സംഘപരിവാര്‍ സംഘടനകളുടെ നേതൃത്വത്തിൽ വര്‍ഷങ്ങളായി ലൗ ജിഹാദ് വിഷയത്തിൽ പ്രചാരണം നടത്തിയിട്ടും കിട്ടാത്ത സ്വീകാര്യത ബിഷപ്പിൻ്റെ പ്രസ്താവനയിൽ നിന്നുണ്ടായെന്നാണ് ബിജെപി വിലയിരുത്തുന്നത്. കോൺഗ്രസും സിപിഎമ്മും ബിഷപ്പിനെ തള്ളിയപ്പോഴും പിന്തുണയുമായി ബിജെപി രംഗത്തെത്തുകയും ചെയ്തിരുന്നു. ഇതിനു പിന്നാലെയാണ് വിഷയത്തിൽ രാഷ്ട്രീയ നേട്ടമുണ്ടാക്കാനുള്ള ബിജെപിയുടെ ശ്രമം. ഇതിൻ്റെ ഭാഗമായാണ് ബിജെപി സംസ്ഥാന ജനറൽ സെക്രട്ടറി ജോര്‍ജ് കുര്യൻ കേന്ദ്ര ആഭ്യന്തരമന്ത്രി അമിത് ഷായ്ക്ക് കത്തു നല്‍കിയതെന്നും റിപ്പോര്‍ട്ടിൽ പറയുന്നു.
Also Read:
പാലാ ബിഷപ്പ് ഹൗസിലേയ്ക്ക് മാര്‍ച്ച് നടത്തിയത് മത തീവ്രവാദികളാണെന്നും ബിഷപ്പിന് സംരക്ഷണം നല്‍കണമെന്നും ആവശ്യപ്പെട്ടായിരുന്നു അമിത് ഷായ്ക്ക് കത്ത് നല്‍കിയത്. കൂടാതെ ബിഷപ്പ് മാര്‍ ജോസഫ് കല്ലറങ്ങാട്ടിനു പിന്തുണയുമായി ബിജെപി അധ്യക്ഷൻ കെ സുരേന്ദ്രൻ, കേന്ദ്രമന്ത്രി വി മുരളീധരൻ തുടങ്ങിയവരും രംഗത്തെത്തിയിരുന്നു. ഇതിനു പിന്നാലെയാണ് കോര്‍ കമ്മിറ്റി വിഷയം ചര്‍ച്ച ചെയ്യുകയും പ്രചാരണവുമായി മുന്നോട്ടു പോകാൻ തീരുമാനിക്കുകയും ചെയ്തത്.
ഈ വര്‍ഷം മാര്‍ച്ചിൽ ആര്‍എസ്എസ് ജില്ലാ സെക്രട്ടറിയെ രൂപതാ ആസ്ഥാനത്തേയ്ക്ക് ക്ഷണിക്കുകയും അയോധ്യാ രാമക്ഷേത്രത്തിനു സംഭാവന നല്‍കുകയും ചെയ്ത മാര്‍ ജോസഫ് കല്ലറങ്ങാട്ടിനു സംഘപരിവാറുമായി അടുത്ത ബന്ധമാണുള്ളതെന്നാണ് റിപ്പോര്‍ട്ടുകള്‍. ബിജെപി കോട്ടയം ജില്ലാ അധ്യക്ഷൻ നോബിള്‍ മാത്യുവും തനിക്ക് മെത്രാൻ്റെ പിന്തുണയുണ്ടെന്നു വ്യക്തമാക്കിയിരുന്നു. ബിഷപ്പിനു പിന്തുണയുമായി ബിഷപ്പ് ഹൗസിനു മുന്നിലെത്തിയ തീവ്ര ക്രിസ്ത്യൻ സംഘടനാ പ്രവര്‍ത്തകര്‍ക്കൊപ്പം ബിജെപി നേതാക്കളും ഉണ്ടായിരുന്നുവെന്നാണ് വിവരം.
Also Read:
അതേസമയം, നിയമസഭാ തെരഞ്ഞെടുപ്പിൽ ബിജെപി നേരിട്ട കനത്ത പരാജയം പഠിക്കുകയായിരുന്നു കോര്‍ കമ്മിറ്റി യോഗത്തിലെ മുഖ്യ അജണ്ട. തോൽവിയുടെ ഉത്തരവാദിത്തം ബിജെപി അധ്യക്ഷനും സംഘടനാ സെക്രട്ടറിയ്ക്കുമാണെന്ന വാദത്തിൽ കൃഷ്ണദാസ് പക്ഷം ഉറച്ചു നിന്നെന്നും എന്നാൽ സംഘടനാ സംവിധാനത്തിനു മൊത്തത്തിൽ പിഴവുണ്ടായെന്നാണ് എതിര്‍പക്ഷം വാദിച്ചതെന്നും റിപ്പോര്‍ട്ടര്‍ വാര്‍ത്തയിൽ പറയുന്നു. തോൽവി സംബന്ധിച്ച് പാര്‍ട്ടി കമ്മീഷൻ മുന്നോട്ടു വെച്ച റിപ്പോര്‍ട്ടിൻ്റെ അടിസ്ഥാനത്തിലായിരുന്നു ചര്‍ച്ച. പ്രവര്‍ത്തനശൈലിയിൽ വലിയ മാറ്റം വരണമെന്നും ചില ജില്ലാ കമ്മിറ്റികളിൽ അഴിച്ചു പണി വേണമെന്നും യോഗം വിലയിരുത്തി.
