Also Read:
ബിഷപ്പിന്റെ പരാമ‍ര്‍ശം സെൽഫ് ഗോളാണ്. അത് അപകടകരമാണ്. ഇത്തരത്തിലുള്ള പ്രസ്താവനകളെ എന്തു വിലകൊടുത്തും തടയണം. തെളിവുകളില്ലാതെ മറ്റൊരാളെക്കുറിച്ച് അപവാദം പറഞ്ഞു പരത്തുന്നത് അഭിപ്രായ സ്വാതന്ത്ര്യത്തിന്റെ ജീര്‍ണ്ണിച്ച രൂപമാണ്. അജണ്ടയുടെ ഭാഗമായി ആര്‍എസ്എസ് ഉന്നയിച്ച ലവ് ജിഹാദിന്റെ മറ്റൊരു രൂപമാണ് നാര്ക്കോട്ടിക്ക് ജിഹാദ്- സക്കറിയ പറഞ്ഞു.
പുരോഹിതരുടെ ഒരു മാഫിയതന്നെ ഇത്തരത്തിലുള്ള സ്ഥാപിത താൽപര്യം പ്രചരിപ്പിക്കാൻ ശ്രമിക്കുന്നുണ്ടെന്നും അദ്ദേഹം സംശയം പ്രകടിപ്പിച്ചു. മെത്രാന്മാ‍ര്‍ ജീവിക്കുന്ന മൂഢ സ്വര്‍ഗത്തിലേക്ക് വിശ്വാസികളെ എത്തിക്കാൻ ശ്രമിക്കുകയാണെന്നും അദ്ദേഹം കുറ്റപ്പെടുത്തി.
പ്രസ്താവന കേട്ട് ക്രൈസ്തവ‍ര്‍ മൂക്കത്ത് വിരൽ വെച്ചിട്ടുണ്ടാകും. സദ്ബുദ്ധിയോ കോമൺസെൻസോ ഉള്ള ഒരു ക്രൈസ്തവനും ഇത് വിശ്വസിക്കില്ല. എന്നാൽ നി‍ര്‍മ്മല ഹൃദയമുള്ള ഒരുകൂട്ടര്‍ ഇത് വിശ്വസിച്ചേക്കാം. ന്യൂനപക്ഷമാണെങ്കിലും പത്ത് പേരുടെ തലയിൽ ഈ വിഷം കയറിയിട്ടുണ്ടെങ്കിൽ അത് അപകടകരമാണെന്നും അദ്ദേഹം പറഞ്ഞു.
അതേസമയം, പാലാ രൂപതാ ബിഷപ്പ് ജോസഫ് കല്ലറങ്ങാട്ടിന്റെ നാർക്കോട്ടിക്ക് ജിഹാദ് പരാമർശത്തിനെതിരെ ഗീവർഗീസ് മാർ കൂറിലോസ് രംഗത്തെത്തിയിരുന്നു.
“സുവിശേഷം സ്നേഹത്തിന്റെതാണ്, വിദ്വേഷത്തിന്റേതല്ല. അൾത്താരയും ആരാധനയും വെറുപ്പിന്റെ രാഷ്ട്രീയം പ്രസംഗിക്കുവാനും പ്രചരിപ്പിക്കുവാനും ആരും ഉപയോഗിക്കരുത്. മതേതരത്വം അതിവേഗം തകർക്കപ്പെടുന്ന ഒരുകാലത്ത് അതിന് ആക്കം കൂട്ടുന്ന പ്രസ്താവനകൾ ഉത്തരവാദിത്തപ്പെട്ടവർ ഒഴിവാക്കണം.” എന്നാണ് അദ്ദേഹം ഫേസ്ബുക്ക് പോസ്റ്റിൽ പറഞ്ഞത്.
