റാവൽപിണ്ടി > പാകിസ്ഥാനെതിരായ ക്രിക്കറ്റ് പരമ്പരയിൽ നിന്ന് ന്യൂസീലൻഡ് പിന്മാറി. താരങ്ങൾ എത്രയും വേഗം പാകിസ്ഥാൻ വിടുമെന്ന് ന്യൂസീലൻഡ് ക്രിക്കറ്റ് ബോർഡ് അറിയിച്ചു. ആദ്യ ഏകദിന മത്സരത്തിന്റെ ടോസിന് തൊട്ടുമുമ്പായാണ് പരമ്പരയിൽ നിന്നുള്ള പിന്മാറ്റം. ന്യൂസീലൻഡ് സർക്കാർ നൽകിയ സുരക്ഷാ മുന്നറിയിപ്പിനെ തുടർന്നാണ് പരമ്പര ഉപേക്ഷിച്ചതെന്നും ബോർഡ് പുറത്തിറക്കിയ വാർത്താകുറിപ്പിൽ പറയുന്നു.
രണ്ട് പതിറ്റാണ്ടിന് ശേഷമാണ് ന്യൂസീലൻഡ് ക്രിക്കറ്റ് ടീം പാകിസ്ഥാനിൽ പര്യടനത്തിന് എത്തിയത്. മൂന്ന് ഏകദിനങ്ങളും അഞ്ച് ട്വന്റി20 മത്സരങ്ങളുമായിരുന്നു പരമ്പരയിൽ. റാവൽപിണ്ടിയും ലാഹോറുമായിരുന്നു മത്സരവേദികൾ.
2002ൽ ന്യൂസീലൻഡിന്റെ പാക് പര്യടനത്തിനിടെ ടീം താമസിച്ച ഹോട്ടലിന് സമീപം ബോംബ് സ്ഫോടനം നടന്നിരുന്നു.
