വെള്ളിയാഴ്ച ചേരുന്ന പ്രിൻസിപ്പൽമാരുടെ യോഗത്തിൽ ഇക്കാര്യത്തിൽ തീരുമാനം ഉണ്ടാകും. സംസ്ഥാനത്തെ ടെക്നിക്ക്, മെഡിക്കൽ വിദ്യാഭ്യാസം, ബിരുദം – ബിരുദാനന്തര ബിരുദ സ്ഥാപനങ്ങളിലെ അവസാന വർഷ ക്ലാസുകളാണ് ഒക്ടോബർ നാലിന് തുറക്കാൻ തീരുമാനിച്ചത്. അവസാനത്തെ രണ്ട് സെമസ്റ്ററുകളിലുള്ള വിദ്യാർഥികൾക്ക് കോളേജുകളിൽ എത്താം.
അറുപതോളം വിദ്യാർഥികളുള്ള ബാച്ചുകളെ രണ്ടാക്കി ഒന്നിടവിട്ട ദിവസങ്ങളിൽ ക്ലാസുകൾ നടത്തണോ അതോ എല്ലാ ദിവസവും രണ്ട് സമയങ്ങളിലായി നടത്തണോ എന്ന കാര്യത്തിലാകും പ്രിൻസിപ്പൽമാരുടെ യോഗത്തിൽ ചർച്ചയാകുക. രണ്ട് സമയങ്ങളിലായി ഷിഫ്റ്റ് അനുസരിച്ചാണ് ക്ലാസുകൾ എങ്കിൽ അധ്യാപകരുടെ ഷിഫ്റ്റിലും മാറ്റം വരുത്തേണ്ടതുണ്ട്.
സംസ്ഥാനത്തെ പോളി ടെക്നിക്ക്, മെഡിക്കൽ വിദ്യാഭ്യാസം, ബിരുദം – ബിരുദാനന്തര ബിരുദ സ്ഥാപനങ്ങളാണ് ഒക്ടോബർ നാലിന് തുറക്കുന്നത്. കോളേജിലെത്തുന്ന എല്ലാ അധ്യാപകരും വിദ്യാർഥികളും ഒരു ഡോസ് വാക്സിനെങ്കിലും എടുത്തെന്ന് ഉറപ്പാക്കണമെന്നും അധ്യാപകർക്ക് മുൻഗണന നൽകുമെന്നും മുഖ്യമന്ത്രി വാർത്താ സമ്മേളനത്തിൽ കഴിഞ്ഞ ദിവസം വ്യക്തമാക്കിയിരുന്നു. കാമ്പസുകളിൽ എത്തുന്നവർ ക്ലാസുകൾക്കിടെ പുറത്ത് പോകാൻ പാടില്ലെന്ന നിർദേശവും നൽകിയിരുന്നു.
അവസാന വർഷ വിദ്യാർഥികളേയും അധ്യാപകരേയും മറ്റ് ജീവനക്കാരേയും ഉൾക്കൊള്ളിച്ച് എല്ലാ ഉന്നത വിദ്യാഭ്യാസ സ്ഥാപനങ്ങളും തുറന്നു പ്രവർത്തിക്കാനാണ് സംസ്ഥാന സർക്കാർ അനുമതി നൽകിയിരിക്കുന്നത്. കൊവിഡ് സാഹചര്യം നിലനിൽക്കുന്നതിനാൽ ക്ലാസുകളുടെ നടത്തിപ്പ് സംബന്ധിച്ച് വിദ്യാഭ്യാസ വകുപ്പിന് തീരുമാനിക്കാമെന്ന് മുഖ്യമന്ത്രി അറിയിച്ചിരുന്നു.
നിയമസഭാ തെരഞ്ഞെടുപ്പ് പ്രവർത്തനങ്ങളുമായി ബന്ധപ്പെട്ട് സംസ്ഥാനത്തെ അധ്യാപകരിൽ നല്ലൊരു വിഭാഗം അധ്യാപകരും കൊവിഡ് പ്രതിരോധ വാക്സിനെടുത്ത് നേട്ടമായി. ഇതുവരെ വാക്സിൻ സ്വീകരിക്കാത്തവർക് വേഗത്തിൽ വിതരണം ചെയ്യാനാണ് സർക്കാർ ഉദ്ദേശിക്കുന്നത്. കോളേജ് തലത്തിൽ വാക്സിൻ നൽകുന്ന കാര്യം ഉന്നതവിദ്യാഭ്യാസ വകുപ്പിൻ്റെ പരിഗണനയിലുണ്ട്. കോളേജ് തുറന്നാലും സാമൂഹിക അകലം ഉൾപ്പെടെയുള്ള കൊവിഡ് പ്രോട്ടോക്കോൾ പാലിക്കണം. ഇതിനായി ബോധവത്കരണ പരിപാടികൾ സംഘടിപ്പിക്കും.
അതേസമയം, കേരളത്തിലെ കൊവിഡ് കേസുകൾ വലിയ കുറവ് സംഭവിച്ചിട്ടില്ല. ആരോഗ്യവകുപ്പ് ബുധനാഴ്ച പുറത്തുവിട്ട കണക്കുകൾ പ്രകാരം സംസ്ഥാനത്തെ ടെസ്റ്റ് പോസിറ്റിവിറ്റി നിരക്ക് 17.63 ആണ്. 794 തദ്ദേശ സ്വയംഭരണ പ്രദേശങ്ങളിലെ വാര്ഡുകളില് പ്രതിവാര ഇന്ഫെക്ഷന് പോപ്പുലേഷന് റേഷ്യോ (WIPR) ഏഴിന് മുകളിലാണ്. ഈ വാര്ഡുകളില് 692 എണ്ണം നഗര പ്രദേശങ്ങളിലും 3416 എണ്ണം ഗ്രാമ പ്രദേശങ്ങളിലുമാണുള്ളത്. 2,39,480 പേരാണ് രോഗം സ്ഥിരീകരിച്ച് ഇനി ചികിത്സയിലുള്ളത്. വിവിധ ജില്ലകളിലായി 6,08,228 പേരാണ് ഇപ്പോള് നിരീക്ഷണത്തിലുള്ളത്. ഇവരില് 5,75,411 പേര് വീട്/ഇന്സ്റ്റിറ്റിയൂഷണല് ക്വാറന്റൈനിലും 32,817 പേര് ആശുപത്രികളിലും നിരീക്ഷണത്തിലാണ്. 2587 പേരെയാണ് പുതുതായി ആശുപത്രിയില് പ്രവേശിപ്പിച്ചത്.
