തിരുവമ്പാടി> ഇരുവഴിഞ്ഞിപ്പുഴയിലെ പതങ്കയത്ത് വിനോദ സഞ്ചാരത്തിനെത്തിയ യുവാവിനെ കുളിക്കുന്നതിനിടെ ഒഴുക്കിൽപ്പെട്ട് കാണാതായി. കണ്ണൂർ തലശേരി പാറമ്മൽ സ്വദേശി അനുഗ്രഹ് വീട്ടിൽ നയിം ജാബിറി(22)നെയാണ് കാണാതായത്. വ്യാഴാഴ്ച പകൽ 11 ന് ശേഷമാണ് അപകടം .തലശേരിയിൽനിന്നുള്ള എട്ടംഗ സംഘം പകൽ പതിനൊന്നോടെയാണ് കോടഞ്ചേരിക്കടുത്ത നാരങ്ങാത്തോട് പതങ്കയത്ത് എത്തിയത്. പതങ്കയം രണ്ടാമത്തെ കയത്തിൽ കുളിക്കുന്നതിനിടെ കാൽവഴുതി ഒഴുക്കിൽപ്പെടുകയായിരുന്നു.
ആദ്യം നാട്ടുകാരും പിന്നീട് സ്ഥലത്തെത്തിയ മുക്കം ഫയർ ഫോഴ്സും കോടഞ്ചേരി പൊലീസും വിവിധ സന്നദ്ധ സംഘടനാ വളന്റിയർമാരും വൈകിട്ട് ആറുവരെ പുഴയിൽ തിരച്ചിൽ നടത്തിയെങ്കിലും കണ്ടെത്താനായില്ല. തിരച്ചിൽ വെള്ളി രാവിലെ എട്ടിന് പുനരാരംഭിക്കും. മുങ്ങൽ വിദഗ്ധരെ ഉപയോഗിച്ചാവും തിരച്ചിൽ തുടരുകയെന്ന് മുക്കം ഫയർസ്റ്റേഷൻ അസി. സ്റ്റേഷൻ ഓഫീസർ എൻ വിജയൻ അറിയിച്ചു.
