ലോക്സനാഥ് ബെഹ്റ അവധിയിൽ; ഭാര്യയുടെ ചികിത്സയ്ക്ക് ഒറീസയ്ക്ക് പോകണമെന്ന് വിശദീകരണം

കൊച്ചി: മുൻ സംസ്ഥാന പോലീസ് മേധാവിയും കൊച്ചി മെട്രോ എംഡിയുമായി ലോക്നാഥ് ബെഹ്റ അവധിയിൽ പ്രവേശിച്ചു. ഭാര്യയുടെ ചികിത്സാ ആവശ്യത്തിനായി സ്വദേശമായ ഒറീസയ്ക്ക് പോകണമെന്നാണ് വിശദീകരണം. പുരാവസ്തു തട്ടിപ്പ് കേസ് പ്രതി മോൻസൺ മാവുങ്കലുമായി ബന്ധമുണ്ടെന്ന ആരോപണം ഉയര്‍ന്നതിനു പിന്നാലെയാണ് ബെഹ്റ അവധിയിൽ പ്രവേശിക്കുന്നതെന്നാണ് ശ്രദ്ധേയം.

മോൻസൺ മാവുങ്കലിനെ കഴിഞ്ഞ ദിവസം ക്രൈം ബ്രാഞ്ച് സംഘം അറസ്റ്റ് ചെയ്തതിനു ശേഷം ബെഹ്റ ഓഫീസിലെത്തിയിട്ടില്ലെന്നാണ് റിപ്പോര്‍ട്ട്. കഴിഞ്ഞ വെള്ളിയാഴ്ചയായിരുന്നു ബെഹ്റ കലൂരിലെ കൊച്ചി മെട്രോ ആസ്ഥാനത്ത് അവസാനമായി എത്തിയത്.

ഡിജിപിയായിരുന്ന കാലത്ത് ബെഹ്റ മോൻസൺ മാവുങ്കലിൻ്റെ കലൂരിലെ മ്യൂസിയത്തിലെത്തിയതിൻ്റെ ചിത്രങ്ങളടക്കം പുറത്തു വന്നിരുന്നു. ഡിജിപിയുമായി അടുത്ത ബന്ധമുണ്ടെന്നായിരുന്നു മോൻസൺ ഇടപാടുകാരോടു പറഞ്ഞിരുന്നത്. എന്നാൽ ഇതു നിഷേധിക്കുന്നതാണ് ബെഹ്റയുടെ പ്രതികരണം. തനിക്ക് പറയാനുള്ളതെല്ലാം പോലീസിനെ അറിയിച്ചിട്ടുണ്ടെന്നും ഇതെല്ലാം ഫയലിലുണ്ടെന്നും ബെഹ്റ ഒരു വാര്‍ത്താ ചാനലിനോടു പറഞ്ഞു.

മോൻസൺ മാവുങ്കൽ തന്‍റെ സുഹൃത്തല്ലെന്നാണ് ലോക്നാഥ് ബെഹ്റ പറയുന്നത്. എന്നാൽ മോൻസണെ ആരാണ് തനിക്ക് പരിചയപ്പെടുത്തിയത് എന്ന ചോദ്യത്തിന് ഉത്തരം നല്‍കാൻ ബെഹ്റ തയ്യാറായില്ല. കലൂരിലെയും ചേര്‍ത്തലയിലെയും മോൻസൻ്റെ വീടുകള്‍ക്ക് മുന്നിൽ പോലീസ് ബീറ്റ് ബോക്സ് സ്ഥാപിച്ചത് ആരു പറഞ്ഞിട്ടാണെന്നും ലോക്നാഥ് ബെഹ്റ വെളിപ്പെടുത്തിയിട്ടില്ല. ലോക്നാഥ് ബെഹ്റയ്ക്കു പുറമെ പല ഉന്നത പോലീസ് ഉദ്യോഗസ്ഥരുമായും മോൻസൺ മാവുങ്കലിനു ബന്ധമുണ്ടായിരുന്നുവെന്നാണ് റിപ്പോര്‍ട്ടുകള്‍. കോടികളുടെ തട്ടിപ്പ് നടത്തിയ കേസിലെ പ്രതിയ്ക്ക് സംരക്ഷണം ഒരുക്കാൻ ഇടപെട്ടത് പോലീസ് ഉന്നതരാണെന്നാണ് ആരോപണം.

Also Read:

മോൻസൻ്റെ മ്യൂസിയത്തിലുണ്ടായിരുന്ന വ്യാജ സാമഗ്രികള്‍ പുരാവസ്തുക്കളാണെന്നായിരുന്നു ഇയാള്‍ പ്രചരിപ്പിച്ചിരുന്നത്. ടിപ്പുവിൻ്റെ സിംഹാസനം എന്നു മോൻസൺ അവകാശപ്പെട്ട കസേരയിൽ ബെഹ്റ ഇരിക്കുന്നതിൻ്റെ ചിത്രങ്ങളും പുറത്തു വന്നിരുന്നു. ഡിജിപിയുമായി മോൻസൺ ഫോണിൽ സംസാരിക്കുന്നതിൻ്റെ വീഡിയോ ദൃശ്യങ്ങളും പുറത്തു വന്നിരുന്നു. ഇതിനു പിന്നാലെയാണ് മുൻ ഡിജിപി അവധിയിൽ പ്രവേശിക്കുന്നത്.

കലൂരിലെയും ചേര്‍ത്തലയിലെയും വീടുകള്‍ക്ക് സുരക്ഷ നല്‍കാൻ 2019ൽ പോലീസിനു നിര്‍ദേശം നല്‍കിയത് ഡിജിപി ലോക്നാഥ് ബെഹ്റയാണെന്നാണ് റിപ്പോര്‍ട്ടുകള്‍. ആലപ്പുഴ ജില്ലാ പോലീസ് സൂപ്രണ്ടിനും കൊച്ചി സിറ്റി പോലീസ് കമ്മീഷണര്‍ക്കും ഇതു സംബന്ധിച്ച് രണ്ട് വര്‍ഷം മുൻപ് ബെഹ്റ കത്ത് നല്‍കിയിരുന്നുവെന്നാണ് മാധ്യമം റിപ്പോര്‍ട്ട്. ഇതിൻ്റെ പകര്‍പ്പും വിവിധ മാധ്യമങ്ങള്‍ പുറത്തു വിട്ടിരുന്നു. ചേര്‍ത്തല പോലീസിൻ്റെ ബീറ്റ് ബോക്സും മോൻസൻ്റെ വീടിനു മുന്നിലുണ്ടായിരുന്നു.

Also Read:

ഇതിനിടെ മോൻസൻ്റെ ഭൂമിയിടപാടുകള്‍ ഉള്‍പ്പെടെയുള്ള കാര്യങ്ങളെപ്പറ്റി ക്രൈം ബ്രാഞ്ച് അന്വേഷണം തുടങ്ങിയിട്ടുണ്ട്. കലൂരിലെ മ്യൂസിയത്തിൽ സൂക്ഷിച്ചിരുന്ന പുരാവസ്തുക്കളെല്ലാം വ്യാജമാണെന്നും കണ്ടെത്തിയിട്ടുണ്ട്. തടി കൊണ്ടുള്ള പല വസ്തുക്കളും നിര്‍മിച്ചതും ചില പഴയ വസ്തുക്കള്‍ സംഘടിപ്പിച്ചു നല്‍കിയതും താനാണെന്ന് തിരുവനന്തപുരം സ്വദേശിയായ സന്തോഷ് വ്യക്തമാക്കി. ടിപ്പുവിൻ്റെ സിംഹാസനം ഉള്‍പ്പെടെയുള്ളവ നിര്‍മിച്ചത് കേരളത്തിലെ തന്നെ ചില ആശാരിമാരാണെന്നും കണ്ടെത്തിയിട്ടുണ്ട്.