ബിസിനസ് ചെയ്യാനാണ് പോകുന്നതെങ്കിൽ എംഎൽഎ ആയിരിക്കേണ്ട കാര്യമില്ലെന്ന് സതീശൻ പറഞ്ഞു. രാജിവെച്ചു പോകുന്നതാണ് അൻവറിനു നല്ലതെന്നും അദ്ദേഹം വ്യക്തമാക്കി.
പതിനഞ്ചാം നിയമസഭയുടെ മൂന്നാം സമ്മേളനം നടന്നു കൊണ്ടിരിക്കുന്നതിനിടെയാണ് എൽഡിഎഫ് എംഎൽഎയ്ക്കെതിരെ പ്രതിപക്ഷത്തിൻ്റെ ആക്രമണം. ഇതുവരെ അഞ്ച് ദിവസം മാത്രമാണ് അൻവര്‍ സഭയിലെത്തിയതെന്നും അൻവര്‍ സഭയിൽ ഹാജരാകാതിരിക്കുന്നതിനു അവധി അപേക്ഷ പോലും നല്‍കിയിട്ടില്ലെന്നുമാണ് വിവരാവകാശ രേഖകള്‍ ഉദ്ധരിച്ച് ഏഷ്യാനെറ്റ് ന്യൂസ് റിപ്പോര്‍ട്ട് ചെയ്യുന്നത്. സംസ്ഥാന സര്‍ക്കാരും എൽഡിഎഫും ഇക്കാര്യത്തിൽ നിലപാട് വ്യക്തമാക്കണമെന്നും ആരോഗ്യകാരണങ്ങള്‍ മൂലമാണ് സഭയിൽ നിന്ന് വിട്ടുനിൽക്കുന്നതെങ്കിൽ അതു മനസ്സിലാക്കാമെന്നും വിഡി സതീശൻ മാധ്യമങ്ങളോടു പറഞ്ഞു.
Also Read:
പതിനഞ്ചാം കേരള നിയമസഭയുടെ മൂന്നാം സമ്മേളനം ആരംഭിച്ചതിനു ശേഷം ഇതുവരെ പിവി അൻവര്‍ നിയമസഭാ സമ്മേളനത്തിൽ പങ്കെടുത്തിട്ടില്ലെന്നാണ് റിപ്പോര്‍ട്ടുകള്‍. മുൻപ് എംഎൽഎയെ മണ്ഡലത്തിൽ കാണാനില്ലെന്നു കാണിച്ച് യൂത്ത് കോൺഗ്രസ് പരാതിയുമായി എത്തിയിരുന്നു. അൻവറിൻ്റെ അസാന്നിധ്യം പ്രതിപക്ഷം ചര്‍ച്ചയാക്കുന്നതിനിടെ താൻ ആഫ്രിക്കയിലാണെന്നും ബിസിനസ്ആവശ്യങ്ങള്‍ക്കായി എത്തിയതാണെന്നും കാണിച്ച് പിവി അൻവര്‍ രംഗത്തെത്തുകയും ചെയ്തിരുന്നു. ഇത് വലിയ രാഷ്ട്രീയ വിവാദത്തിനു വഴിവെച്ചതിനു പിന്നാലെയാണ് വീണ്ടും എംഎൽഎയുടെ അസാന്നിധ്യം പ്രതിപക്ഷം ആയുധമാക്കുന്നത്.
Also Read:
ഈ സര്‍ക്കാര്‍ ചുമതലയേറ്റ ശേഷം നടന്ന ആദ്യ നിയമസഭാ സമ്മേളനം 12 ദിവസമായിരുന്നു ണ്ടായിരുന്നത്. ഇതിൽ അഞ്ച് ദിവസം മാത്രമാണ് അൻവര്‍സഭയിലെത്തിയത്. പതിനേഴ് ദിവസം നീണ്ട രണ്ടാമത്തെ സമ്മേളനത്തിലാകട്ടെ ഒറ്റ ദിവസം പോലും പി വി അൻവര്‍ സഭയിലെത്തിയില്ല. അതേസമയം, രണ്ട് തവണയും നിയമസഭാ സമ്മേളനത്തിൽ നിന്ന് വിട്ടു നിന്നപ്പോഴും അൻവര്‍ ഒരു അവധി അപേക്ഷ പോലും നല്‍കിയിട്ടില്ലെന്നാണ് നിയമസഭാ സെക്രട്ടറിയേറ്റിലെ രേഖകള്‍ വ്യക്തമാക്കുന്നതെന്ന് ചാനലിൻ്റെ റിപ്പോര്‍ട്ടിൽ പറയുന്നു. ഇതിനു പിന്നാലെയാണ് പ്രതിപക്ഷത്തിൻ്റെ പ്രതിഷേധം.
നിലമ്പൂരിൽ നിന്നുള്ള എംഎൽഎയായ പി വി അൻവര്‍ മൂന്ന് നിയമസഭാ സമിതികളിലും അംഗമാണ്. സര്‍ക്കാര്‍ നല്‍കുന്ന ഉറപ്പുകള്‍ സംബന്ധിച്ച സമിതി രണ്ട് തവണയും മറ്റു സമിതികള്‍ മൂന്ന് തവണ വീതവുമാണ് യോഗം ചേര്‍ന്നത്. ഈ സമിതികളുടെ യോഗങ്ങളിലൊന്നും അൻവര്‍ പങ്കെടുത്തിട്ടില്ലെന്ന് റിപ്പോര്‍ട്ടിൽ പറയുന്നു. തുടര്‍ച്ചയായ 60 ദിവസം എംഎൽഎ നിയമസഭാ സമ്മേളനത്തിൽ പങ്കെടുത്തില്ലെങ്കിൽ അംഗത്തെ അയോഗ്യനാക്കാൻ ഭരണഘടനയുടെ 194-ാം വകുപ്പ് പ്രകാരം സഭയ്ക്ക് അധികാരമുണ്ട്. ഈ സാഹചര്യത്തിൽ ഈ മാസം പതിനഞ്ചാം തീയതിയോടു കൂടെ എംഎൽഎ നാട്ടിലെത്തുമെന്നും സഭയിൽ ഹാജരാകുമെന്നും അദ്ദേഹത്തിൻ്റെ ഓഫീസ് അറിയിച്ചിട്ടുണ്ട്.
ഇതിനിടയിൽ പി വി അൻവറിൻ്റെ നിയന്ത്രമത്തിലുള്ള കക്കടാംപൊയിലിലെ വാട്ടര്‍ തീം പാര്‍ക്കിലെ തടയണ പൊളിച്ചു നീക്കുമെന്ന് പഞ്ചായത്ത് അറിയിച്ചു. തടയണ പൊളിച്ചു നീക്കണമെന്ന ഓഗസ്റ്റ് 30ലെ ഹൈക്കോടതി ഉത്തരവിൻ്റെ അടിസ്ഥാനത്തിലാണ് നടപടി. പാര്‍ക്ക് അധികൃതര്‍ തടയണ പൊളിച്ചു നീക്കാത്ത സാഹചര്യത്തിലാണ് നടപടി. തടയണ പൊളിക്കാനുള്ള ചെലവ് അധികൃതരിൽ നിന്ന് ഈടാക്കുമെന്നും പഞ്ചായത്ത് സെക്രട്ടറി അറിയിച്ചിട്ടുണ്ട്. ഇതിനായി പഞ്ചായത്ത് പ്രസിഡൻ്റും സെക്രട്ടറിയും അടങ്ങുന്ന സംഘം സ്ഥലത്തെത്തി സ്ഥിതി വിലയിരുത്തി. തടയണയോടു ചേര്‍ന്ന് നിര്‍മിച്ചിട്ടുള്ള പാര്‍ക്കും നാശോന്മുഖമാണ്.
