കെപിസിസി പുനസംഘടന; അഞ്ച് വര്‍ഷത്തേക്ക് ഭാരവാഹികളായവരെ വീണ്ടും പരിഗണിക്കില്ല, ജനപ്രതിനിധികളേയും ഒഴിവാക്കും

തിരുവനന്തപുരം: കെ പി സി സി പുനസംഘടനയുമായി ബന്ധപ്പെട്ട് കോൺഗ്രസ് നേതൃത്വം ധാരണയിൽ എത്തിയതായി റിപ്പോര്‍ട്ട്. ഹൈക്കമാന്‍ഡ് നിശ്ചയിച്ച അംഗങ്ങളെ മാത്രം നിലനിര്‍ത്തും. തുടര്‍ച്ചയായി അഞ്ച് വര്‍ഷത്തിലധികം സംഘടനാ പദവികള്‍ വഹിച്ചവരെ ഒഴിവാക്കും.

നിലവിൽ ജനപ്രതിനിധികളായ നേതാക്കളേയും ഭാരവാഹിത്വത്തിൽ നിന്നും ഒഴിവാക്കുമെന്നും മാധ്യമറിപ്പോര്‍ട്ടുകളില്‍ പറയുന്നു. കെ പി സി സി അധ്യക്ഷൻ കെ സുധാകരൻ, പ്രതിപക്ഷ നേതാവ് വി ഡി സതീശൻ, ഉമ്മൻ ചാണ്ടി, രമേശ് ചെന്നിത്തല എന്നിവ‍ര്‍ നടത്തിയ ച‍ര്‍ച്ചയിലാണ് മാനദണ്ഡം സംബന്ധിച്ച ധാരണയായത്.

Also Read :
ഡി സി സി പുനസംഘടനയ്ക്ക് പിന്നാലെ കോൺഗ്രസിൽ മുതിര്‍ന്ന നേതാക്കളാടക്കം പൊട്ടിത്തെറിയുണ്ടായിരുന്നു. ഇതിന്റെ തുട‍ര്‍ച്ചയായി പി എസ് പ്രശാന്തും കെ പി അനിൽ കുമാറും കോണ്‍ഗ്രസ് വിട്ടു പോയ സാഹചര്യത്തിൽ വളരെ കരുതലോടെയാണ് കോണ്‍ഗ്രസ് നേതൃത്വം കെ പി സി സി പുനസംഘടനയിലേക്ക് നീങ്ങുന്നത്.

കെ പി സി സി ജനറല്‍ സെക്രട്ടറി ജി രതികുമാർ പാർട്ടി വിട്ടു. സംഘടനാപരമായ വിഷയങ്ങളുന്നയിച്ചാണ് രാജി. രതികുമാർ കെപിസിസി അധ്യക്ഷന് നൽകിയ രാജിക്കത്ത് പുറത്തുവന്നു. ഇദ്ദേഹം സിപിഎമ്മിനൊപ്പം ചേർന്ന് പ്രവർത്തിക്കുമെന്നാണ് റിപ്പോർട്ട്.

ഡി സി സി പുനഃസംഘടനയുമായി ബന്ധപ്പെട്ട തര്‍ക്കങ്ങള്‍ക്ക് പിന്നാലെ യൂത്ത് കോൺഗ്രസിലും ഭിന്നത പരസ്യമാകുന്നു. സംസ്ഥാന അധ്യക്ഷന്‍ ഷാഫി പറമ്പില്ലിനെതിരെ പ്രവർത്തകർ രാഹുൽ ഗാന്ധിയ്ക്ക് കത്തയച്ചെന്നാണ് റിപ്പോർട്ട്.

ഷാഫി പറമ്പില്‍ ഗ്രൂപ്പ് അടിസ്ഥാനത്തില്‍ നിയമനം നടത്തുന്നെന്നാരോപിച്ചാണ് ഒരു വിഭാഗം പ്രവർത്തകർ പരാതി അയച്ചതെന്ന് ന്യൂസ് 18യാണ് റിപ്പോർട്ട് ചെയ്തത്. കെസി വേണുഗോപാലിനെ അനുകൂലിക്കുന്ന നേതാക്കളാണ് നീക്കത്തിന് പിന്നലെന്നാണ് റിപ്പോർട്ട്.

യൂത്ത് കോൺഗ്രസ് സംസ്ഥാന അധ്യക്ഷനായ ഷാഫി പറമ്പിൽ ഗ്രൂപ്പ് അടിസ്ഥാനത്തിലാണ് നിയമനം നടത്തുന്നതെന്നാണ് പരാതി അയച്ചവര്‍ പ്രധാനമായും ആരോപിക്കണം. തിരുവനന്തപുരത്തെ വർക്കല, നെടുമങ്ങാട് നിയോജക മണ്ഡലം കമ്മിറ്റികളുടെ തെരഞ്ഞെടുപ്പുമായി ബന്ധപ്പെട്ടാണ് പുതിയ വിവാദം.

സംസ്ഥാന അധ്യക്ഷന്റെ നിർദേശപ്രകാരം ജില്ലാ അധ്യക്ഷൻ ഗ്രൂപ്പ് അടിസ്ഥാനത്തിൽ നിയമനം നടത്തിയെന്ന് ആരോപിക്കുന്ന വിഭാഗം ഷാഫിയെ പ്രസിഡന്‍റായി തുടരാൻ അനുവദിക്കരുതെന്ന് ആവശ്യപ്പെട്ടിട്ടുണ്ടെന്ന് 24 ന്യൂസും റിപ്പോർട്ട് ചെയ്തു.

Also Read : കോൺഗ്രസിന് പിന്നാലെ യൂത്ത് കോൺഗ്രസിലും തർക്കം; ഷാഫി പറമ്പിലിനെതിരെ ഹൈക്കമാന്‍റിന് പരാതി

സംസ്ഥാന ഭാരവാഹികളായ ഒരു വിഭാഗം ആളുകളാണ് ഷാഫി പറമ്പിലിനെതിരെ രാഹുൽ ഗാന്ധിക്ക് കത്തയച്ചത്. ഹൈക്കമാൻഡിലെ സ്വാധീനം ഉപയോഗിച്ച് യൂത്ത് കോൺഗ്രസിൽ കെസി വേണുഗോപാൽ അനാവശ്യ ഇടപെടൽ നടത്തുകയാണെന്ന ആരോപണവും ഉയർന്നിട്ടുണ്ട്. ഇന്നലെ ചേര്‍ന്ന തിരുവനന്തപുരം ജില്ലാ കമ്മിറ്റിയില്‍ എ, ഐ ഗ്രൂപ്പുകള്‍ കെസി വേണുഗോപാലിന്‍റെ ഇടപെടലിനെതിരെ രംഗത്തെത്തിയിരുന്നു.