സമൂഹത്തിലെ അപകടകരമായ പ്രവണതകളെക്കുറിച്ചാണ് ബിഷപ്പ് മുന്നറിയിപ്പ് നൽകിയതെന്ന സഹായ മെത്രാൻ വ്യക്തമാക്കി. “ബിഷപ്പിൻ്റെ പ്രസ്താവന ഏതെങ്കിലും സമുദായത്തിന് എതിരല്ല. ആരെയും വേദനിപ്പിക്കാൻ ശ്രമിച്ചിട്ടില്ല. തെറ്റിദ്ധാരണ ജനകമായ പ്രചാരണങ്ങൾ അവസാനിപ്പിക്കണം. പരസ്പരം തിരുത്തി ഒരുമയോടെ മുന്നോട്ട് പോകാം” – എന്നും സഹായ മെത്രാൻ മാർ ജേക്കബ് മുരിക്കൻ പുറത്തിറക്കിയ വിശദീകരണ കുറിപ്പിൽ പറയുന്നുണ്ട്.
മതങ്ങളുടെ പേരും ചിഹ്നവും ഉപയോഗിച്ച് സാമൂഹിക വിരുദ്ധ പ്രവർത്തനം നടത്തുന്ന വളരെ ചെറിയ വിഭാഗത്തിൻ്റെ നടപടികളെ എല്ലാ സമുദായങ്ങളും ഗൗരവമായി കാണണമെന്നും വിശദീകരണ കുറിപ്പിൽ പാലാ രൂപത വ്യക്തമാക്കുന്നുണ്ട്.
ലൗ ജിഹാദിനൊപ്പം നാർക്കോട്ടിക് ജിഹാദും കേരളത്തിൽ നടക്കുന്നുണ്ടെന്ന പാലാ ബിഷപ്പ് മാർ ജോസഫ് കല്ലറങ്ങാട്ടിൻ്റെ പ്രസ്താവന തള്ളി മുഖ്യമന്ത്രി പിണറായി വിജയനും പ്രതിപക്ഷ നേതാവ് വി ഡി സതീശനും രംഗത്തുവന്നിരുന്നു. രൂക്ഷമായ ഭാഷയിലാണ് സതീശൻ വിഷയത്തിൽ പ്രതികരണം നടത്തിയത്. സമൂഹത്തെ ഭിന്നിപ്പിക്കുന്ന തലത്തിലേക്ക് വിഷയം വളർത്തരുത്. കേരളത്തിലെ സമുദായ സംഘർഷം ഉണ്ടാകാതിരിക്കാനും നോക്കുന്നതിനൊപ്പം സമുദായ മൈത്രി നിലനിൽക്കണം എന്നാണ് ആഗ്രഹിക്കുന്നത്. അനാവശ്യ അഭിപ്രായ പ്രകടനങ്ങൾ നന്നല്ല. മുഖ്യധാരാ രാഷ്ട്രീയ പാർട്ടികളും മാധ്യമങ്ങളും പ്രശ്നം വഷളാകാതെ നോക്കണമെന്നും പ്രതിപക്ഷ നേതാവ് വ്യക്തമാക്കി.
ഉത്തരവാദിത്തപ്പെട്ട സ്ഥാനത്ത് ഇരിക്കുന്നവർ ഇത്തരം പ്രശ്നം കൈകാര്യം ചെയ്യുമ്പോൾ ശ്രദ്ധിക്കണമെന്നായിരുന്നു മുഖ്യമന്ത്രിയുടെ പ്രതികരണം. ഏതെങ്കിലും തരത്തിലുള്ള മതപരമായ വേർതിരിവ് ഉണ്ടാകാതിരിക്കാനും അനാവശ്യമായി ചേരികൾ സൃഷ്ടിക്കാതിരിക്കാനും ശ്രദ്ധിക്കണമെന്നും മുഖ്യമന്ത്രി പറഞ്ഞു.
“നാർക്കോട്ടിക്ക് ജിഹാദ് എന്ന വാക്ക് ആദ്യമായിട്ടാണ് കേൾക്കുന്നത്. ബഹുമാന്യനായ ഒരു പണ്ഡ്യതനും സമൂഹത്തിൽ സ്വാധീനമുള്ള വ്യക്തി എന്ന നിലയിലും ഇത്തരം പ്രസ്താവനകൾ നടത്തുമ്പോൾ ശ്രദ്ധിക്കണം. ബിഷപ്പ് ഇത്തരമൊരു പ്രസ്താവന നടത്തിയത് എന്ത് അടിസ്ഥാനത്തിലാണെന്നും എന്ത് ഉദ്ദേശിച്ചാണെന്നും അറിയില്ല. നാർക്കോട്ടിക് എന്ന വാക്കിന് എന്തെലുമൊരു മതത്തിൻ്റെ നിറം ചർത്തിക്കൊണ്ടുക്കേണ്ട കാര്യമില്ല. അതിൻ്റെ നിറം സാമൂഹിക വിരുദ്ധതയാണ്. നാർക്കോട്ടിക്കുമായി ബന്ധപ്പെട്ട പ്രശ്നങ്ങൾ ഒരു പ്രത്യേക സമുദായത്തെ മാത്രം ബാധിക്കുന്നതല്ല” – എന്നും മുഖ്യമന്ത്രി വ്യക്തമാക്കി.
ബിഷപ്പിൻ്റെ പ്രസ്താവനയെ അനുകൂലിച്ചും തള്ളിപ്പറഞ്ഞും വാദം ശക്തമാണ്. കല്ലറങ്ങാട്ടിൻ്റെ പ്രസ്താവനയ്ക്ക് പിന്തുണയുമായി ഇരിങ്ങാലക്കുട ബിഷപ്പ് പോളി കണ്ണൂക്കാടന്‍ രംഗത്തുവന്നിരുന്നു. ലൗ ജിഹാദിനും നാർക്കോട്ടിക് ജിഹാദിനുമെതിരെ കരുതൽ വേണം. ഇക്കാര്യത്തിൽ മാതാപിതാക്കൾ കൂടുതൽ ജാഗ്രത പാലിക്കണമെന്നും അദ്ദേഹം വ്യക്തമാക്കി.
“തീവ്രവാദം അനിയന്ത്രിതമായി തുടരുന്നതിനാൽ നമ്മുടെ യുവാക്കളെയും യുവതികളെയും മാതാപിതാക്കൾ കൂടുതൽ ശ്രദ്ധിക്കണം. ലൗ ജിഹാദിലും ലഹരിമരുന്ന് ജിഹാദുമടക്കമുള്ള കുരുക്കുകളിൽ നമ്മുടെ കുങ്ങുങ്ങൾ വന്ന് വീഴാതിരിക്കാൻ മാതാപിതാക്കൾ കുഞ്ഞുങ്ങളുടെ കാര്യത്തിൽ കൂടുതൽ ശ്രദ്ധ ചെലുത്തണം. ചെറുപ്പം മുതൽ ഇക്കാര്യത്തിൽ ശ്രദ്ധ ഉണ്ടാകണമെന്ന് അഭർഥിക്കുകയാണ്” – എന്നും ഇരിങ്ങാലക്കുട ബിഷപ്പ് കഴിഞ്ഞ ദിവസം പറഞ്ഞു.
