ജാതിയേയും മതത്തേയും വിഭജനത്തിനു വേണ്ടി ഉപയോഗിക്കാൻ അനുവദിക്കരുത്. അന്ധകാരത്തെ അന്ധകാരം കൊണ്ട് ഇല്ലാതാക്കാൻ സാധിക്കില്ല. വെളിച്ചത്തിനു മാത്രമേ കഴിയൂ. അത് പൊതു സമൂഹം മനസിൽ ഉറപ്പിക്കണം. സ്വാതന്ത്ര്യം തന്നെ അമൃതം എന്ന പരിപാടി ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
ഇന്ന് നമ്മുടെ സമൂഹത്തിന് ഏറെ ആവശ്യമുള്ളതാണ് പുരോഗമനപരവും മതനിരപേക്ഷപരമായും ചിന്തിക്കുന്ന തലമുറ. സാമൂഹത്തിന്റെ താൽപര്യത്തിന് വിരുദ്ധമായ പ്രവർത്തനങ്ങളിൽ ഇടപെടുന്നവരെ ഏതെങ്കിലും വിഭാഗത്തിന്റേത് മാത്രമായി ഒതുക്കരുത്. അങ്ങനെ ചെയ്യുന്നത് ആ തിന്മകൾക്ക് എതിരായ പൊതു ഐക്യത്തെ ശാക്തീകരിക്കില്ലെന്നും വേർതിരിവ് വർദ്ധിപ്പിക്കുമെന്നും മുഖ്യമന്ത്രി പറഞ്ഞു.
തീവ്രവാദ പ്രസ്ഥാനങ്ങൾക്ക് നന്മയുടെ മുഖം നൽകുന്നത് സാമൂഹിക ഐക്യത്തെ ദുർബലപ്പെടുത്തും. സ്വാതന്ത്ര്യത്തിന്റെ പര്യായമായി അത്തരം പ്രസ്ഥാനങ്ങളെ ചിലർ ഉയർത്തിക്കാട്ടുന്നുണ്ട്. അത്തരം പ്രതിലോമകരമായ കാഴ്ചപ്പാടുകൾ സ്വാതന്ത്ര്യത്തെ അപകടത്തിലാക്കും. ജാതിക്കും മതത്തിനും അതീതമായി ജീവിക്കാൻ പഠിപ്പിച്ച ഗുരുവിന്റെ ഓർമ്മ പുതുക്കുന്ന ദിനത്തിൽ ജാതിയും മതവും വിഭജനത്തിന്റെ ആയുധമാക്കുന്നവരെ പ്രതിരോധിക്കും എന്ന പ്രതിജ്ഞയാണ് സ്വീകരിക്കേണ്ടതെന്നും മുഖ്യമന്ത്രി പറഞ്ഞു.
അതേസമയം പാലാ ബിഷപ്പിന് ഹാലിളകിയെന്നു കരുതി എല്ലാ ക്രിസ്തീയ പുരോഹിതരെയും അങ്ങനെ കാണരുതെന്ന് അബ്ദു റബ്ബ് പറഞ്ഞു. സമുദായങ്ങൾക്കിടയിലുള്ള സൗഹൃദത്തിൻ്റെ കവാടങ്ങൾ കൊട്ടിയടയ്ക്കരുത്, രഞ്ജിപ്പിൻ്റേതായ എല്ലാ വാതായനങ്ങളും തുറന്നിടുമ്പോഴാണ് അവിടേക്ക് കാറ്റും വെളിച്ചവും കടക്കുക. ആ വെളിച്ചമില്ലാതെയായാൽ ചുറ്റും പരക്കുന്നത് ഇരുട്ടായിരിക്കും, പിന്നീട് അവസരം മുതലെടുക്കുക ഇരുട്ടിൻ്റെ ശക്തികളായിരിക്കും. അതുണ്ടാവരുത്- അബ്ദു റബ്ബ് വ്യക്തമാക്കി.
പാലാ ബിഷപ്പിനെ അനുകൂലിക്കാത്തവരും, അദ്ദേഹത്തിൻ്റെ വിദ്വേഷ പ്രസംഗത്തെ എതിർക്കുന്നവരുമായ ഒരു പാട് പുരോഹിതൻമാരും സഭാപിതാക്കളും ഈ നാട്ടിലുണ്ട്. ഒരു ബിഷപ്പിൻ്റെ പേരിൽ എല്ലാ ബിഷപ്പുമാരെയും അതേ കണ്ണോടെ കാണരുത്. ഈ നാടിനെ പിന്നോട്ടല്ല, മുന്നോട്ടു നയിക്കാൻ സമുദായ നേതാക്കൾക്കും കൂടുതൽ ഉത്തരവാദിത്തങ്ങളുണ്ട്. പാലാ ബിഷപ്പിൻ്റെ വിഷലിപ്തമായ ഒരു പ്രസ്താവനയുടെ പേരിൽ സ്വസമുദായം തെറ്റിദ്ധരിക്കപ്പെടരുതെന്ന ഉത്തമബോധ്യത്തോടെ കർദ്ദിനാൾ മാർ ബസേലിയസ് ബാവ വിളിച്ചു ചേർത്ത സമുദായ നേതാക്കളുടെ യോഗം എന്തുകൊണ്ടും പ്രശംസനീയമാണെന്നും അബ്ദു റബ്ബ് ഫേസ്ബുക്ക് പോസ്റ്റിൽ പറഞ്ഞു.
മതേതരത്വം വെല്ലുവിളി നേരിടുമ്പോൾ സർക്കാർ നോക്കി നിൽക്കുകയല്ല ചെയ്യേണ്ടതെന്ന് കെ സുധാകരൻ പറഞ്ഞു. ഒരു വിഭാഗത്തെ മാത്രം സന്ദർശിച്ച മന്ത്രി വി എൻ വാസവന്റെ നടപടി ശരിയല്ലെന്നും സുധാകരൻ കുറ്റപ്പെടുത്തി. വിവാദ പരാമർശം നടത്തിയ ബിഷപ്പ് ജോസഫ് കല്ലറങ്ങാട്ടിലിനെ മന്ത്രി വാസവൻ നേരിട്ട് സന്ദർശിച്ച പശ്ചാത്തലത്തിലാണ് സുധാകരന്റെ പ്രതികരണം.
സർവ്വകക്ഷി യോഗം വിളിക്കേണ്ടെന്ന സിപിഐ സംസ്ഥാന സെക്രട്ടറി കാനം രാജേന്ദ്രന്റെ നിലപാട് ലജ്ജാകരമാണ്. കാര്യങ്ങളുടെ ഉത്തരവാദിത്വം മുഖ്യമന്ത്രി ഏറ്റെടുക്കുന്നില്ലെങ്കിൽ കരുത്തുള്ള രാഷ്ട്രീയ പ്രസ്ഥാനം കേരളത്തിലുണ്ടെന്നും സുധാകരൻ പറഞ്ഞു. കേരളത്തിൽ മത സൗഹാര്ദം തകര്ന്നുകൊണ്ടിരിക്കുകയാണ്. കാര്യങ്ങൾ കൈവിട്ടു പോയിട്ട് പറഞ്ഞിട്ട് കാര്യമില്ലെന്നും സുധാകരൻ പറഞ്ഞു.
