വിഷയത്തിൽ സർക്കാർ സർവ്വ കക്ഷി യോഗം വിളിക്കുന്നത് സ്വാഗതാർഹമാണെന്ന് അദ്ദേഹം പറഞ്ഞു. സർക്കാരിനെ അറിയിച്ചുകൊണ്ടല്ല ഇന്ന് വിവിധ മത സംഘടനകളുടെ യോഗം ചേർന്നത്. കേരളത്തിൽ മത സൗഹാ‍ര്‍ദം സൂക്ഷിക്കണമെന്നും ഇതര മതങ്ങൾക്ക് മുറിവേൽക്കുന്ന സാഹചര്യം ഒഴിവാക്കണമെന്നും അദ്ദേഹം പറഞ്ഞു.
മറ്റ് മതങ്ങളെ ബഹുമാനത്തോടെ കാണുന്ന സാഹചര്യം ഒരുക്കണം. ഇതര മതങ്ങളെ മുറിവേൽപ്പിക്കരുത്. നാടിന്റെ മതസൗഹാ‍ര്‍ദം കാത്തുസൂക്ഷിക്കണം. സമാധാനപരമായ അന്തരീക്ഷം കാത്തു സൂക്ഷിക്കുന്നതിനാണ് ഇന്ന് യോഗം ചേ‍ര്‍‍ന്നതെന്നും ക്ലീമിസ് ബാവ പറഞ്ഞു. വിവിധ മതങ്ങളിലെ അംഗങ്ങൾ ഉൾപ്പെട്ട പ്രാദേശിക ഫോറങ്ങൾ സജീവമാക്കാൻ ആത്മീയ മേഖലയിലുള്ളവ‍ര്‍ ശ്രദ്ധ പുല‍ര്‍ത്തണമെന്നും ക്ലീമിസ് ബാവ കൂട്ടിച്ചേർത്തു.
പാലാ ബിഷപ്പിന്റെ പ്രസ്താവന ച‍ര്‍ച്ച ചെയ്യുന്നതിനല്ല യോഗം ചേര്‍‍ന്നത്. പാലാ ബിഷപ്പ് മാപ്പ് പറയണമെന്ന ആവശ്യത്തിൽ തീരുമാനമെടുക്കാൻ ഈ യോഗത്തിൽ സാധിക്കില്ലെന്നും അദ്ദേഹം വ്യക്തമാക്കി.
അതേസമയം, കേരളത്തിലെ ഹൈന്ദവ-ക്രൈസ്തവ-മുസ്ലിം മത ബന്ധങ്ങളിൽ ജാഗ്രതയും സ്നേഹവും പുലർത്തേണ്ട കാലമാണെന്ന് മാർ ക്ലീമിസ് പറഞ്ഞിരുന്നു. വിഭജിക്കപ്പെട്ടുകൊണ്ടിരിക്കുന്ന സമൂഹത്തിൽ ഐക്യത്തിന്റെയും സ്നേഹത്തിന്റെയും പരസ്പര സഹകരണത്തിന്റെയും സന്ദേശമാണ് നൽകേണ്ടതെന്ന് സത്യദീപത്തിനു നൽകിയ അഭിമുഖത്തിൽ അദ്ദേഹം പറഞ്ഞു.
എന്നാൽ നാർക്കോട്ടിക്ക് ജിഹാദ് പരാമർശം നടത്തിയത് ഒരാൾ മാത്രമാണെന്നും അദ്ദേഹം പ്രസ്താവന പിൻവലിച്ചാൽ പ്രശ്നം അവസാനിക്കുമെന്നും കാന്തപുരം എ പി അബൂബക്കർ മുസ്ലിയാർ വ്യക്തമാക്കിയിരുന്നു. മുസ്ലിങ്ങളുടെ ഭാഗത്തുനിന്നും ഒരു കുഴപ്പവും ഉണ്ടായിട്ടില്ലെന്നും അദ്ദേഹം വ്യക്തമാക്കി.
പാലാ ബിഷപ്പ് ജോസഫ് കല്ലറങ്ങാട്ട് പ്രസ്താവന പിൻവലിക്കണമെന്ന് കാന്തപുരം ഇന്നലെ ആവശ്യപ്പെട്ടിരുന്നു. ഇന്നലെ പറഞ്ഞതിൽ കൂടുതൽ ഒന്നും പറയാനില്ലെന്നാണ് കാന്തപുരം തിങ്കളാഴ്ച വ്യക്തമാക്കിയത്. വിഷയത്തിൽ മധ്യസ്ഥ ചർച്ച ആവശ്യമില്ലെന്നും തെറ്റായ പ്രസ്താവന നടത്തിയ ബിഷപ്പ് പരാമർശം പിൻവലിക്കുകയാണ് വേണ്ടതെന്നും അദ്ദേഹം പറഞ്ഞു.
