കൊച്ചി> ‘ആല്ക്കെമിസ്റ്റ്’ എന്ന് പേരുള്ള കേരളത്തിലെ ഓട്ടോയുടെ ചിത്രം പങ്കുവെച്ച് വിഖ്യാത എഴുത്തുകാരനും സൃഷ്ടിയുടെ രചയിതാവുമായ പൗലോ കൊയ്ലൊ. ഫോട്ടോയ്ക്ക് നന്ദി എന്ന കുറിപ്പോടു കൂടിയാണ് പൗലോ കൊയ്ലൊ ഓട്ടോയുടെ ചിത്രം ട്വിറ്ററിലൂടെ പങ്കുവെച്ചത്. നിരവധി മലയാളികള് ചിത്രത്തിന് നന്ദി പറഞ്ഞ് കമന്റ് ചെയ്തു.
എറണാകുളത്തെ ഓട്ടോയുടെ ചിത്രമാണ് പൗലോ കൊയ്ലൊ ഷെയര് ചെയ്തിരിക്കുന്നത്. എറണാകുളം നോര്ത്ത് പറവൂരില് രജിസ്റ്റര് ചെയ്ത സി.എന്.ജി ഓട്ടോറിക്ഷയിലാണ് പൗലോ കൊയ്ലൊ എന്ന് ഇംഗ്ലീഷിലും ആല്ക്കെമിസ്റ്റ് എന്ന് മലയാളത്തിലും എഴുതിയിരിക്കുന്നത്.
ലോകത്തില് ഏറ്റവും വായിക്കപ്പെടുന്ന എഴുത്തുകാരിലൊരാളായ പൗലോ കൊയ്ലൊയുടെ ഏറ്റവും വലിയ ഹിറ്റ് പുസ്തകമാണ് ആല്ക്കെമിസ്റ്റ്. ഒരു ആധുനിക ക്ലാസ്സിക് ആയി വാഴ്ത്തപ്പെട്ട ഈ കൃതി 1988ലാണ് ആദ്യമായി പ്രസിദ്ധീകരിക്കപ്പെട്ടത്.
നേരത്തെ ആലുവയില് ആല്ക്കെമിസറ്റ് ഉള്പ്പടെയുള്ള പുസ്തകങ്ങളുടെ മാതൃകയില് തീര്ത്ത ബുക്ക്സ്റ്റാളിന്റെ ചിത്രവും പൗലോ കൊയ്ലൊ ഷെയര് ചെയ്തിരുന്നു.
