കേരളത്തിലെ കോൺഗ്രസിന്റെ പ്രതിസന്ധിക്കു കാരണം എഐസിസി ജനറൽ സെക്രട്ടറി കെ സി വേണുഗോപാൽ ആണെന്നായിരുന്നു പി എസ് പ്രശാന്തിന്റെ കുറ്റപ്പെടുത്തൽ. രാഹുൽ ഗാന്ധിക്ക് പ്രശാന്ത് അയച്ച കത്തിലാണ് ഇക്കാര്യം വ്യക്തമാക്കുന്നത്. വേണുഗോപാൽ ബിജെപി ഏജന്റാണെന്നും കത്തിൽ പറയുന്നു. കെ സി വേണുഗോപാലിന്റെ പ്രവർത്തനങ്ങൾ സംശയകരമാണ്. ജനിച്ചുവളർന്ന പ്രദേശത്ത് കെ സി വേണുഗോപാലിന് സ്വാധീനമില്ല. എന്നാൽ രാഷ്ട്രീയ അഭയം നൽകിയ ജില്ലയിലെ പാർട്ടിയുടെ നാശത്തിന് വേണുഗോപാലിന്റെ ഇടപെടൽ കാരണമായെന്നും പി എസ് പ്രശാന്ത് പറഞ്ഞിരുന്നു.
തന്നെ പുറത്താക്കിയതുകൊണ്ട് ഇത്തരം തുറന്നു പറച്ചിലുകൾ അവസാനിപ്പിക്കുമെന്ന് കരുതേണ്ടെന്ന് പി എസ് പ്രശാന്ത് പ്രതികരിച്ചു. ഇന്ത്യയിൽ കോൺഗ്രസ് തിരികെ വരണമെന്നും മതേതരത്വം നിലനിൽക്കണമെന്നും ബിജെപി ഇതര കക്ഷികൾ വളർന്നുവരണമെന്നും ആഗ്രഹിക്കുന്ന ആളാണ് താൻ. കോൺഗ്രസിൽ നിന്നുകൊണ്ട് കോൺഗ്രസിനെ തകർക്കാൻ ശ്രമിച്ചവർക്കെതിരെയാണ് താൻ പ്രതികരിച്ചതെന്നും പ്രശാന്ത് പറഞ്ഞു- റിപ്പോർട്ടർ ടിവിയുടെ പരിപാടിക്കിടെയായിരുന്നു പ്രതികരണം.
പുറത്താക്കിയതിനെ താൻ സ്വാഗതം ചെയ്യുകയാണെന്ന് പ്രശാന്ത് പ്രതികരിച്ചു. താൻ നടത്തിയ പരസ്യ പ്രസ്താവനയിൽ പശ്ചാത്താപമോ കുറ്റബോധമോ ഇല്ലെന്നും അദ്ദേഹം പറഞ്ഞു. വേണുഗോപാലിന് വിവിധ സംസ്ഥാനങ്ങളിൽ രൂപപ്പെട്ടിരിക്കുന്ന രാഷ്ട്രീയ പ്രതിസന്ധി പരിഹരിക്കാനുള്ള സംഘടനാ വൈഭവം ഉണ്ടോ? അഭിപ്രായം തുറന്നു പറയുന്നവരെ പുറത്താക്കിയാൽ എങ്ങനെ രക്ഷപെടുമെന്നും അദ്ദേഹം ചോദിച്ചു. പറയുന്ന കാര്യങ്ങൾ ഗൗരവമായി കാണാതെ പുറത്താക്കുന്ന നയമാണ് ഇവിടെ സ്വീകരിക്കുന്നതെന്നും അദ്ദേഹം കുറ്റപ്പെടുത്തി.
മതേതരത്വം ഉയ‍ര്‍ത്തിപ്പിടിച്ച് താൻ ഇവിടെ ഉണ്ടാകും. തന്റെ രാഷ്ട്രീയ ഭാവിയെക്കുറിച്ച് ആശങ്കയില്ല. മേഖലാ അന്വേഷണ സമിതിയെന്നത് സിബിഐ അല്ലെന്നും അദ്ദേഹം പരിഹസിച്ചു. ഈ അന്വേഷണംകൊണ്ട് വെള്ളപൂശാൻ മാത്രമേ കഴിയൂ എന്നും അദ്ദേഹം പറഞ്ഞു.
Also Read:
അതേസമയം, ഡിസിസി പുനഃസംഘടനയ്ക്കെതിരെ രൂക്ഷ വിമ‍ര്‍ശനം ഉന്നയിച്ച കെ പി അനിൽ കുമാറിനേയും കെ ശിവദാസൻ നായരേയും കെ സുധാകരൻ കഴിഞ്ഞ ദിവസം പാ‍ര്‍ട്ടിയിൽ നിന്നും താത്കാലികമായി പുറത്താക്കിയിരുന്നു. ഡിസിസി പുനഃസംഘടനയുമായി ബന്ധപ്പെട്ട് പാർട്ടി അച്ചടക്കം ലംഘിച്ച് ദൃശ്യമാധ്യമങ്ങളിലൂടെ പ്രതികരണം നടത്തിയതിനാണ് നടപടി.
വിഡി സതീശനും കെ സുധാകരനും എതിരായി കെപി അനിൽ കുമാർ രൂക്ഷ വിമർശനമാണ് നടത്തിയത്. ഗ്രൂപ്പ് പരിഗണിക്കില്ലെന്നാണ് സതീശനും സുധാകരനും പറഞ്ഞത്. എന്നാൽ പുറത്തുവന്ന പട്ടികയിലെ 14 പേരും ഗ്രൂപ്പുകാരാണെന്നും പുനഃപരിശോധിച്ചില്ലെങ്കിൽ കേരളത്തിലെ കോൺഗ്രസിന്റെ ഭാവി ഇല്ലാതാകുമെന്നും അദ്ദേഹം പറഞ്ഞു. ഡിസിസി പ്രസിഡന്റുമാരെ വെക്കുമ്പോൾ ഒരു മാനദണ്ഡം വേണ്ടേ? ഇത് ഇഷ്ടക്കാരെ ഇഷ്ടം പോലെ വെക്കുന്ന അവസ്ഥയാണെന്നും കെപി അനിൽ കുമാർ പറഞ്ഞു.
കെപി അനിൽ കുമാറിനെ പിന്തുണയ്ക്കുന്ന അഭിപ്രായം ആയിരുന്നു കെ ശിവദാസൻ നായരുടേത്. കെപിസിസി പ്രസിഡന്റിന്റെയും പ്രതിപക്ഷ നേതാവിന്റെയും നാല് വർക്കിങ് പ്രസിഡന്റുമാരുടേയും ഇഷ്ടക്കാരെ വെച്ചുകൊണ്ട് കേരളത്തിലെ കോൺഗ്രസിനെ പുനരുജ്ജീവിപ്പിക്കാൻ സാധിക്കില്ലെന്നായിരുന്നു ശിവദാസൻ നായർ പറഞ്ഞത്.
