കിറ്റ് വിതരണം നടത്തിയ റേഷൻ കട വ്യാപാരികൾക്ക് പ്രത്യേക കമ്മീഷൻ നൽകില്ല. അത് സേവനമായി കണക്കാക്കണമെന്നും മന്ത്രി നിയമസഭയിൽ പറഞ്ഞു. കിറ്റ് വിതരണം അവസാനിപ്പിക്കാൻ സർക്കാർ ഒരുങ്ങുന്നുവെന്ന വാർത്തകൾ പുറത്തുവന്ന പശ്ചാത്തലത്തിലാണ് ഭക്ഷ്യമന്ത്രി ജി ആർ അനിൽ നിലപാട് വ്യക്തമാക്കിയത്.
ഭക്ഷ്യക്കിറ്റിലെ ഏലക്ക അഴിമതി ആരോപണം മന്ത്രി തള്ളി. ഒരു രൂപയുടെ അഴിമതി പോലും ഇക്കാര്യത്തിൽ ഉണ്ടായിട്ടില്ല. ടെണ്ടർ നടപടികൾ പാലിച്ചാണ് ഏലക്ക വാങ്ങിയതെന്നും പി ടി തോമസ് എംഎൽഎ ഉന്നയിച്ച ആരോപണത്തിന് മറുപടിയായി ഭക്ഷ്യമന്ത്രി പറഞ്ഞു.
ഒക്ടോബർ പതിനഞ്ചിന് ശേഷം അനർഹരായവർ മുൻഗണന കാർഡുകൾ കൈവശം വെച്ചാൽ നടപടി സ്വീകരിക്കും. റേഷൻ കാർഡ് മുൻഗണന പരിധിയിൽ ഉയർത്താൻ കഴിയില്ല. നിശ്ചിത ശമാനത്തിലധികം അംഗ പരിമിതിയുള്ളവർക്ക് മുൻഗണന റേഷൻ കാർഡ് അനുവദിക്കുന്നത് ആലോചനയിൽ ഉണ്ടെന്നും മന്ത്രി നിയമസഭയിൽ പറന്നു.
സംസ്ഥാനത്ത് കൊവിഡ് നിയന്ത്രണങ്ങളിൽ കൂടുതൽ ഇളവുകൾ നിലവിൽ വരുകയും ജനജീവിതം സാധരണ നിലയിലേക്ക് എത്തുകയും ചെയ്യുന്ന സാഹചര്യത്തിൽ കിറ്റ് വിതരണം അവസാനിപ്പിച്ചേക്കുമെന്നാണ് റിപ്പോർട്ടുകൾ. സൗജന്യ ഭക്ഷ്യകിറ്റ് വിതരണം നിര്‍ത്താൻ തീരുമാനിച്ചിട്ടില്ലെന്നും കിറ്റ് വിതരണത്തിൽ ചില പ്രശ്നങ്ങള്‍ നേരിടുന്നുണ്ടെങ്കിലും മന്ത്രി ജി ആര്‍ അനിൽ കഴിഞ്ഞ മാസം പറഞ്ഞിരുന്നു. സര്‍ക്കാരിൻ്റെ സാമ്പത്തികനില കണക്കിലെടുത്ത് കിറ്റ് വിതരണം ഏറെക്കാലും തുടരാൻ കഴിയില്ലെന്ന് ധനവകുപ്പ് നേരത്തെ തന്നെ നിലപാടറിയിച്ചിരുന്നു.
കിറ്റ് വിതരണത്തിൽ സാമ്പത്തിക പ്രതിസന്ധി നേരിടുന്നുണ്ടെന്ന് മന്ത്രി പറഞ്ഞിരുന്നു. കൊവിഡ് നിയന്ത്രണങ്ങള്‍ ഏറെക്കുറെ പൂര്‍ണമായും അവസാനിച്ച സാഹചര്യത്തിൽ കിറ്റ് വിതരണം അവവസാനിപ്പിക്കാമെന്നും സംസ്ഥാനത്തെ സാമ്പത്തിക പ്രതിസന്ധി കണക്കിലെടുത്താൽ കിറ്റ് വിതരണം എളുപ്പമല്ലെന്ന് ധനവകുപ്പ് ഭക്ഷ്യവകുപ്പിനെ അറിയിച്ചിട്ടുണ്ടെന്നായിരുന്നു വിവിധ മാധ്യമങ്ങൾ റിപ്പോർട്ട് ചെയ്തിരുന്നു.
