സുധീരന്റെ രാജി വെച്ചത് തീര്‍ത്തും വിഷമം ഉള്ള കാര്യമാണെന്നും അദ്ദേഹവുമായി സംസാരിക്കുമെന്നും പ്രതിപക്ഷ നേതാവ് മാധ്യമങ്ങളോട് പറഞ്ഞു. രാജി അനാരോഗ്യം കാരണമാണെന്നാണ് നേതൃത്വത്തെ അറിയിച്ചത്. സുധീരൻ അനാവശ്യ സമ്മര്‍ദ്ദം ചെലുത്തുന്നയാളല്ലെന്നും സംസാരിച്ച് പ്രശ്നപരിഹാരത്തിന് ശ്രമിക്കുമെന്നും അദ്ദേഹം കൊച്ചിയിൽ മാധ്യമങ്ങളോട് പറഞ്ഞു. അതേസമയം, ആവശ്യം വന്നാൽ പ്രതികരിക്കുമെന്നും ഇപ്പോള്‍ കൂടുതൽ പ്രതികരണത്തിന് ഇല്ലെന്നും സുധീരന്‍ പറഞ്ഞതായി മനോരമ റിപ്പോര്‍ട്ട് ചെയ്യുന്നു.
Also Read :
‘അദ്ദേഹത്തിന്റെ പ്രതികരണം ഇങ്ങനെ, താൻ വിവരമറിഞ്ഞത് വാര്‍ത്താമാധ്യമങ്ങളിലൂടെയാണ് കെ പി സി സി പ്രസിഡന്റും വിവരം പറഞ്ഞു. അദ്ദേഹത്തെ ബന്ധപ്പെടുവാന്‍ ശ്രമിച്ചു എന്നാൽ കിട്ടിയിട്ടില്ല. അത്തരത്തിൽ ഒരു വാര്‍ത്ത ശരിയാണെങ്കിൽ വളരെ നിരാശപ്പെടുത്തുന്നതും വിഷമമുണ്ടാക്കുന്നതുമായ കാര്യമാണ്.’
‘വി എം സുധീരൻ കേരളത്തിലെ ഏറ്റവും പ്രമുഖനായ കോൺഗ്രസ് നേതാവാണ്. അദ്ദേഹം എന്ത് കാരണത്തിന്റെ പുറത്താണെന്ന് അറിയില്ല. അനാരോഗ്യമാണ് കാരണമെന്നാണ് കെപിസിസി പ്രസിഡന്റ് പറഞ്ഞത്. അദ്ദേഹത്തെ ചെന്ന് കാണും സംസാരിക്കും. അദ്ദേഹത്തേ പോലെ ഒരാള്‍ സ്ഥാനത്ത് നിന്നും മാറി നിൽക്കുന്നത് എന്ത് കാരണത്തിന്റെ പുറത്താണെങ്കിലും ഉള്‍ക്കൊള്ളാൻ പറ്റാത്ത വിഷമമുണ്ടാക്കുന്ന നിരാശപ്പെടുത്തുന്ന കാര്യം തന്നെയാണ്.’ പ്രതിപക്ഷ നേതാവ് പറഞ്ഞു.
‘തങ്ങളെ നന്നായി പ്രോത്സാഹിപ്പിക്കുന്ന ഒരാളാണ് വി എം സുധീരൻ. താൻ ഈ പദവിയിലേക്ക് എത്തിയപ്പോള്‍ വലിയ പിന്തുണയാണ് അദ്ദേഹം തന്നത്. ഇന്നും ഞങ്ങളേപ്പോലുള്ള ആളുകള്‍ക്ക് വേണ്ടിട്ട് അദ്ദേഹം നൽകിയ പിന്തുണ വലുതാണെന്നും’ വി ഡി സതീശൻ മാധ്യമങ്ങളോട് പറഞ്ഞു.
കെ പി സി സി പുനഃസംഘടനയെ ചൊല്ലി കോൺഗ്രസിൽ പൊട്ടിത്തെറി തുടരുന്നതിനിടെയാണ് സുധീരന്റെ രാജിയുണ്ടായിരിക്കുന്നത്. ഇന്നലെ രാത്രിയാണ് രാജിക്കാര്യം അറിയിച്ചുള്ള കത്ത് വി എം സുധീരൻ കെ പി സി സി പ്രസിഡന്റ് കെ സുധാകരന് കൈമാറിയത്. കടുത്ത അതൃപ്തിയെ തുടർന്നാണ് സുധീരന്റെ രാജിയെന്നാണ് ഏഷ്യാനെറ്റ് റിപ്പോര്‍ട്ട് ചെയ്യുന്നത്.
Also Read :
വേണ്ടത്ര കൂടിയാലോചന നടക്കുന്നില്ലെന്നാണ് സുധീരന്റെ പ്രധാന പരാതി. രാഷ്ട്രീയ കാര്യ സമിതിയെ നോക്കു കുത്തിയാക്കുന്നുവെന്നും വിമര്‍ശനം ഉയരുന്നുണ്ട്. പാര്‍ട്ടിയിൽ ഒരു സാധാരണ പ്രവര്‍ത്തകനായി തുടരുമെന്നും അദ്ദേഹം രാജിക്കത്തിൽ അറിയിച്ചിട്ടുണ്ട്.
അതേസമയം, പ്രശ്നങ്ങള്‍ കെ പി സി സി പ്രസിഡന്റ് പരിഹരിക്കുമെന്ന് കെ പി സി സി വര്‍ക്കിങ് പ്രസിഡന്റെ പി ടി തോമസ് പറഞ്ഞു. സുധീരന്റെ വീട്ടില്‍ പോയി കെ സുധാകരന് കണ്ടിരുന്നുവെന്നും പി ടി തോമസ് ഏഷ്യാനെറ്റ് ന്യൂസിനോട് പ്രതികരിച്ചു.
