കൂളിങ് ഗ്ലാസ്സിനെ ഫേസ് ഷീൽഡാക്കിയാണ് ZGHYBD എന്ന് പേരുള്ള കമ്പനി വിപണിയിൽ എത്തിച്ചിരിക്കുന്നത്. കാഴ്ച്ചയിൽ ഫേസ്ഷീൽഡ് ആണെങ്കിലും ZGHYBD കമ്പനി പറയുന്നത് ഇത് പുതിയ കാലഘട്ടത്തിനനുസരിച്ചുള്ള കൂളിങ് ഗ്ലാസ് ആണെന്നാണ്. കണ്ണ് മാത്രമല്ല മൂക്കും, വായും കവിളും എല്ലാം ഈ കൂളിങ് ഗ്ലാസ് മറയ്ക്കും. ഒറ്റ നോട്ടത്തിൽ ഒരു അന്യഗൃഹജീവി വരുന്നതുപോലെ തോന്നിയാൽ കുറ്റം പറയാൻ പറ്റില്ല.
ഡിസൈൻബൂമിന്റെ റിപ്പോർട്ട് അനുസരിച്ച് കൂളിങ്ഗ്ലാസ്സുകൾ പോളികാർബണേറ്റ് കൊണ്ടാണ് നിർമ്മിച്ചിരിക്കുന്നത്. പോളറൈസ്ഡ് പ്രൊട്ടക്റ്റീവ് ഫെയ്സ് ഷീൽഡിലും യുവി പ്രൊട്ടക്ഷൻ ലെൻസ് ക്രമീകരിച്ചിട്ടുണ്ട്. സൺഗ്ലാസുകൾ ധരിക്കുന്നയാളുടെ മുഖത്തെ കാറ്റിൽ നിന്നും പൊടിയിൽ നിന്നും സംരക്ഷിക്കും. മൂടൽമഞ്ഞുള്ള സാഹചര്യങ്ങളിൽ പോലും ഈർപ്പം പിടിക്കില്ലത്രേ. പൊടിപടലങ്ങൾ, പുക, വെയിൽ എന്നിവയിൽ നിന്നും ധരിക്കുന്ന വ്യക്തിയുടെ മുഖത്തിന് പൂർണമായ സംരക്ഷണമാണ് ZGHYBD കമ്പനിയുടെ സൺഗ്ലാസ് ഒരുക്കുന്നത്.
2000 ജാപ്പനീസ് യെൻ (ഏകദേശം 1350 രൂപ) ആണ് ZGHYBD കമ്പനിയുടെ പുത്തൻ കൂളിങ് ഗ്ലാസിന്റെ വില. ഇ-കൊമേഴ്‌സ് വെബ്‌സൈറ്റായ ആമസോണിൽ ഈ കൂളിങ് ഗ്ലാസ് ലഭ്യമാണ്. പല വലിപ്പത്തിലുള്ള സൺഗ്ലാസുകളുടെ ഈ ഫാഷൻ കമ്പനി വിപണിയിൽ അവതരിപ്പിച്ചിട്ടുണ്ടെങ്കിലും, ആവശ്യത്തിന് ഉപഭോക്താക്കളുണ്ടാകുമോ എന്നതാണ് ഇപ്പോൾ സംശയം.
