പലതരം ഭക്ഷ്യവസ്തുക്കളിൽ ബട്ടർ ആവശ്യമുള്ളതിനാൽ, വിദഗ്ദ്ധരായ പാചകക്കാരും വീട്ടമ്മമാരും തങ്ങളുടെ ബട്ടർ ബ്രാൻഡിന്റെ കാര്യത്തിൽ ശ്രദ്ധാലുക്കളാണ്. എന്തു വിലകൊടുത്താലും, എപ്പോഴും ഇഷ്ടത്തിനനുസരിച്ചുള്ള വെണ്ണയാവും കൂടുതൽ പേരും തിരഞ്ഞെടുക്കുക. പാചക വിദഗ്ധരും റെസ്റ്റോറന്റുകളും ഇക്കാര്യത്തിൽ മുൻപന്തിലാണ്. എത്ര വിലയായാലും ഉദ്ദേശിച്ച അതെ ബട്ടർ തന്നെ അവർ തിരഞ്ഞെടുക്കും. എന്നും കരുതി ഒരു ബട്ടറിനായി 10,000 രൂപ ചിലവാക്കുമോ?
യുകെയിൽ നിന്നുള്ള ഒരു പ്രത്യേക തരം വെണ്ണ ലോകമെമ്പാടുമുള്ള ബട്ടർ ആരാധകരുടെ ശ്രദ്ധ പിടിച്ചു പറ്റുകയാണ്. റിഡിക്കുലസ് നമ്പർ 55 ലോബ്സ്റ്റർ ആൻഡ് ക്രാബ് ബട്ടർ എന്ന് പേരുള്ള ഈ ബ്രിട്ടീഷ് ബട്ടറിന് 95 പൗണ്ടാണ് വില. കൊഞ്ച്, ഡെവോൺ ഞണ്ട്, കാവിയാർ (വിലകൂടിയ മീൻ മുട്ട), നാരങ്ങ, പെരുംജീരകം എന്നീ ചേരുവകൾ ചേർത്തുണ്ടാക്കിയ റിഡിക്കുലസ് നമ്പർ 55 ലോബ്സ്റ്റർ ആൻഡ് ക്രാബ് ബട്ടറിന്റെ വില കൂടിയില്ലെങ്കിലല്ലേ അത്ഭുതമുള്ളൂ.
ചേരുവകൾ മാത്രമല്ല ഈ വെണ്ണയെ ഇത്രയധികം പ്രശസ്തമാക്കിയത്. ഈയിടെ ലോകത്തിലെ ഏറ്റവും മികച്ച ഭക്ഷണങ്ങളിലൊന്നായി തിരഞ്ഞെടുക്കപ്പെടുകയും ഈ വർഷത്തെ ഗ്രേറ്റ് ടേസ്റ്റ് അവാർഡിൽ മൂന്ന് സ്റ്റാർ റേറ്റിങ്ങും റിഡിക്കുലസ് നമ്പർ 55 ലോബ്സ്റ്റർ ആൻഡ് ക്രാബ് ബട്ടർ നേടി എന്ന് മെട്രോ.യുകെ റിപ്പോർട്ട് ചെയ്യുന്നു.
പടിഞ്ഞാറൻ ലണ്ടനിൽ നിന്നുള്ള കുടുംബം നടത്തുന്ന ബിസിനസ്സായ സബ്ലൈം ബട്ടർ ആണ് റിഡിക്കുലസ് നമ്പർ 55 ലോബ്സ്റ്റർ ആൻഡ് ക്രാബ് ബട്ടർ നിർമ്മിക്കുന്നത്. “ഗ്രേറ്റ് ടേസ്റ്റ് അവാർഡുകൾ ഭക്ഷണത്തിന്റെ ഓസ്കാർ പോലെയാണ്. ഞങ്ങൾക്ക് മൂന്ന് സ്റ്റാർ റേറ്റിംഗ് ലഭിച്ചതിൽ അഭിമാനമുണ്ട്” കമ്പനി സ്ഥാപകൻ ക്രിസ് മൈർ പറഞ്ഞു.
