്‍, മറ്റു സ്ഥാപനങ്ങള്‍ എന്നിവ തുറന്നു പ്രവര്‍ത്തിക്കും.
സ്കൂളുകള്‍ തുറക്കുന്നതിനു മുന്നോടിയായി സര്‍ക്കാര്‍ മാര്‍ഗരേഖകളും പുറത്തിറക്കിയിരുന്നു. കുട്ടികള്‍ സ്കൂളിലെത്തേണ്ടത് രക്ഷകര്‍ത്താക്കളുടെ സമ്മതത്തോടെയായിരിക്കണമെന്നും സ്കൂളുകളിൽ കൊവിഡ് 19 പ്രോട്ടോകോള്‍ പാലിക്കണമെന്നും മാനദണ്ഡങ്ങളിൽ വ്യക്തമാക്കുന്നു. ഒരു ക്ലാസിനെ പകുതിയായി വിഭജിച്ച് കുട്ടികളുടെ എണ്ണം കുറയ്ക്കണം. രാവിലെ 9നും 10നും ഇടയ്ക്ക് ക്ലാസുകള്‍ തുടങ്ങാം. ഒന്നാം ക്ലാസ് മുതൽ ഏഴാം ക്ലാസു വരെ ഒരു ബെഞ്ചിൽ രണ്ട് കുട്ടികള്‍ക്ക് വീതം ഇരിക്കാനാണ് അനുമതിയുള്ളത്. നവംബര്‍ ഒന്ന് മുതൽ ആദ്യ ഒരാഴ്ച ഉച്ച വരെ മാത്രമായിരിക്കും ക്ലാസുകള്‍ ഉണ്ടായിരിക്കുക. പൊതു അവദി ദിവസങ്ങള്‍ ഒഴികെ ശനിയാഴ്ചകളിലും ക്ലാസ് ഉണ്ടായിരിക്കും.
