പോലീസുകാര് ഹണിട്രാപ്പിൽ കുടുങ്ങാതിരിക്കാൻ ജാഗ്രത വേണമെന്നാണ് ഡിജിപിയുടെ പ്രധാന നിര്ദേശം. സര്ക്കാരിതര പരിപാടികളിൽ പങ്കെടുക്കുന്നതിനു മുൻപ് നിര്ബന്ധമായും ഇൻ്റലിജൻസ് പരിശോധന നടത്തണമെന്നും പരിശോധനയ്ക്കു ശേഷം ഇത്തരം പരിപാടികളിൽ പങ്കെടുക്കുമ്പോള് യൂണിഫോം ധരിക്കരുതെന്നുമാണ് നിര്ദേശം.
Also Read:
റിയൽ എസ്റ്റേറ്റ്, ബ്ലേഡ്, മണൽ, മണ്ണ് മാഫിയകളുമായുള്ള ബന്ധം ഉദ്യോഗസ്ഥര് പൂര്ണമായും ഒഴിവാക്കണമെന്ന് ഡിജിപി നിര്ദേശിച്ചു. സ്റ്റേഷനുകളിൽ പരാതി നല്കാനായി എത്തുന്നവരെക്കൊണ്ട് സ്റ്റേഷണറി സാധനങ്ങള് വാങ്ങിപ്പിക്കുന്നത് ഒഴിവാക്കണമെന്നും ഡിജിപി നിര്ദേശിച്ചു. അത്യാവശ്യ സന്ദര്ഭങ്ങളിൽ ഇതിനായി ഉപയോഗിക്കുന്നത് സ്റ്റേഷനുകള്ക്ക് നല്കുന്ന അഡ്വാൻസ് തുകയാണെന്ന് ഉന്നത ഉദ്യോഗസ്ഥര് ഉറപ്പാക്കണമെന്നും അദ്ദേഹം നിര്ദേശിച്ചു. സ്റ്റേഷൻ ഹൗസ് ഓഫീസര് മുതലുള്ള എല്ലാ ഉദ്യോഗസ്ഥരും പൊതുജനങ്ങളോടു മാന്യമായി പെരുമാറണമെന്നും മര്യാദ വിട്ടു പെരുമാറുന്ന ഉദ്യോഗസ്ഥര്ക്കെതിരെ മേലുദ്യോഗസ്ഥര് നടപടി സ്വീകരിക്കണമെന്നും നിര്ദേശമുണ്ട്.
Also Read:
സ്റ്റേഷനുകളിൽ എത്തുന്ന ഒരു പരാതിയും അവഗണിക്കാൻ പാടില്ലെന്നും ഡിജിപി വ്യക്തമാക്കി. നടപടി സ്വീകരിക്കാൻ കഴിയാത്ത പരാതികളിൽ ഇവയുടെ നിയമവശം ചൂണ്ടിക്കാട്ടി പരാതികള്ക്ക് മറുപടി നല്കണമെന്നും ഡിജിപി പോലീസ് ഉദ്യോഗസ്ഥരെ അറിയിച്ചു. പരിഷ്കൃതസമൂഹത്തിനു യോജിച്ച രീതിയിലായിരിക്കണം സ്റ്റേഷനിലെത്തുന്നവരോട് ഉദ്യോഗസ്ഥര് പെരുമാറേണ്ടത്. ഉദ്യോഗസ്ഥരുടെ ഭാഷയും പെരുമാറ്റവും ഇത്തരത്തിലായിരിക്കണം. സ്ത്രീകള്ക്കും കുട്ടികള്ക്കുമെതിരെ നടക്കുന്ന അതിക്രമങ്ങള് സംബന്ധിച്ച പരാതികള്ക്കായി പ്രത്യേക രജിസ്റ്റര് തയ്യാറാക്കണമെന്നും ഈ പരാതികളിൽ കൃത്യമായ നിയമനടപടി സ്വീകരിച്ചെന്ന് എസ് എച്ച് ഓ ഉറപ്പു വരുത്തണമെന്നും ഡിജിപി കൂട്ടിച്ചേര്ത്തു. ഇക്കാര്യങ്ങള് മാസം തോറും എസ് പി മാര് ചര്ച്ച ചെയ്യുകയും വേണം. കുട്ടികള്ക്കു വേണ്ടിയുള്ള അതിക്രമങ്ങളിൽ കാലതാമസമില്ലാതെ നടപടി സ്വീകരിക്കണം.
പ്രോസിക്യൂഷൻ കൃത്യമായി നടക്കുന്നുണ്ടോ എന്നു പരിശോധിക്കണമെന്നും ഡിജിപി നിര്ദേശിച്ചു. സൈബര് കുറ്റകൃത്യങ്ങളിലും കൃത്യമായ നടപടിയുണ്ടാകണം. ഇത്തരം പരാതികളിൽ സാധ്യമായ എല്ലാ നടപടികളും സ്വീകരിക്കണമെന്ന് ഡിജിപി അറിയിച്ചു. മാധ്യമങ്ങള് സൈബര് നിയമങ്ങള് ലംഘിച്ചാലും നടപടിയെടുക്കണമന്നും സര്ക്കുലറിൽ വ്യക്തമാക്കുന്നുണ്ട്.
സ്റ്റേഷനിലെത്തുന്ന പരാതിക്കാരോടു മാന്യമായി പെരുമാറണമെന്ന് മുൻപും ഡിജിപി പോലീസുകാരോടു നിർദേശിച്ചിട്ടുണ്ട്. സ്റ്റേഷനിലെത്തുന്ന പരാതിക്കാരോട് എടാ, പോടാ വിളി ഒഴിവാക്കണമെന്നായിരുന്നു നിർദേശം.
മോൻസൺ മാവുങ്കലുമൊത്ത് മുൻ ഡിജിപി ലോക്നാഥ് ബെഹ്റ അടക്കമുള്ളവർ നിൽക്കുന്ന ചിത്രങ്ങൾ പുറത്തു വരികയും സമൂഹമാധ്യമങ്ങളിൽ പോലീസ് വിമർശിക്കപ്പെടുകയും ചെയ്തതിനു പിന്നാലെയാണ് മുഖ്യമന്ത്രി ഉദ്യോഗസ്ഥരുടെ യോഗം വിളിച്ചത്. സ്റ്റേഷൻ ഹൌസ് ഓഫീസർമാർ മുതൽ ഡിജിപി വരെയുള്ളവർ യോഗത്തിൽ പങ്കെടുത്തിരുന്നു.
