സർക്കാരിൻ്റെ തീരുമാനം യാത്രക്കാരായ സ്ത്രീകൾക്കും കുട്ടികൾക്കും ഭീഷണിയാണ്. മദ്യത്തിൻ്റെ ഉപഭോഗം കുറയ്ക്കാനുള്ള നീക്കം ഒരു ഭാഗത്ത് നടക്കുമ്പോൾ മദ്യവിതരണം സുഗമമാക്കാനുള്ള സർക്കാർ നിക്കം ശരിയായ നടപടിയല്ല. മന്ത്രിയുടെ നീക്കം കണ്ടാൽ ചങ്ങലയ്ക്ക് ഭ്രാന്ത് പിടിച്ചോ എന്ന് തോന്നും. കെഎസ്ആർടിസി ബസ് സ്റ്റാൻഡുകളിൽ മദ്യക്കടകൾ തുടങ്ങുമെന്ന നീക്കത്തെ ചെറുത്ത് തോൽപ്പിക്കുമെന്നും കെസിബിസി പ്രസ്താവനയിലൂടെ അറിയിച്ചു.
ബസ് സ്റ്റാൻഡ് പ്രശ്നസാധ്യത മേഖലയായി മാറുമ്പോൾ യാത്രക്കാർ കെ എസ് ആർടിസിയെ ഉപേക്ഷിക്കും. സാമൂഹ്യവിപത്തിനെ മാടിവിളിക്കുന്നത് ‘ദീപസ്തംഭം മഹാശ്ചര്യം നമുക്കും കിട്ടണം പണം’ എന്ന ലക്ഷ്യത്തിനുവേണ്ടി മാത്രമാണന്നും കെസിബിസി അഭിപ്രായപ്പെട്ടു. കെസിബിസി മദ്യവിരുദ്ധ സമിതിയുടെ നിലപാടിൽ സർക്കാർ ഇതുവരെ പ്രതികരണം നടത്തിയിട്ടില്ല. തീരുമാനത്തിൽ എതിർപ്പുണ്ടാകാനുള്ള സാഹചര്യം കണക്കിലെടുത്താണ് സർക്കാർ മുന്നോട്ട് നീങ്ങുന്നത്.
മദ്യം വാങ്ങാൻ എത്തുന്നവര്‍ക്ക് മെച്ചപ്പെട്ട സൗകര്യം നൽകണമെന്ന് ഹൈക്കോടതിയുടെ നിര്‍ദ്ദേശം പിന്തുര്‍ന്നാണ് കെഎസ്ആർടിസി ബസ് ഡിപ്പോകളിൽ ബിവറേജസ് കോർപ്പറേഷൻ്റെ ഔട്ട് ലെറ്റുകൾ തുറക്കാനുള്ള നീക്കത്തിലേക്ക് സർക്കാർ കടന്നത്.
കെഎസ്ആര്‍ടിസിയുടെ സ്ഥലം മദ്യവിൽപ്പന ശാലകള്‍ക്ക് അനുമതി നൽകുമെന്ന് ഗതാഗത മന്ത്രി ആന്റണി രാജു പറഞ്ഞിരുന്നു. യാത്രക്കാര്‍ക്ക് ബുദ്ധിമുട്ട് ഉണ്ടാകാത്ത വിധമാണ് മദ്യക്കടകള്‍ ക്രമീകരിക്കുന്നത്. ലേല നടപടികളിലൂടെ സ്ഥലമെടുത്ത് നിയമപരമായി മദ്യം വില്‍ക്കുന്നതിനെ ആര്‍ക്കും തടയാനാവില്ല. ടിക്കറ്റ് ഇതര വരുമാനത്തിനായി എല്ലാ വഴികളും കെഎസ്ആര്‍ടിസി സ്വീകരിക്കും. കെഎസ്ആര്‍ടിസി ഡിപ്പോകളില്‍ ബെവ്കോ വില്‍പ്പനശാലകള്‍ മാത്രമാണ് തുറക്കുന്നത്. ഇരുന്ന് മദ്യപിക്കാനുള്ള സൗകര്യം ഒരുക്കുന്നില്ല. അതിനാല്‍ മറ്റ് യാത്രക്കാര്‍ക്ക് ബുദ്ധുമുട്ടുണ്ടാകില്ലെന്നും മന്ത്രി വ്യക്തമാക്കിയിരുന്നു.
ജീവനക്കാര്‍ ജോലി സമയത്ത് മദ്യപിച്ചാല്‍ കര്‍ശന നടപടിയുണ്ടാകും. അനുവദനീയമായ അളവില്‍ മദ്യവുമായി യാത്ര ചെയ്യുന്നതിന് നിയമതടസമില്ല എന്നതും അനുകൂല ഘടകമാണ്. ബെവ്കോയ്ക്ക് മാത്രമല്ല നിയമവിധേയമായി പ്രവര്‍ത്തിക്കുന്ന എത് സ്ഥാപനത്തിനും കെഎസ്ആര്‍ടിസി ഡിപ്പോയില്‍ കടമുറികള്‍ വാടകക്ക് നല്‍കുമെന്നും ഗതാഗതമന്ത്രി വ്യക്തമാക്കി.
കെഎസ്ആർടിസി ബസ് ഡിപ്പോകളിൽ ബിവറേജസ് കോർപ്പറേഷൻ്റെ ഔട്ട് ലെറ്റുകൾ സ്ഥാപിക്കാമെന്ന നിർദേശം കെഎസ്ആര്‍ടിസിയാണ് മുന്നോട്ട് വെച്ചത്. കെഎസ്ആര്‍ടിസി മാനേജിങ് ഡയറക്ടറുടെ നിർദേശം ബിവറേജസ് കോർപറേഷൻ അതാത് ജില്ലകളിലെ ഉദ്യോഗസ്ഥരെ അറിയിച്ചിരുന്നു. ഇതിനെ തുടര്‍ന്ന് വിവിധയിടങ്ങളിലെ ബസ് ഡിപ്പോകളിൽ സ്ഥലപരിശോധന ആരംഭിച്ചു. കെഎസ്ആര്‍ടിസിയുടെ ഡിപ്പോകളില്‍ വര്‍ഷങ്ങളായി നിരവധി മുറികള്‍ വാടകയ്ക്ക് പോകാതെ കിടപ്പുണ്ട്. ബെവ്കോയുടെ വിൽപ്പനശാലകളിൽ ഭൂരിഭാഗവും സ്വകാര്യ കെട്ടിടങ്ങളിലാണ് പ്രവര്‍ത്തിക്കുന്നത്. ഉയര്‍ന്ന വാടകയാണ് ഇതിന് ബെവ്കോ നൽകുന്നത്. ഈ വരുമാനം കെഎസ്ആർടിസിക്ക് ലഭിക്കാൻ പുതിയ പദ്ധതി വഴിയൊരുക്കും.
