മുഖ്യമന്ത്രിയുടെ നേതൃത്വത്തിൽ നടക്കുന്ന യോഗത്തിൽ വിവിധ വിഷയങ്ങൾ ചർച്ചയാകുമെങ്കിലും പവർക്കട്ട് വേണോ എന്ന കാര്യത്തിനാകും പ്രധാന പരിഗനന. ദേശീയ തലത്തിൽ കൽക്കരി ക്ഷാമം രൂക്ഷമാകുന്നതാണ് കേരളത്തിലെ വൈദ്യുതി പ്രതിസന്ധിയുടെ ആക്കം കൂട്ടുന്നത്. കോഴിക്കോട് ഡീസൽ താപനിലയത്തിൻ്റെ പ്രവർത്തനത്തിന് ഇന്ധനം ബിപിസിഎല്ലിനോട് ആവശ്യപ്പെടാനാണ് കെഎസ്ഇബിയുടെ നീക്കം.
സംസ്ഥാനത്ത് പവർക്കട്ട് സാധ്യത തള്ളാതെയുള്ള പ്രതികരണമാണ് മന്ത്രി കഴിഞ്ഞ ദിവസം നടത്തിയത്. കേന്ദ്രത്തിൽ നിന്നും ആയിരം മെഗാവാട്ടാണ് കിട്ടേണ്ടതെങ്കിലും അതിൽ കുറവുണ്ടായി. ഇതിനൊപ്പം മറ്റ് സംസ്ഥാനങ്ങളിൽ നിന്നും ലഭിക്കുന്ന വൈദ്യുതിയുടെ അളവിലും കുറവുണ്ടായി. കൂടം കുളത്ത് നിന്ന് ലഭിക്കേണ്ടതിൻ്റെ മുപ്പത് ശതമാനം വൈദ്യുതി മാത്രമാണ് ലഭിക്കുന്നത്. ഈ സാഹചര്യം തുടർന്നാൽ പവർക്കട്ട് വേണ്ടിവരുമെന്നും അദ്ദേഹം പറഞ്ഞിരുന്നു. ഏർപ്പെടുത്തിയാൽ വ്യവസായ മേഖലകളെ ബാധിക്കാത്ത തരത്തിലായിരിക്കുമെന്ന് അദ്ദേഹം കൂട്ടിച്ചേർത്തിരുന്നു.
സംബന്ധിച്ച് കെ എസ് ഇ ബി കാര്യങ്ങള്‍ കൃത്യമായി നിരീക്ഷിച്ചുവരികയാണ്. ജനങ്ങള്‍ വൈദ്യുതി ഉപയോഗം നിയന്ത്രിക്കണമെന്ന് കെഎസ്ഇബി ആവശ്യപ്പെട്ടിട്ടുണ്ടെന്നും മന്ത്രി പറഞ്ഞു. കേരളത്തിൽ മഴ തുടരുന്നതിനാൽ വലിയ തോതിലുള്ള വൈദ്യുതി ഉപയോഗം കുറയുന്നുണ്ടെങ്കിലും അടുത്ത വേനൽക്കാലമാകുമ്പോൾ പ്രതിസന്ധി തുടർന്നാൽ വൈദ്യുതിക്ക് വലിയ ക്ഷാമം നേരിടേണ്ടി വരുമെന്നാണ് വിലയിരുത്തൽ. കൽക്കരി ക്ഷമത്തെ തുടര്‍ന്ന് കേരളത്തിലേക്ക് എത്തുന്ന വൈദ്യുതിയിലും കുറവുണ്ടായിട്ടുണ്ട്. എനര്‍ജി എക്സ്ചേഞ്ചിൽ നിന്നും വൈദ്യുതി വാങ്ങിയാണ് കേരളം തത്കാലം പ്രതിസന്ധി മറികടക്കുന്നത്.
കൽക്കരിക്ഷാമം രൂക്ഷമായതോടെ ഉത്തര്‍പ്രദേശ്, രാജസ്ഥാന്‍, പഞ്ചാബ്, ഡല്‍ഹി, ആന്ധ്ര, ഒഡീഷ തുടങ്ങിയ സംസ്ഥാനങ്ങളിൽ പ്രതിസന്ധി രൂക്ഷമായെന്നാണ് റിപ്പോർട്ടുകൾ പറയുന്നത്. പഞ്ചാബ്, രാജസ്ഥാന്‍ എന്നീ സംസ്ഥാനങ്ങളിൽ പവർകട്ട് ഏർപ്പെടുത്തുകയും ചെയ്തിട്ടുണ്ട്. യുപിയിൽ ഗ്രാമീണ മേഖലകളിൽ വൈദ്യുത നിയന്ത്രണം ഏർപ്പെടുത്തി. ഡൽഹിയിലും സമാന സാഹചര്യമാണ് നിലനിൽക്കുന്നത്. ഡൽഹി, ഗുജറാത്ത്, പഞ്ചാബ്, രാജസ്ഥാൻ, ഡൽഹി, തമിഴ്നാട് എന്നീ സംസ്ഥാനങ്ങള്‍ ബ്ലാക്ക് ഔട്ട് മുന്നറിയിപ്പ് നൽകിയിരിക്കുകയാണ്. കൽക്കരി വിതരണത്തിൽ വൈകാതെ പുരോഗതിയുണ്ടാകുമെന്നാണ് കേന്ദ്ര സര്‍ക്കാരിന്‍റെ വിശദീകരണം. ഡൽഹി മുഖ്യമന്ത്രി അരവിന്ദ് കെജ്രിവാൾപ്രധാനമന്ത്രി നരേന്ദ്ര മോദിക്ക് ഇത് സംബന്ധിച്ച് കത്തയച്ചു. പവർ പ്ലാന്‍റുകളിലേക്കുള്ള കൽക്കരി വിതരണം മെച്ചപ്പെട്ടില്ലെങ്കിൽ അടുത്ത രണ്ട് ദിവസത്തിനുള്ളിൽ ദേശീയ തലസ്ഥാനം “ഒരു ബ്ലാക്ക്ഔട്ട് നേരിടേണ്ടിവരും” എന്നാണ് അദ്ദേഹം മുന്നറിയിപ്പ് നൽകിയിരിക്കുന്നത്.
ഡൽഹിയിലെ രണ്ട് വൈദ്യുതി നിലയങ്ങളില്‍ ഉത്പാദനത്തിനായി ഗ്യാസ് എത്തിക്കുമെന്ന് ഓയിൽ മന്ത്രാലയം അറിയിച്ചു. പല സംസ്ഥാനങ്ങളിലും 14 മണിക്കൂര്‍ വരെയാണ് അനൗദ്യോഗിക പവര്‍ കട്ടുണ്ടെന്നാണ് ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നത്. മതിയായ വൈദ്യുതിയുണ്ടെന്നാണ് സര്‍ക്കാര്‍ വാദമെങ്കിലും പവര്‍കട്ട് രൂക്ഷമാണെന്നാണ് മാധ്യമങ്ങള്‍ റിപ്പോര്‍ട്ട് ചെയ്യുന്നത്.
